އިއާދަކުރަނިވި ހަކަތަ އާއި އެކު، ހއ. މާރަންދޫގެ މިސްކިތެއް ކަމުގައިވާ މަސްޖިދުލް ފަލާހް އެއާރކޯންކޮށް ބޭނުން ކުރަންފަށައިފިއެވެ.
މިކަމަށްޓަކައި ބުދަ ދުވަހު ބޭއްވި ކުޑަ ރަސްމިއްޔާތެއްގައި ،މި ޚިދުމަތް އިފްތިތާހް ކޮށްދެއްވީ ސެންޓްރަލް ޕޮލިސިން ކޮމާޑަރިން ހެޑް، އެސިސްޓެންޓް ކޮމިޝަނަރ އޮފް ޕޮލިސް އަލީ ސުޖާއު އެވެ.
އެރަށު ކައުންސިލުން ވިދާޅުވީ މި މަސައްކަތް ކުރިއަށް ގެންގޮސްފައިވަނި 3 ފޭހަކަށް ބަހާލައިގެންނެވެ. އެގޮތުން ފުރަތަމަ ފޭހުގެ ދަށުން 18ހާސް ބީޓީޔޫ ގެ 6 އެއާރ ކޯން އަދި 2 ވިންޑް ކާރޓަން ހަރުކޮށްފައި ވެއެވެ.
ދެވަނަ ފޭހުގައި ތްރީފޭސް ކަރަންޓް ވަޔަރިން އަޅާ، އަދި 3 ވަނަ ފޭހުގައި 8 ކިލޯގެ ސޯލާ އިން ކަރަންޓު އުފައްދާ ސިސްޓަމެއް އިންސްޓޯލްކުރެވި ނެޓް މީޓަރިން އާއި ގުޅާލެވިފައިވެއެވެ.
މިކަމާގުޅޭގޮތުން މާރަންދޫ ކައުންސިލްގެ ރައީސް ޖައިލަމް ހާރޫން ވިދާޅުވީ ކައުންސިލްގެ އަމާޒަކީ ދުރުނޫން މުސްތަޤްބަލެއްގައި އެރަށުގެ މަސްޖިދުލް ތަޤްވާގައި ވެސް މިފަދަ ކާމިޔާބު މަޝްރޫއެއް ހިންގައި އެއާރ ކޯން ކުރުމެވެ. އަދި މިއީ ރަށުގެ ރައްޔިތުންގެ ވަރަށް ބޮޑު އުންމީދެއްގެ ފެށުން ކަމަށްވެސް އެބޭފުޅާ ފާހަގަ ކުރައްވާފައި ވެއެވެ.
މާރަންދޫ ކައުންސިލުން ވަނީ މިމަސައްކަތް ކުރުމަށް ރަށުގެ ޒުވާނުން އިސްނަގާފައިވާތީ އެފަރާތްތަކަށާއި މިކަމުގައި އެހީތެެރިވި އެންމެހާ ފަރާތްތަކަށް ޝުކުރު ދަންނަވާފަ އެވެ.
