ހަޔަރ އެޑިޔުކޭޝަން މެނޭޖްމަންޓް ޕޯޓަލްގެ މަސައްކަތް މިއަހަރު ތެރޭގައި ނިމޭނެ: މިނިސްޓަރ

ހަޔަރ އެޑިޔުކޭޝަން މިނިސްޓްރީގައި ހަޔަރ އެޑިޔުކޭޝަން ޕޯޓަލެއް ގާއިމުކުރުމުގެ މަސައްކަތް ކުރަމުންދާކަަމަށާއި އެމަސައްކަތް މިއަހަރު ތެރޭގައި ނިމޭނެކަމަށް ހަޔަރ އެޑިޔުކޭޝަން މިނިސްޓަރ ޑރ އިބްރާހީމް ހަަސަން ވިދާޅުވެއްޖެއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމްގައި ހަޔަރ އެޑިޔުކޭޝަން މިނިސްޓްރީން ކުރައްވަމުން ގެންދަވާ މަސައްކަތްތަކާއި ގުޅޭގޮތުން ވާހަކަފުޅު ދައްކަވަމުން މިނިސްޓަރ ވިދާޅުވީ މިޕޯޓަލްގެ ޒަރީއާއިން މަތީ ތައުލީމާއި ތަމްރީނުގެ ނިޒާމުގައި ބޭނުންވާ ހުރިހާ ތަފާސްހިސާބެއް މެނޭޖްކުރުމާއި އޮފީސް މަސައްކަތްތައްވެސް ކުރެވެމުންދާނެކަމަށެވެ. އެގޮތުން އޮފީސް މަސައްކަތުގައި ސިޓީ ރޫޓްކުރުމާއި އެކަން ކުރަނީ ކާކު ކަމާއި އެމަސައްކަތެއް ކުރުމަށް ނަގާނީ ކިހާ މުއްދަތެއްކަން އެނގިގެންދާނެކަމަށެވެ.

މި ޕޯޓަލްއާއެކު މިނިސްޓްރީގެ އެތެރޭގެ މަސައްކަތްތަކަށް އާދަޔާ ޚިލާފު ކުރިއެރުމެއް އަންނާނެކަމަށް މިނިސްޓަރ ވިދާޅުވިއެވެ. މީގެއިތުރުން މިހާރު ގާއިމުވެފައިވާ ސްޓޫޑެންޓް ޕޯޓަލް އާ ގުޅޭގޮތުން މިނިސްޓަރ ވިދާޅުވީ އެ ޕޯޓަލް މެދުވެރިކޮށް ކޮލެޖްތަކާއި ޔުނިވަރސިޓީތަކުން އެއްކުރާ ތަފާސްހިސާބާއި ގުޅޭ މައުލޫމާތުތައް އެއްކުރުމާއި ބެލެހެއްޓުމާއި ބޭނުންކުރުމުގައި ފަސޭހަތަކެއް ވެގެންގޮސްފިކަމަށެވެ. މިނިސްޓަރ ވިދާޅުވީ ކުރިން ޔުނިވަރސިޓީތަކާއި ކޮލެޖްތަކުން ހަޔަރ އެޑިޔުކޭޝަން މިނިސްޓްރީއަށް ހުށަހަޅާ އަހަރީ ތަފާސްހިސާބުތަކުގެ ހާޑުކޮޕީގެ ބަދަލުގައި ޕޯޓަލްގެ ތެރެއިން އެކަންކަން މިހާރު ކުރެވިގެންދާނެ ކަމަށެވެ.

އެކަމުގެ ސަބަބުން ކަންކަމުގައި ސިޔާސަތުތައް އެކުލަވާލާއިރު މިހާރު ފަސޭހަކަަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ މިޕޯޓަލް އަށް މައުލޫމާތުތައް ލާނެ ގޮތުގެ ތަމްރީނުތައް މިހާރު ކޮލެޖްތަކާއި ޔުނިވަރސިޓީތަކަށް ދީފައިވާކަމަށެވެ.