ބޮޑެތި ޕްރޮޖެކްޓްތައް ހިންގިއަސް ގައުމު ކުރިޔަށްދާނީ ދަތުރުފަތުރުގެ ނިޒާމު ވަރުގަދަވެގެން: ނަހުލާ

ގައުމެއްގައި ބޮޑެތި މަޝްރޫޢުތަކެއް ކުރިޔަށްގެންދިޔަ ނަމަވެސް ގައުމު ކުރިޔަށްދާނީ ދަތުރުފަތުރުގެ ނިޒާމު ވަރުގަދަވެގެންކަމަށް މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އައިޝަތު ނަހުލާ ވިދާޅުވެއްޖެއެވެ.

ރާއްޖެ ޓްރާންސްޕޯޓް ލިންކްގެ ޚިދުމަތް ރަސްމީކޮށް ހދ. އަތޮޅަށް ފެށުމާއެކު ކުރިޔަށްދިޔަ ލައިވް ސްޓްރީމް އިވެންޓްގައި ދެއްވި ވީޑިއޯ މެސެޖްގައި މިނިސްޓަރު ނަހުލާ ވިދާޅުވީ ރާއްޖޭގެ ތަރައްގީއަށް ދަތުރުފަތުރުގެ ނިޒާމަކީ ވަރަށް މުހިންމު އިސްކަމެއް ދީގެން ކުރަން ޖެހިފައިވާ ކަމެއްކަމަށެވެ. ސަބަބަކީ ރާއްޖެއަކީ ޖަޒީރާ ރަށްތަކަކަށް ވުމާއެކު ރާއްޖޭގެ ރަށްތައް އެއް ރަށް އަނެއް ރަށަށް ގުޅާލުމަކީ ރައްޔިތުންނަށް ލިބޭނެ ވަރަށް ބޮޑު ފަސޭހައަކަށްވާތީ ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ އިޖުތިމާއީ ގޮތުންނާއި އިގްތިޞާދީ ގޮތުން ރާއްޖެ ތަރައްގީކޮށް ކުރިއަރުވަން ބޭނުންނަމަ އިސްކަމެއް ދޭންޖެހޭނެ އެންމެ މުހިންމު އެއް ކަންތަކަކީ ދަތުރުފަތުރުގެ ނިޒާމުކަމަށެވެ. ރާއްޖެ ޓްރާންސްޕޯޓް ލިންކުގެ ބޭނުމަކީ ހައި ސްޕީޑް ފެރީ ނިޒާމަކުން ރާއްޖޭގެ ރަށްތައް ގުޅާލުންކަމަށްވާއިރު މިގޮތަށް ގުޅޭލެވޭއިރު އެންމެ އިސްކަމެއް ދޭނީ ސަލާމަތާއި ރައްކާތެރިކަމާއި ފަސޭހަކަމާއެކު އެމީހެއްގެ ރަށަށް ވާސިލުވެވޭނެ ފަސޭހަ އަވަސް ނިޒާމެއް އޮތުމަށްކަމަށް މިނިސްޓަރު ވިދާޅުވިއެވެ.

އިފްތިތާހުކުރެވިގެންދާ މިނިޒާމަކީ މިކަމަށް އެޅޭނެ އެންމެ މުހިންމު އެއް ފިޔަވަޅުކަމަށް މިނިސްޓަރު ވިދާޅުވިއެވެ.

މިނިސްޓަރު ނަހުލާ ވިދާޅުވީ މިނިޒާމާއެކު ރާއްޖެއަށް ތަރައްގީ ގެނުވައިދޭނެކަމަށެވެ. އަދި މިސަރުކާރުގެ އަބަދުވެސް ވިސްނަނީ ރާއްޖެއަށް ތަރައްގީ އާ ތަމައްދުން ގެނައުމަށްކަމަށް މިނިސްޓަރު ވިދާޅުވިއެވެ.

މިނިޒާމުގެ ފުރަތަމަ ފޭސްގައި ހއ. ހދ. އަދި ށ. އަތޮޅު ގުޅާލެވޭނެ އެވެ. އަދި 41 ރަށަށް ޚިދުމަތް ލިބެނޭ ކަމަށާއި ހަފްތާއަކު 7 ދުވަހު ދަތުރުތައް ކުރާނެ ކަމަށް ޕްލޭނިންގ މިނިސްޓްރީން ވަނީ ބުނެފައެވެ.

މި މަޝްރޫއު ހިންގުމަށް ހަމަޖެހިފައިވަނީ ތިން ފިޔަވައްސަކަށް ބަހާލައިގެންނެވެ. ފުރަތަމަ ފިޔަވަހީގެ ޚިދުމަތް ފަށާފައިވާއިރު ދެވަނަ ފިޔަވަހީގައި ނ، ރ، ބ، ޅ، ގއ، ގދ، ޏ، އަދި ސ ގުޅާލާނެއެވެ. އަދި ތިންވަނަ ފިޔަވަހީގައި ކ، އއ، އދ، ވ، މ، ފ، ދ، ތ އަދި ލ ގުޅާލުމަށް ވަނީ ނިންމާފައެވެ. މި މަޝްރޫއުގެ ދަށުން ޖުމްލަ 188 ރަށް ގުޅާލުމަށް ވަނީ ހަމަޖެހިފައެވެ.

ހައި ސްޕީޑް ފެރީ ނިޒާމަކުން ރާއްޖެ ގުޅާލުމުގެ ފުރަތަމަ ފިޔަވަހި ފަށާފައިވާއިރު، ޓިކެޓް ބުކް ކުރުމަށް ޕޯޓަލްގެ އިތުރުން މޮބައިލް އެޕްލިކޭޝަނެއް ވަނީ ތައާރަފުކޮށްފައެވެ. ޕްލޭނިން މިނިސްޓްރީން ކޮށްފައިވާ ޓުވީޓެއްގައި ވަނީ ޕޯޓަލްއަށް ވަންނަ ގޮތް ކިޔައިދީ ވީޑިއޯއެއް އަޕްލޯޑްކޮށްފައެވެ. އަދި ޚާއްސަ އެހީއަށް ބޭނުންވާ ފަރާތްތަކުން ރާއްޖެ ޓްރާންސްޕޯޓް ލިންކް (އާރްޓީއެލް)ގެ ފެރީތަކުން ހިލޭ ދަތުރުކުރެވޭނެ ކަމަށް ވެސް ވަނީ ބުނެފައެވެ. ދަތުރު ކުރާ ކޮންމެ މީހަކާއެކު އުމުރުން 3 އަހަރުގެ ދަށުގެ އެއް ކުއްޖަކުގެ ގެންދެވިދާނެ ކަމަށާއި އުނގުގައި ބައިންދާ ގޮތަށް ހިލޭ އެ ކުއްޖަކަށް ދަތުރު ކުރެވޭނެ ކަމަށް ވެސް ވަނީ ބުނެފައެވެ.