ޗައިނާގައި ކޮވިޑުގެ ހާލަތު ގޯސްވެ ޗިޕު ވިއްކުމުގެ ވިޔަފާރިއަށް އަސަރުކޮށްފާނެ
1 ޖެނުއަރީ 2022 | ހޮނިހިރު 19:25ޗިޕު އެކްސްޕޯޓް ކުރުމުގައި ދަތިތަކެއް އެބަހުރި
ސެމްސެންގ ކުންފުނިން އުފައްދާ މެމޮރީ ޗިޕް
ޗައިނާއިން ކޮވިޑުން ރައްކާތެރިވުމަށް އަޅާފައިވާ ފިޔަވަޅުތަކުގެ ސަބަބުން މެމޮރީ ޗިޕު ވިއްކުމުގެ ވިޔަފާރިއަށް އެކަމުގެ އަސަރު ކުރަމުން އަންނަ ކަމަށް ސެމްސަން އިލެކްޓްރޯނިކްސް އަދި މައިކްރޮން ޓެކްނޮލޮޖީ ކުންފުނިން ބުނެފިއެވެ.
ސެމްސަން އަދި މައިކްރޮން ޓެކްނޮލޮޖީއަކީ މެމޮރީ ޗިޕް ވިއްކާ ދުނިޔޭގެ އެންމެ ބޮޑު ދެ ކުންފުންޏެވެ.
އެ ދެ ކުންފުނިން ނެރުނު ބަޔާނެއްގައި ބުނީ ކޮވިޑާއި ގުޅިގެން ޗައިނާގެ ޝިއާން ސިޓީ ލޮކްޑައުން ކުރުމުގެ ސަބަބުން ޗިޕު ވިއްކުމުގެ ވިޔަފާރިއަށް އެކަމުގެ އަސަރު ކުރަމުންދާ ކަމަށެވެ. އެގޮތުން ޗިޕު އެކްސްޕޯޓް ކުރުމުގައި ދަތިތަކެއް ހުރި ކަމަށާއި، މި ދަތިތަކާއެކު ޗިޕުގެ އަގު އެތައް ތަނެއް ބޮޑުކުރަން ޖެހިފައިވާ ކަމަށެވެ.
މި ބަޔާނުގައި އިތުރަށް ބުނީ ދުނިޔޭގެ އެކިކަންކޮޅުތަކުގެ ޑޭޓާ ސެންޓަރުތަކުގައި ބޭނުންކުރާ ޗިޕު އުފައްދަނީ ސެމްސަން އަދި މައިކްރޮން އިން ކަމަށާއި، ޗިޕު ސަޕްލައިއަށް މަޑުޖެހުމެއް އަތުވެއްޖެނަމަ ޑޭޓާ ސެންޓަރުތަކުގެ މަސައްކަތް ހުއްޓުމުގެ ބިރު އެބައޮތް ކަމަށެވެ.
ޗައިނާގެ ޝިއާން ސިޓީގައި ސެމްސަން އަދި މައިކްރޮން ކުންފުނީގެ ޗިޕު އުފައްދާ ކާރުޚާނާތައް ހުންނައިރު، އެ ސިޓީއަކީ 2021 ވަނަ އަހަރު ޗައިނާގެ ކޮވިޑުގެ ހާލަތު އެންމެ ގޯސް ސިޓީއެވެ. އެގޮތުން ޝިއާން ސިޓީން ފެންނަ ކޮވިޑު ކޭސްތަކުގެ އަދަދު ވަނީ 1200 ފަހަނަޅާ ގޮސްފައެވެ.
