ޔޫކްރެއިން މައްސަލައިގައި ބައިޑަން އާއި ޕުޓިން ދެ ވަނަ ފަހަރަށް މަޝްވަރާކުރައްވައިފި
1 ޖެނުއަރީ 2022 | ހޮނިހިރު 03:55ބައިޑަން ވަނީ ޔޫކްރެއިންގެ ކައިރި ހިސާބުތަކުގައި ތިބި ރަޝިޔާ ސިފައިން މަދުކޮށް ހަރަކާތްތައް މަދުކުރުމަށް އެދިވަޑައިގެންފައި
އެމެރިކާގެ ރައީސް ޖޯ ބައިޑަން ރަޝިޔާގެ ރައީސް ވްލަޑްމިއަރ ޕުޓިން އާ ފޯނުން ގުޅުއްވާ ވާހަކަދައްކަވަނީ
ޔޫކްރެއިންގެ މައްސަލައިގައި އެމެރިކާގެ ރައީސް ޖޯ ބައިޑަން އާއި ރަޝިޔާގެ ރައީސް ލަޑްމިއަރ ޕުޓިން މަޝްވަރާކުރައްވައިފިއެވެ.
ފޯނުން ދެ ބޭފުޅުން ކުރިޔަށް ގެންދެވި މިމަޝްވަރާތަކުގެ ދިގުމިނަކީ 50 މިނެޓެވެ. މިއީ ޑިސެމްބަރ މަހުގެ ތެރޭގައި ދެ ގައުމުގެ ރައީސުން ފޯނުން ވާހަކަދެއްކެވި ދެވަނަ ފަހަރެވެ. މިފަހަރުގެ މަޝްވަރާތަކުގައިވެސް ދެ ފަރާތުން ބަހުގެ ހަމަލާތައް ބަދަލުކުރިނަމަވެސް ޖެނުއަރީ މަސް ތެރޭގައި މިމައްސަލާގައި އިތުރަށް ކުރިޔަށް ގެންދާ މަޝްވަރާތަކާއެކު މަސްރަހު ފިނިވެގެންދާނެކަމަށް ވަނީ ބެލެވިފައެވެ.
ބައިޑަން ވަނީ ޔޫކްރެއިންގެ ކައިރި ހިސާބުތަކުގައި ތިބި ރަޝިޔާގެ ސިފައިންގެ އަދަދު މަދުކޮށް ހަރަކާތްތައް މަދުކުރުމަށް އެދިވަޑައިގަންނަވާފައެވެ. އެއާއެކު ޕުޓިން ވަނީ ދަތިކުރުމުގެ ފިޔަވަޅުތައް އަޅާނެކަމުގެ އިންޒާރު ވޮޝިންގޓަން އިން ދެމުން ގެންދާދިޔުމުގެ ސަބަބުން ހާލަތު އިތުރަށް ގޯސްވާނެކަމަށް ވިދާޅުވެފައެވެ. މިފޯނު ކޯލަކީ ރަޝިޔާގެ ރައީސްގެ އެދިވަޑައިގަތުމަކަށް ކުރިޔަށް ގެންދިޔަ ފޯނުކޯލެކެވެ.
މަޝްވަރާތަކަށްފަހު ވައިޓް ހައުސްގެ ޕްރެސް ސެކެޓްރީ ޖެން ސާކީ ވިދާޅުވީ މަޝްވަރާތަކުގެ ސަބަބުން ދެ ގައުމުގެ ގުޅުން ގޯސްވެ ހާލަތު ގޯސްވުމުގެ ބަދަލުގައި ރަނގަޅުވެގެންދާނެކަމަށެވެ. ރަޝިޔާގެ ރައީސް އޮފީހުންވެސް ވަނީ މިމަޝްވަރާތަކަކީ ކުރިޔަށް އެޅުނު ރަނގަޅު ފިޔަވަޅެއްކަމަށް ބުނެފައެވެ.
ޖެނުއަރީ މަހުގެ ތެރޭގައި ރަޝިޔާ އާއި އެމެރިކާ އާ ދެމެދު ސެކިޔުރިޓީ ބައްދަލުވުންތަކެއް ބޭއްވުމަށް ވަނީ ހަމަޖެހިފައެވެ. މަޝްވަރާތަކަށްފަހު ދެގައުމުންވެސް ބުނެފައިވަނީ ކުރިޔަށްދިޔައީ ސީރިއަސް ވާހަކަތަކެއް ކަމަށެވެ.
