ކޮވިޑް-19 އިން ރައްކާތެރިވުމަށް މާލޭ ސަރަހައްދުގައި އެޅި ފިޔަވަޅުތަކާއިއެކު ކެފޭ ރެސްޓޯރެންޓް ހިންގާ ފަރާތްތަކުން ކަންބޮޑުވާ ގިނަ ކަންތައްތައް އެބަހުރި ކަމަށް މޯލްޑިވްސް އީޓަރީސް ޔޫނިއަނުން ބުނެފިއެވެ.

ބުދަ ދުވަހު މާގިރި ހޮޓަލުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިންނަށް މައުލޫމާތު ދެމުން އީޓަރީސް ޔޫނިއަންގެ ފައުންޑަރެއް ކަމުގައިވާ ހާޒިމް ރަޝީދު ވިދާޅުވީ ކޮވިޑް-19 ގެ ޕެންޑަމިކްގައި ކެފޭ ރެސްޓޯރެންޓް ހިންގާ ފަރާތްތަކުން ބޮޑު ގުރުބާނީއެއް ވި ކަމަށާއި، އެގޮތުން މާލެ ތެރެ ލޮކްޑައުން ކުރުމުން ކެފޭ ރެސްޓޯރެންޓް ނުހުޅުވާ މަޑުކުރި ކަމަށެވެ.

ކެފޭ ރެސްޓޯރެންޓް ހިންގާ ފަރާތްތަކުން ރައްޔިތުންގެ މަޖިލީހަށް ޕެޓިޝަނެއް ހުށަހެޅިއިރު، މި ޕެޓިޝަނުގައި 100ށް ވުރެ ގިނަ ކެފޭ ރެސްޓޯރެންޓްތަކުން ސޮއި ކޮށްފައިވެއެވެ. އަދި މީގެ ތެރޭގައި ރާއްޖޭގައި ހިންގާ ބޮޑެތި ކެފޭ ރެސްޓޯރެންޓް ހިމެނޭ ކަމަށް އީޓަރީސް ޔޫނިއަނުން ބުނެއެވެ. އަދި މަޖިލީހުގެ ޕެޓިޝަން ބަލާ ކޮމެޓީން މި ޕެޓިޝަން ބަލައިގަނެފައިވާއިރު، މަޖިލީހުން ކަމާއި ގުޅޭ ފަރާތްތަކަށް ފޮނުވި ސިޓީތަކުގެ ޖަވާބުގައި އެފަރާތްތަކުން އެންމެ އެދެވޭ ޖަވާބެއް ދީފައި ނުވާކަމަށް އީޓަރީސް ޔޫނިއަނުން ބުނެއެވެ.

މޯލްޑިވްސް އީޓަރީސް ޔޫނިއަނުން ހެލްތު ޕްރޮޓެކްޝަން އެޖެންސީ (އެޗްޕީއޭ) އަށާއި ސަރުކާރަށް ޑިމާންޑް ކޮށްފައިވާ ކަންކަމުގެ ތެރޭގައި ހިމެނެނީ ރޭގަނޑު 10 އެއް ޖަހާއިރަށް ރެސްޓޯރެންޓް ބަންދު ކުރުމަށް ކަނޑައެޅި އުސޫލު ބަދަލުކުރުމާއި، އިންސްޕެކްޝަން ކަންތައް ހަރުދަނާ ކުރުމަށާއި، ކަރަންޓް އަދި ކުނި އުކުމުގެ އުސޫލު ބަދަލުކޮށްދިނުމަށެވެ.

މޯލްޑިވްސް އީޓާރސް ޔޫނިއަނުން ބުނީ ކެފޭ ރެސްޓޯރެންޓް އަދި ހޮޓާތަކަކީ އެހެން ތަންތަނަށް ވުރެ ހިދުމަތް ދިނުމުގައި ސާފުތާހިރު ކަމަށް އިސްކަން ދޭ ތަންތަން ކަމަށެވެ.

އެ ޔޫނިއަންގެ ފަރާތުން ވަނީ މިކަންކަމަށް ހައްލުތަކެއްވެސް ހުށަހަޅާފައެވެ. އެގޮތުން ހުށަހަޅާފައިވާ ހައްލުތަކުގެ ތެރޭގައި އެޗްޕީއޭ ގެ ގައިޑްލައިންތަކާއި އެއްގޮތްވާގޮތަށް ރައްކާތެރިކަމާއި އެކު ކެފޭ ރެސްޓައުރަންޓް އަދި ކާބޯތަކެތި ވިއްކާ ރަޖިސްޓްރީ ކުރެވިފައިވާ ތަންތަނުގައި ރޭގަނޑު 11:00 އަށް ޚިދުމަތްދެވޭނެ އިންތިޒާމެއް ހަމަޖައްސައިދެއްވުމަށް ވެސް ވަނީ އެދިފައެވެ.

މީގެ އިތުރުން އެ ޔޫނިއަނުން ބުނީ ކެފޭ ރެސްޓޯރެންޓް ތަކަށް ދިމާވެފައިވާ މައްސަލަތައް ހައްލު ކުރުމަށް އެކްޓިންގް ހެލްތު މިނިސްޓާ މުހައްމަދު އަސްލަމާއި، ސަރުކާރުގެ އިސްފަރާތްތަކާއި ބައްދަލުކޮށްފައިވާ ކަމަށާއި، އަދި ރައީސުލްޖުމްހޫރިއްޔާއާ ބައްދަލުކުރުމަށް އެދިފައިވާނެ ކަމަށެވެ. މިނިސްޓަރ އަސްލަމް އަދި ސަރުކާރުގެ އިސްފަރާތްތަކުން އެބޭފުޅުންނަށް އެއްބާރުލުން ދެއްވާނެ ކަމުގެ ފެހި ސިގްނަލް ދެއްވާފައިވާ ކަން ވެސް އީޓަރީސް ޔޫނިއަނުން ވަނީ ފާހަގަ ކޮށްފައެވެ.