ދޮންކެޔޮ ތިޔާގި، އަގުތަށް އިންތިހާއަށް މަތީގައި

ލޯކަލް މާރުކޭޓުގައި ލިބެންހުންނަ ތަކެތީގެ މިންވަރު އެއް ދުވަހުން އަނެއް ދުވަހަށް އިތުރުވަމުންދާ އިރު މާރުކޭޓުގައި ގިނަ އަދަދެއްގެ މޭވާގެ ބާވަތްތައް ވެސް ލިބެން އެބަ ހުއްޓެވެ. އެގޮތުން މާރުކޭޓުގައި އެންމެ ގިނައިން ލިބެން ހުރި އެއް ބާވަތަކީ، ދޮންކޭލެވެ. މާރުކޭޓުގެ ބައެއް ގޮޅިތަކުން ދޮންކެޔޮ ވަކެއް 6ރ. އާއި 5ރ. އަށް ލިބެން ހުރި އިރު އަނެއް ބައި ގުޅިތަކުން 4ރ. އަށް ވެސް ދޮންކެޔޮ ވަކެއް ލިބެން އެބަ ހުއްޓެވެ. މީގެ އިތުރުން ބައެއް ގޮޅިތަކުން 10ރ. އަށް ތިން ވަށް ލިބެން ހުރި އިރު 15ރ. އަށް ދެވަށް ވެސް މާރުކޭޓުގައި ވިއްކަމުންދެ އެވެ.

ރަމަޟާން މަހުގެ ކުރިއަށް އޮތް ތަނުގައި ދޮންކޭލުގެ އަގު ހެޔޮވެގެންދާނެ ކަމަށް ބައެއް ވިޔަފާރިވެރިން ބުނި ނަމަވެސް، އަނެއް ބަޔަކު ވަނީ އަގަށް މާބޮޑު ބަދަލެއް ނާންނާނެ ކަމަށް ބުނެފަ އެވެ.

މާރުކޭޓުގައި، ފުވައްމުލަކު، ހއ.ކެލާ، ލ އަތޮޅުގެ އިތުރުން ގދ. މަނޑަވެލިން ގެނެސްފައިވާ ދޮންކެޔޮ ހުރި ކަން ފާހަގަކޮށްލެވެ އެވެ. މީގެ އިތުރުން ބޭރުން އެތެރެކޮށްގެން ވިއްކާ ދޮންކެޔޮވެސް މާރުކޭޓުގައި ލިބެން އެބަ ހުއްޓެވެ.

ލޯކަލް މާރުކޭޓުގައި ކަރާ ކިލޯއެއްގެ އަގު ރަމަޟާން މަހުގެ ފުރަތަމަ ދުވަހު 18ރ. އާއި 15ރ. އަށް ހުރި ނަމަވެސް މިހާރު އަގު ވަނީ 15ރ އާއި 10ރ. އަށް ވެއްޓިފަ އެވެ.

މީގެ އިތުރުން ލުބޯ ކިލޯއެއްގެ އަގު 60ރ. އަށް ލިބެން ހުރި އިރު، މިރުސް ކިލޯ އެއް އުޅެނީ، 600ރ. އާއި 500ރ. އަށެވެ. ކިއުކަމްބާ ކިލޯއެއްގެ އަގު އުޅެނީ، 60ރ. އާއި 40ރ އާއި ދެމެދުގެ އަގުތަކެއްގަ އެވެ.

ރަމަޟާން މަހުގެ ކުރިއަށް އޮތް ދުވަސްތަކުގައި، ކަރާގެ އަގު ދަށަށް ދާނެ ކަމަށް ވިޔަފާރިވެރިން ބުނާ އިރު، މިރުސް އަދި ކިއުކަމްބާގެ އަގު މައްޗަށް އަރައިގެންދާނެ ކަމަށް ބެލެވޭ ކަމަށް ތަކެތި ވިއްކާ ފަރާތްތަކުން ބުނެ އެވެ.