ރަޝިޔާގެ ރައީސް ވުލަޑިމިއަރ ޕުޓިން ހުންނެވީ ހަނގުރާމަ ހުއްޓާލަން ބޭނުންފުޅުވެފައި ކަމަށާއި، ޔުކްރެއިން އާއެކު އައު މަޝްވަރާ ތަކެއް ބޭއްވުމަށް އެމެރިކާ އިން ތައްޔާރު ވަމުން އަންނަ ކަމަށް އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް އާއި ޓްރަމްޕްގެ ދަރިކަލުން ޖެރާޑް ކުޝްނާ ވަނީ ރަޝިޔާގެ ވެރި ރަށް މޮސްކޯގަައި ބައްދަލު ކުރައްވައިފަ އެވެ. ހަނގުރާމަ ހުއްޓާލުމުގެ މާބޮޑު ކުރިއެރުން ތަކެއް ލިބިފައި ނެތް ނަމަވެސް، ރަޝިޔާ އިން ބުނެފައި ވަނީ އެމެރިކާ އިން ހުށަހަޅާފައިވާ ބައެއް ކަންކަން ޕުޓިން ޤަބޫލު ކުރައްވާ ކަމަށެވެ. އަދި އަނެއް ބައި ކަންކަމަށް އެއްބަސް ނުވެވޭ ކަމަށް ވެސް ހާމަ ކޮށްފައިވެ އެވެ.

އެ މަޝްވަރާ ތަކާ ގުޅޭ ގޮތުން އޭއެފްޕީގެ ނޫސްވެރިޔަކު ސުވާލު ކުރުމުން ޓްރަމްޕް ވިދާޅުވެފައި ވަނީ، މިވަގުތު އޭނާ އަށް ބުނެވޭނީ އެމެރިކާގެ އޮފިޝަލުންނާއި ރަޝިޔާގެ ރައީސް ޕުޓިންއާ ދެމެދު ވަރަށް ރަނގަޅު ބައްދަލުވުމެއް ބާއްވާފައިވާ ކަމަށެވެ. އަދި އެ މަޝްވަރާ ތަކަކީ ވަރަށް ރަނގަޅު މަޝްވަރާ ތަކެއް ކަމަށް ވެސް ޓްރަމްޕް ވިދާޅުވެފައިވެ އެވެ.

ނަމަވެސް، މިވަގުތު ކަންތައް ވާނެ ވަކި ގޮތެއް ބުނަން އުނދަގޫކަން ފާހަގަ ކުރައްވައި ޓްރަމްޕް ވިދާޅުވީ، އެކަން ކުރިއަށް ދާނީ ދެ ފަރާތް ވެސް އެއްބަސްވާ ގޮތެއްގެ މަތިން ކަމަށެވެ. މީގެ އިތުރުން ހަނގުރާމަ ހުއްޓަން ޕުޓިން ބޭނުންފުޅުވާ ކަމުގެ އެއްވެސް ނިޝާނެއް އެ ބައްދަލުވުމުން ފެނުނުތޯ ސުވާލު ކުރުމުން ޓްރަމްޕް ވިދާޅުވީ، ރަޝިޔާ އިން ހަނގުރާމަ ނިންމަން ބޭނުންވާ ކަމަށެވެ. އެ ފަދަ އިޝާރާތެއް އެ ބައްދަލުވުމުން ލިބިފައިވާ ކަމަށް ޓްރަމްޕް ފާހަގަ ކުރެއްވި އެވެ.

މީގެ އިތުރުން ޓްރަމްޕް ވިދާޅުވެފައި ވަނީ، އެމެރިކާ އިން ހުށަހަޅާފައިވާ ހުށަހެޅުން ޔުކްރެއިން އިން ބަލައި ގަންނަ ކަމަށެވެ. އެހެން ނަމަވެސް، މިއަހަރުގެ ފެބްރުވަރީ މަހު އެމެރިކާގެ ރިޔާސީ ގަނޑުވަރު ވައިޓް ހައުސްގައި ކުރިއަށް ދިޔަ ހޫނު ބައްދަލުވުމުގެ ކުރިން ވެސް، ޔުކްރެއިންގެ ރައީސް ވުލޮޑޮމިއަރ ޒެލެންސްކީ އަދި އެ ޤައުމުން އެކަން ބަލައި ގަންނަން ޖެހޭ ކަމަށް ޓްރަމްޕް ވިދާޅުވެފައިވެ އެވެ.

ހަނގުރާމަ ހުއްޓާލުމާ ގުޅޭ ގޮތުން ވާހަކަ ދައްކަވަމުން ޒެލެންސްކީ ވިދާޅުވެފައި ވަނީ ސުލްޙަވެރި ކަމުގެ ދޮރު ހުޅުވިފައި ވީ ނަަމަވެސް، ރަޝިޔާ އަށް ޕްރެޝަރު ކުރުން ކުރިއަށް ދާން ޖެހޭ ކަމަށެވެ. އަދި ހަނގުރާމަ ނިންމުމުގެ ފުރުސަތު އޮތްކަން މުޅި ދުނިޔެ އަށް ވެސް ސާބިތުވެފައިވާ ކަމަށް އޭނާ ވިދާޅުވި އެވެ.

މީގެ ކުރިން ޔުކްރެއިން އާއި އެ ޤައުމަށް ތާއީދު ކުރާ ޔޫރަޕުގެ ޤައުމު ތަކުން ގޮވާލާފައި ވަނީ އެމެރިކާގެ ޕްލޭން އިސްލާޙު ކުރުމަށެވެ. އަދި ރަޝިޔާ އިން އެދޭ ގޮތަށް ހަނގުރާމަ ހުއްޓާލުމުގެ އެއްބަސްވުން ޤާއިމު ކޮށްގެން ނުވާނެ ކަމަށާއި، އެކަން ކުރުމުގައި ޔުކްރެއިންގެ މަސްލަޙު ވެސް ހިމާޔަތް ކުރަން ޖެހޭ ކަމަށް ގޮވާލާފައިވެ އެވެ.

އެމެރިކާގެ ރައީސް ކަމުގެ ދެ ވަނަ ދައުރުގައި މިހާރު ހުންނެވި ޓްރަމްޕް ގެންދަވަނީ ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެނައުމަށް ވަރަށް ބޮޑަށް ބާރު އަޅުއްވަމުންނެވެ. ނަމަވެސް، އެކަމުގައި ޓްރަމްޕް ރަޝިޔާގެ މަސްލަޙު ހިމާޔާތް ކުރާ ކަމަށް ބުނެ އޭނާ އަށް ފާޑު ކިޔުންތައް އަމާޒުވެ އެވެ.