ބްރެޒިލްގެ ރައީސް ބޮލްސޮނާރޯ ހޮސްޕިޓަލުން ދޫކޮށްލައިފި

ބްރެޒިލްގެ ރައީސް ޖެއިރް ބޮލްސޮނާރޯ ވިލާ ނޯވާ ސްޓާރ ހޮސްޕިޓަލުން ދޫކޮށްލައިފިއެވެ.

ބުދަ ދުވަހުގެ ހެނދުނު ހޮސްޕިޓަލުން ދޫކޮށްލާފައިވާ ކަމަށް ވިދާޅުވެ ބޮލްސޮނާރޯ ވަނީ އެންމެންނަށް ޝުކުރު އަދާކުރައްވައި ޓްވީޓެއް ކުރައްވާފައެވެ.

ސައޯ ޕައުލޯގައި ހުންނަ މި ހޮސްޕިޓަލުގައި ބޮލްސޮނާރޯ އެޑްމިޓްކޮށްފައިވަނީ ހޯމަ ދުވަހުގެ ހެނދުނުގެ ވަގުތެއްގައެވެ. ބޮލްސޮނާރޯ އެޑްމިޓްކުރީ އިންޓެންސްޝިއަލް ބްލޮކޭޖެއްގެ ސަބަބުންނެވެ. އިންޓެސްޝިއަލް ބްލޮކޭޖަކީ ގޮހޮރު ބޮލޮކްވުމުގެ ސަބަބުން ދިމާވާ މައްސަލައެކެވެ.

މިކަމާ ގުޅިގެން ބޮލްސޮނާރޯ ވިދާޅުވީ ސިއްހީ ހާލަތު ގޯސްވެ އެކަން އިހްސާސްވާން ފެށީ އާދީއްތަ ދުވަހު މެންދުރުގެ ފަރިއްކޮޅަށްފަހު ކަމަށެވެ. އަދި އެދުވަހު ޑޮކްޓަރުގެ ފަރުވާ ހޯއްދެވި ނަމަވެސް ހޮސްޕިޓަލުގައި އެޑްމިޓްކުރީ އިތުރަށް ހާލު ގޯސްވުމުންނެވެ.

މި މައްސަލަ ދިމާވެގެން މީގެ ކުރިންވެސް ބޮލްސޮނާރޯ ވަނީ 2018 ވަނަ އަހަރު ހޮސްޕިޓަލުގައި އެޑްމިޓްކޮށް އޮޕަރޭޝަން ތަކެއްވެސް ކުރައްވައިފައެވެ. އޭގެ ފަހުން 2021 ވަނަ އަހަރުވެސް މި ބައްޔަށް ބޮލްސޮނާރޯ ފަރުވާ ހޯއްދެވިއެވެ.

ބްރެޒިލްގެ ރައީސްކަމާ ބޮލްސޮނާރޯ ހަވާލުވެވަޑައިގަތީ 2019 ވަނަ އަހަރުއެވެ. އަދި މިއަހަރުގެ އޮކްޓޫބަރު މަހުގައި އޮންނަ އިންތިޚާބުގައި ވާދަކުރެއްވުމަށްވެސް ބޮލްސޮނާރޯ އަންނަނީ ތައްޔާރުވެވަޑައިގަންނަވަމުންނެވެ.