ޑަބްލިއުޑީސީގެ ބައި އިލެކްޝަންގެ އޮބްޒާވަރުންނަށް ވުމަށް އެއްވެސް ފަރާތަކުން ކުރިމަތިނުލާ
އިންތިޚާބު ބޭއްވުމަށް ހަމަޖެހިފައިވަނީ ފެބްރުއަރީ މަހުގެ ފަސްވަނަ ދުވަހު
ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މަގާމުތަކަށް ވޯޓުލުމަށްފަހު ވޯޓު ގުނަނީ
މިއަންނަ ފެބްރުއަރީ މަހުގެ ފަސްވަނަ ދުވަހު ބޭއްވުމަށް ހަމަޖެހިފައިވާ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ބައި އިލެކްޝަނުގައި އޮބްޒާވަރުން، މޮނިޓަރުން އަދި ކެންޑިޑޭޓުންގެ މަންދޫބުންނަށްވުމަށް އެދި އެއްވެސް ފަރާތަކުން ކުރިމަތިލާފައި ނުވާކަމަށް އިލެކްޝަންސް ކޮމިޝަން (އީސީ)ން ބުނެފިއެވެ.
މި އިންތިޚާބުގައި އޮބްޒާވަރުން، މޮނިޓަރުން އަދި ކެންޑިޑޭޓުންގެ މަންދޫބުންނަށްވުމަށް އެދި ހުށަހެޅުމުގެ ފުރުސަތު ހުޅުވާލާފައިވަނީ 05 ޖެނުއަރީ 2022 ވާ ބުދަ ދުވަހުގެ 15:00ގެ ނިޔަލަށެވެ.
ފެބްރުއަރީ ފަސްވަނަ ދުވަހު ބައި އިލެކްޝަންތައް ކުރިއަށް ގެންދިއުމަށް ހަމަޖެހިފައިވަނީ ހއ.ތަކަންދޫ, ތ.ވިލުފުށި, އަދި ގއ.ގެމަނަފުށީ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި އިލެކްޝަންތަކެވެ.
އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ބައި އިލެކްޝަންތަކަށް ރައްޔިތުންގެ ފަރާތުން އެކަށީގެންވާ ވަރުގެ ތަރުހީބެއް ލިބެމުން ނާންނަކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު މީގެ ކުރިން ވަނީ ވިދާޅުވެފައެވެ. އަދި ރައްޔިތުންގެ ފަރާތުން ލިބޭ ތަރުހީބު ކުޑަވި ނަމަވެސް މި އިންތިޚާބުތަކަށް ބޮޑު ޚަރަދަކާއެކު ގިނަ ވަގުތު ހޭދަކޮށްގެން މަސައްކަތް ކުރަން ޖެހޭކަން ފުއާދު އޭރު ފާހަގަކުރެއްވިއެވެ.
