އިންޓަރގްރޭޓެޑް ފެރީ ނެޓްވޯކް މަޝްރޫއުގެ ދަށުން ހދ އަތޮޅުގައި ހައި ސްޕީޑް ފެރީ ގެ ޚިދުމަތް ޖެނުއަރި މަހު ފަށާނެ ކަމަށް މިނިސްޓަރ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.

ހައި ސްޕީޑް ފެރީގެ ޚިދުމަތް ޒޯން އެކެއްގައި ފެށުމަށް ކުރިން ނިންމާފައި އޮތީ މިދިޔަ އަހަރުގެ ނޮވެމްބަރު މަހުއެވެ. އެހެންނަމަވެސް ކޮވިޑްގެ ސަބަބުން ދިމާވި ބައެއް ދަތިތަކާއެކު ޒޯން އެކެއްގެ މި ޚިދުމަތް ފެށުމަށް ބަންނަން ހަމަޖެހިފައި އޮތް 17 ފެރީ ބަނުމުގައި ވަނީ ލަސްތަކެއް ވެފައެވެ.

މިނިސްޓަރ އަސްލަމް ވިދާޅުވީ، ޖެނުއަރީ މަހުގެ ތެރޭގައި ހދ އަތޮޅަށް ފެރީގެ ޚިދުމަތް ފަށާއިރު، ޒޯން އެކެއްގެ ހުރިހާ ރަށްތަކަށް މިއަހަރުގެ އޭޕްރީލް މަހުގެ ނިޔަލަަށް ފެރީގެ ޚިދުމަތް ފެށުމަށް މަސައްކަތް ކުރަމުންދާ ކަމަށެވެ. އަސްލަމް މިހެން ވިދާޅުވީ، ރައީސުލްޖުމްހޫރިއްޔާ ނ. މަނަދޫގެ ރައްޔިތުންނާއެކު ބޭއްވެވި ބައްދަލުކުރެއްވުމުގައި ވާހަކަފުޅު ދައްކަވަމުންނެވެ. ސަރުކާރުން ކުރިއަށްގެންދާ "އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވަރކް" މަޝްރޫއުގެ ދަށުން ރާއްޖޭގެ އެންމެ އުތުރުން، ހއ. ހދ އަދި ށ އަތޮޅަށް ފެރީގެ ޚިދުމަތްދޭން ފެށުމަށް އެމް.ޓީ.ސީ.ސީއާ ވަނީ ހަވާލުކޮށްފައެވެ. ޒޯން 1 ގެ ޚިދުމަތަށް 17 ފެރީ ބަނުމުގެ މަސައްކަތާއި، ފެރީ ޓާމިނަލްތަކާއި ޕަސެންޖަރ ޓާރމިނަލް ހެދުމުގެ މަސައްކަތްވެސް އެމްޓީސީސީން އަންނަނީ ކުރަމުންނެވެ. އަދި ޒޯން އެކެއްގައި ބޭނުންކުރާ ފުރަތަމަ ފެރީ މިހާރުވަނީ މޫދަށް ބާލައި ޓެސްޓްކޮށްފައެވެ.

ހައި ސްޕީޑް ފެރީގެ ޚިދުމަތް ފެށުމަށް ބޭނުންވާ 17 ފެރީ ބަނުމުގެ މަސައްކަތް ގަލްފް ކްރާފްޓާއި ހަވާލުކޮށްގެން ކުރިއަށްދާއިރު، މިހާރު އޭގެ ތެރެއިން 4 ފެރީ ބަނދެ ނިމި، އިންޖީނުވެސް އަޅާ ނިމިފައިވެއެވެ. މި ފެރީތަކަކީ ޖާގަ ތަނަވަސް، ޒަމާނީ ޚިދުމަތްތަކާއެކު ފަރުމާކުރެވިފައިވާ ފެރީތަކެއް ކަމަށް އަސްލަމް ވިދާޅުވިއެވެ. އަދި 17 ފެރީ ބަނުމުގެ މަސައްކަތް މިއަހަރުގެ އޭޕްރީލް މަހުގެ ނިޔަލަށް ނިންމާލެވޭނެ ކަމަށް އަސްލަމް ވިދާޅުވިއެވެ.

ފެރީގެ ޚިދުމަތް ދިނުމަކީ ޚަރަދު ބޮޑު މަސައްކަތެއްކަމަށާއި، ފެރީތަކުގެ މެއިންޓަނެންސަށްވެސް ބޮޑު ޚަރަދެއް ހިނގާނެ ކަމެއް ކަމަށް އަސްލަމް ވިދާޅުވިއެވެ. ފެރީގެ ޚިދުމަތުން މުޅި ރާއްޖެ ގުޅާލުމަކީ ސަރުކާރުގެ މުހިއްމު ވައުދެކެވެ. މި ޚިދުމަތް ޕްރައިވެޓައިޒްކުރުމަކީ ސަރުކާރުގެ ވިސްނުމެއް ނޫންކަމަށާއި ބޭނުންވަނީ ސަރުކާރުން ސަބްސިޑައިޒް ކޮށްގެން ފޯރުކޮށްދޭ ޚިދުމަތަކަށް ހަދަން ކަމަށް އަސްލަމް ވިދާޅުވިއެވެ.

އަތޮޅުތަކުގައި ފެރީގެ ނިޒާމު ހަރުދަނާ ކުރުމަށް ސަރުކާރުން ކުރާ މަސައްކަތާއެކު، 2023 ގެ ނިޔަލަށް މުޅި ރާއްޖެ ހައި ސްޕީޑް ފެރީ ނިޒާމަކުން ގުޅާލުމަކީ ސަރުކާރުގެ މުހިއްމު ސިޔާސަތެކެވެ.