ފަތުރުވެރިކަން ދަށްވެ، ރޫމް ރޭޓްތައް އިންތިހާއަށް ދަށްކޮށްފި!

ފަތުރުވެރިކަމުގެ ލޯ ސީޒަނާއި އިންޑަސްޓްރީ ކުރިމަތިލާފައިވާ މިދަނޑިވަޅުގައި ރާއްޖޭގައި އިއުލާންކޮށްފައިވާ ކުއްލި ނުރައްކަލުގެ ޙާލަތުގެ ސަބަބުން ފަތުރުވެރިކަން ދަށްވެ، ރިސޯޓްތަކާއި ގެސްޓް ހައުސްގެ ރޫމްރޭޓް ވަރަށް ބޮޑަށް ދަށްކޮށްފިއެވެ.

ބުކިންގ ވެބްސައިޓްތަކުގައި ރާއްޖޭގެ ރިސޯޓްތަކާއި ގެސްޓް ހައުސްތަކުގެ ކޮޓަރިތައް ވިއްކާ އަގު، މިއިން ޒަމާނަކު ދަށަށް ނުދާ މިންވަރަށް ވަނީ ދަށަށް ގޮސްފައެވެ. އެގޮތުން ބައެއް ތަންތަނުން ރެއަކަށް ކޮޓަރިތައް ވިއްކާ އަގުތަކުން 50 އިންސައްތައާއި 90 އިންސައްތައާއި ދެމެދުގެ މިންވަރެއް ދަށްވެފައިވާކަން ބުކިންގ ވެބްސައިޓްތަކުން ފާހަގަވެއެވެ.

ކުރީގެ އަގުތަކާއި މިހާރުގެ އަގުތަކާއިއެކު ކޮޓަރިތައް ވިއްކާ އަގުތައް އެންމެ ތަފްޞީލްކޮށް އެނގޭ ދުނިޔޭގެ އެންމެ މަޝްހޫރު އެއް ބުކިންގ ވެބްސައިޓްކަމަށްވާ އަގޯޑާ.ކޮމް ބަލާލުމުން އަގުތައް ވެއްޓިފައިވާ މިންވަރު ވަރަށް ބޮޑަށް ފެނިގެން ދެއެވެ.

މަތީ ފަންތީގެ ރިސޯޓްތަކަށް ބަލާލާއިރު، ހުރަވަޅި އައިލެންޑް ރިސޯޓުން 40 ވަރަކަށް އިންސައްތަ ޑިސްކައުންޓް ދެމުންދާއިރު، ކަޑިންމަ މޯލްޑިވްސް އިން 60 އިންސައްތަ، ބަނޑޮސް އައިލެންޑް ރިސޯޓުން 75 އިންސައްތަ، ކޮކޯޕާމް ދުނިކޮޅުން 70 އިންސައްތަ، ފިހާޅޮހި ރިސޯޓުން 82 އިންސައްތަ، ބިޔާދޫ ރިސޯޓުން 70 އިންސައްތަ އަދި އައްޑޫ ކެނެރީފް ރިސޯޓުން 84 އިންސައްތަ ޑިސްކައުންޓް ވަނީ ދީފައެވެ.

އަސްލު އަގަށް ބަލާއިރު، ކޮކޯޕާމް ދުނިކޮޅުން 30 ހާސް ރުފިޔާއަށް ވުރެ މަތިން ރެއަކަށް ވިއްކި ކޮޓަރީގެ އަގު ވަނީ 9 ހާހަށް ތިރިވެފައެވެ. ބަނޑޮހުން 15 ހާހަށް ވިއްކި ކޮޓަރި 4 ހާހަށް ވިއްކާއިރު، ފިހާޅޮހިން 19 ހާހަށް ވިއްކި ކޮޓަރި ވިއްކަނީ 3 ހާހަށެވެ. މިއީ އާދިއްތަ ދުވަހު އަގޯޑާގައި ލިސްޓްކޮށްފައިވާ އަގުތަކެވެ.

ރާއްޖޭގެ ފަތުރުވެރިކަމުގެ ދާއިރާގައި އިސްކޮށް އުޅުއްވާ ބޭފުޅަކު ވިދާޅުވީ އަހަރު ފެށި، ފުރަތަމަ ދެތިން މަސް ނިމުމުން އަބަދުވެސް ޑިސްކައުންޓް ދޭކަމަށާއި، އެހެން ނަމަވެސް މިފަހަރު މިހާބޮޑެތި ޑިސްކައުންޓް ދޭން ޖެހުނީ ކުއްލި ނުރައްކަލުގެ ޙާލަތާއި ގުޅިގެން ބޭރުގެ ޓުއަރ އޮޕަރޭޓަރުންނާއި ފަތުރުވެރިންގެ މެދުގައި ރާއްޖޭގެ މަޤްބޫލުކަން ކުޑަވުމުން ކަމަށެވެ.

"ކޮންމެ އަހަރަކުވެސް ހައި ސީޒަން ނިމި، ލޯ ސީޒަން ފެށުނީމަ ތަންތަނުން ޑިސްކައުންޓް ދޭނެ. އެކަމަކު މިފަހަރު މިހާ ބޮޑަށް އަގު ދަށްކުރަން މިޖެހުނީ އެސްއޯއީގެ ސަބަބުން. ވަރަށް އަގު ހެޔޮކޮށް ވިއްކައިގެންވެސް އެބަޖެހޭ އޮކިއުޕަންސީ ކޮންމެވެސް ވަރެއްގައި ހިފަހައްޓަން. އެހެން ނޫނީ ޖެހޭނީ މުވައްޒަފުން ވަކިކޮށް، އޮޕަރޭޝަން ޚަރަދު ކުޑަކުރަން. މިހާރުވެސް ބައެއް ތަންތަނުން މުވައްޒަފުން އެބަ މަދުކުރޭ. އިންޑަސްޓްރީއިން ބޭނުމެއް ނުވޭ މުވައްޒަފުންނަށް ވެސް އެވަރުގެ ބޮޑު ގެއްލުމެއް ދޭކަށް. ދެން އޮތް ހަމައެކަނި ގޮތަކީ އަގުތައް ތިރިކޮށްލުން،" އޭނާ ވިދާޅުވިއެވެ.

ރިސޯޓުތަކުގެ އިތުރުން ގެސްޓް ހައުސްތަކަށް ވެސް ބޮޑެތި ގެއްލުންތަކެއް ދަނީ ލިބެމުންނެވެ. ގެސްޓް ހައުސް އެސޯސިއޭޝަނުންވެސް ގެސްޓް ހައުސްތަކަށް ލިބޭ ގެއްލުންތައް ކުޑަކުރުމަށް ވަގުތުން ކުއްލި ނުރައްކަލުގެ ޙާލަތު އުވާލުމަށް ގޮވާލާފައިވާއިރު، ގެސްޓް ހައުސްތަކުން ބުނާ ގޮތުގައި މި ކުއްލި ނުރައްކަލުގެ ޙާލަތުގެ ސަބަބުން އެންމެ ބޮޑު ގެއްލުމެއް ލިބޭ ބަޔަކީ ގެސްޓްހައުސް ހިންގާ ފަރާތްތަކެވެ. ރިސޯޓް މާކެޓަށް ލިބޭ ގެއްލުންތައް ބޮޑުއިރު، ގެސްޓް ހައުސް މާކެޓަށް ލިބޭ ގެއްލުން އަދި މާބޮޑުވާނެ ކަމަށް އެފަރާތްތަކުން ފާހަގަކުރެއެވެ.

މާލެ އަތޮޅާއި، އަރި އަތޮޅުގެ އިތުރުން ވ އަތޮޅުގެ ގެސްޓް ހައުސްތަކުންވެސް ވަނީ ގިނަ އަދަދެއްގެ ބުކިންގތައް ކެންސަލް ވަމުންދާކަން ފާހަގަކޮށްފައެވެ.

ކުއްލި ނުރައްކަލުގެ ޙާލަތާއި ގުޅިގެން ރާއްޖެއަށް އެންމެ ގިނައިން ފަތުރުވެރިން އަންނަ ޤައުމުތަކުން ވަނީ އެޤައުމުތަކުގެ ރައްޔިތުން ރާއްޖެއަށް އައުމުގައި ސަމާލުވުމަށް އިލްތިމާސްކޮށް ޓްރެވަލް އެޑްވައިޒަރީސް ނެރެފައެވެ. އޭގެ ތެރޭގައި ރާއްޖެއަށް އެންމެ ގިނަ ފަތުރުވެރިން އަންނަ ޗައިނާ ފާހަގަ ކޮށްލެވެއެވެ.