ވ. ވަށުގިރި، 5 ލައްކަ ރުފިޔާއިން ޖޫރިމަނާކޮށްފި
4 ޖެނުއަރީ 2022 | އަންގާރަ 08:49ޖޫރިމަނާ ފައިސާ 30 ދުވަހުގެ ތެރޭގައި ދައްކަންޖެހޭ
ވ. ވަށުގިރީގައި ގާއިމްކޮށްފައިވާ ވޯޓަރ ވިލާތައް
ވ. ވަށުގިރީގައި ގަވައިދާ ޚިލާފަށް މަސައްކަތްކޮށްފައިވާތީ ވަށުގިރި ޕްރައިވެޓް ލިމިޓެޑް ފަސް ލައްކަ ރުފިޔާއިން ޖޫރިމަނާކޮށްފިއެވެ.
އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ) އިން ބުނީ ވަށުގިރި ޕްރައިވެޓް ލިމިޓެޑުން ވަށުގިރީގައި ރިސޯޓެއް ތަރައްގީ ކުރުމުގެ މަޝްރޫއުގެ ބައެއް މަސައްކަތްތައް ގަވާއިދާ ޚިލާފަށް ކޮށްފައިވާކަމަށެވެ.
އެހެންކަމުން ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާއި ބެހޭ ގާނޫނުގެ ދަށުން ހަދާފައިވާ ތިމާވެށްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވައިދުގެ 16 ވަނަ މާއްދާގެ ދަށުން އަދި ތިމާވެއްޓަށް އަސަރުފޯރާ މިންވަރު ބަޔާންކުރާ ރިޕޯޓު ހެދުމާބެހޭ ގަވާއިދުގެ 20 ވަނަ މާއްދާގެ (ހ) ގެ 10 ވަނަ ނަންބަރަށް ރިއާޔަތްކޮށް ޖޫރިމަނާކޮށްފައިވާކަމަށެވެ.
ވަށުގިރި ޕްރައިވެޓް ލިމިޓެޑް ޖޫރިމަނާކޮށްފައިވަނީ ޖުމްލަ 593،750 (ފަސް ލައްކަ ނުވަދިހަ ތިންހާސް ފައްސަތޭކަ ފަންސާސް) ދިވެހި ރުފިޔާއިން ކަމަށް އީޕީއޭއިން ބުނެފައިވެއެވެ. ވަށުގިރި ޕްރައިވެޓް ލިމިޓެޑް ޖޫރިމަނާކުރީ ޖެނުއަރީ 3 ވަނަ ދުވަހުއެވެ. އަދި މި ޖޫރިމަނާ ފައިސާ 30 ދުވަހުގެ މުއްދަތުގެ ތެރޭގައި ދެއްކުމަށް ވަނީ އަންގާފައެވެ.
އީޕީއޭއިން ގެންދަނީ ތިމާވެއްޓަށް ގެއްލުންވާގޮތަށް ކުރަމުންދާ އެކި ކަންކަން ދެނެގަނެ އެފަރާތްތައް ޖޫރިމަނާކުރަމުންނެވެ. މިގޮތުން މިދިޔަ ޑިސެމްބަރު މަހުގެ 30 ވަނަ ދުވަހު ވަނީ އދ. މާފުށިވަރު ރިސޯޓު އިތުރަށް ތަރައްގީ ކުރުމުގެ މަސައްކަތުގައި ގަވައިދާ ޚިލާފުވެފައިވާތީ ޕެރެޑައިސް ރިސޯޓްސް ޑިވެލޮޕްމަންޓް އެންޑް މެނޭޖްމަންޓް ޕްރައިވެޓް ލިމިޓެޑް، 402,500 (ހަތަރު ލައްކަ ދެ ހާސްއްސަތޭކަ) ރުފިޔާއިން ޖޫރިމަނާކޮށްފައެވެ. އަދި މި ފައިސާ 30 ދުވަހުގެ ތެރޭގައި ދެއްކުމަށް ވަނީ އަންގާފައެވެ.
