ދޮންބަންޑާރައިންގެ ޖިހާދާއި ހިތްވަރާއި ހިކުމަތްތެރިކަމުގައި ދިވެހިން ސާބިތުވެ ތިބެންޖެހޭ - ޝާހިދު
ދޮންބަންޑާރައިންނަކީ އޮނަރަބަލް އަބްދުﷲ ޝާހިދުގެ ހަތްވަނަ ކާފާފުޅު
ނިޝާން އިއްޒުއްދީނުގެ އިއްޒަތުގެ ވެރިޔާ އޮނަރަބަލް އަބްދުﷲ ޝާހިދު
ހުރަވީ ދުވަސް ފާހަގަކުރާއިރު ދިވެހިންގެ އަޒުމަކަށްވާންވީ މިނިވަންކަމާއި ކުރިމަގަށް މަސައްކަތްކުރުމުގައި ދޮންބަންޑާރައިންގެ ޖިހާދާއި ހިތްވަރާއި ހިކުމަތްތެރިކަމުގައި ސާބިތުވެ ދެމިތިބުން ކަމަށް އދ.ގެ އާއްމު މަޖިލީހުގެ ރައީސް އަދި ރާއްޖޭގެ ޚާރިޖީ ވަޒީރު އަބްދުﷲ ޝާހިދު ވިދާޅުވެއްޖެއެވެ.
މިއަހަރުގެ ހުރަވީ ދުވަސް ޖެނުއަރީ 6 ވީ ބުރާސްފަތި ދުވަހު ފާހަގަކޮށްފައިވާއިރު އެދުވަހުގެ މުނާސަބާގައި ޝާހިދު ކުރެއްވި ޓުވީޓުގައި ދިވެހީންގެ މިނިވަންކަމުގެ މުހިއްމުކަމުގެ މައްޗަށް އަލިއަޅުވާލައްވަމުން ވިދާޅުވީ ދޮންބަންޑާރައިން ދެއްކެވި ސާބިތުކަންމަތީ މިއަދުގެ ސަރުކާރު އޮތުމުން އެކަމާ އުފާކޮށް، ދުވަހުގެ ތަހުނިޔާ އެންމެހައި ދިވެހި މުވާތިނުންނަށް އަރިސްކުރައްވާ ކަމުގައެވެ.
ހުރަވީ ދުވަސް ނިސްބަތްވަނީ މަލާބާރީންގެ އަތްދަށުން ދިވެހިރާއްޖެ ސަލާމަތްކުރެއްވުމަށް ދޮންބަންޑާރައިން ކުރެއްވި މަތިވެރި ގައުމީ ޖިހާދަށާއި ދޮންބަންޑާރައިންނަށެވެ. ދޮންބަންޑާރައިންނަކީ އޮނަރަބަލް ޝާހިދުގެ ހަތްވަނަ ކާފާފުޅެވެ. ދޮންބަންޑާރައިންނަށް ނިސްބަތްކުރެވޭ ޝަރަފާއި އިއްޒަތުގެ ލަގަބު ވެސް ހުސްވި 2021 ވަނަ އަހަރު އޮނަރަބަލް ޝާހިދަށް ސަރުކާރުން ވަނީ އަރުވާފައެވެ. އެއީ ނިޝާން އިއްޒުއްދީނުގެ އިއްޒަތުގެ ވެރިޔާކަމެވެ. ދޮންބަންޑާރައިންގެ ނަންފުޅަކީ ސުލްތާން ހަސަން އިއްޒުއްދީނެވެ.
ހޮޅީން ނުވަތަ މަލާބާރީން ރާއްޖެ ހިފައި 20 ޑިސެންބަރު 1752ން 7 އޭޕްރީލު 1753ށް 3 މަހާއި 17 ދުވަސް ވަންދެން ރާއްޖޭގައި ތިބިތިބުން ނިމުމަކަށް އައީ ދޮންބަންޑާރައިން އިސްވެ ހުންނަވައިގެން ކުރެއްވި ޖިހާދުންނެވެ. އެއީ މީގެ 277 އަހަރު ކުރިން 3 ޖުމާދިލްއާޚިރު 1166 ނުވަތަ 7 އޭޕުރީލު 1753 ގައެވެ.
ހުރަވީ ދުވަހަކީ ދިވެހީންގެ ޚާރިޖީ މިނިވަންކަމާއެކު ދާޚިލީ މިނިވަންކަންވެސް ގެއްލި އޮތުމަށްފަހު އެމިނިވަންކަން ދިވެހީންނަށް ލިބުނު ދުވަހެވެ. ދިވެހިރާއްޖޭގައި ބޭރު ގައުމެއްގެ ރަސްކަލެއްގެ ނަންފުޅުގައި ތާނިޔާކިޔައި އެރަސްގެފާނުންގެ ސިއްކަ ހިންގަމުން އަންނަނިކޮށް އެކަމުން މިންޖުވެ މިނިވަންކަން ލިބުނު ދުވަހެވެ.
