މެސީ ކޮވިޑަށް ޕޮޒިޓިވްވެއްޖެ

ފްރާންސްގެ ޕީއެސްޖީއަށް ކުޅެމުން އަންނަ އާޖެންޓީނާގެ ތަރި ލިއޮނަލް މެސީ ކޮވިޑް-19 އަށް ޕޮޒިޓިވްވެއްޖެއެވެ.

ފިނި މޫސުމުގެ ޗުއްޓީއަށް ކުޅުންތެރިން ގޮސްފައި އެނބުރި އައިއިރު މެސީގެ އިތުރުން ޕީއެސްޖީގެ ތިން ކުޅުންތެރިން ވަނީ ކޮވިޑަށް ޕޮޒިޓިވްވެފައެވެ.

މެސީ ކޮވިޑަށް ޕޮޒިޓިވްވިކަން އެނގުނީ އައު އަހަރަށް ފްރާންސްގެ ފުޓުބޯޅަ ސީޒަން މެދުކަނޑާލުމަށްފަހު އަލުން ފަށަންވެގެން ކުރި ޓެސްޓުތަކުންނެވެ.

އެހެންކަމުން މެސީގެ އިތުރުން ޕީއެސްޖީއިން ޕޮޒިޓިވްވި ކުޅުންތެރިންނަށް ފްރެންޗު ކަޕުގައި ޕީއެސްޖީއިން ވަނެސްއާ ދެކޮޅަށް ކުޅޭ މެޗުގައި ނުކުޅެވޭނެއެވެ. މީގެ އިތުރުން އަންނަ ހޮނިހިރު ދުވަހު ފްރާންސް ލީގުގައި ލިޔޯންއާ ދެކޮޅަށް ކުޅޭ މެޗުވެސް ގެއްލޭނެއެވެ.

ހިލޭ ޓްރާންސްފަރ އެއްގެ ދަށުން ދެ އަހަރު ދުވަހުގެ ކޮންޓްރެކްޓެއްގައި މެސީ ޕީއެސްޖީއަށް ބަދަލުވީ ހޫނު މޫސުމުގެ ޓްރާންސްފަރ މާކެޓުގައެވެ. ފްރާންސް ލީގުގައި މެސީގެ ކުޅުން ދަށްވެފައިވާއިރު މިހާތަނަށް ކުޅުނު 11 މެޗުން ޖެހިފައިވަނީ އެންމެ ލަނޑެކެވެ. އެކަމަކު ޗެމްޕިއަންސް ލީގުގެ ހަ މެޗުން ފަސް ލަނޑު އޭނާ ވަނީ ޖަހާފައެވެ.

މެސީގެ އިތުރުން ދެން ޕޮޒިޓިވްވި ތިން ކުޅުންތެރިއަކީ ސްޕެއިނުގެ ފުލްބެކް، ހޫލިއަން ބެނާޓް އާއި ގޯލްކީޕަރު ސާޖިއޯ ރިކޯގެ އިތުރުން ޒުވާން މިޑްފީލްޑަރު ނޭތަން ބިޓޫމަޒާލާއެވެ.

ކޮވިޑް-19ގެ އައު ވޭރިއަންޓް، އޮމިކްރޯންގެ ނުރައްކާ ޔޫރަޕްގެ އެކި ގައުމުތަކަށް ކޮށްފައިވާއިރު، ފްރާންސްގައި ވެސް ކޮންމެ ދުވަހަކު ގިނަ ކޭސްތަކެއް އަންނަނީ ރިޕޯޓްކުރަމުންނެވެ. އެ ގޮތުން މިދިޔަ ތިން ދުވަހަށް ބަލާއިރު، ފްރާންސްގައި ދުވާލަކު 200،000 ޕޮޒިޓިވް ކޭސް ދަނީ ފެންނަމުންނެވެ.