ޗެމްޕިއަންސް ލީގުގައި ޔުވެންޓަސްއާ ދެކޮޅަށް ކުޅުނު މެޗުގައި ޗެލްސީގެ ޑިފެންޑަރު ޗިލްވެލްއަށް ލިބުނު އަނިޔާއާ ގުޅިގެން އޮޕަރޭޝަން ކުރަންޖެހޭ ކަމަށް އެ ކްލަބުން ބުނެފިއެވެ.

ޗެލްސީން ބުނީ އަނިޔާގެ ސަބަބުން ޗިލްވެލް އޮޕަރޭޝަން ކުރަން ޖެހޭ ކަމަށާއި، އެހެންކަމުން އޭނާ މި ސީޒަނުގައި ދެން ފެނުމުގެ އުންމީދު ކުޑަ ކަމަށެވެ.

ޗިލްވެލްއަށް އަނިޔާވީ ނޮވެމްބަރު މަހު ޗެމްޕިއަންސް ލީގުގައި ޔުވެންޓަސް އަތުން ޗެލްސީ 4-0 ގެ ނަތީޖާއަކުން މޮޅުވި މެޗުގައި ޔުވެންޓަސްގެ އެޑްރިއަން ރަބިއޯ އަތުން ބޯޅަ ހޯދަން އުޅުމުގެ ތެރޭގައެވެ.

އިނގިރޭސި މީޑިއާ ރިޕޯޓްތައް ބުނާ ގޮތުން ޗިލްވެލްގެ ކަކުލަށް ލިބުނު އަނިޔާއަށް ފަރުވާ ހޯދުމަށް ޗެލްސީން ފުރަތަމަ މަސައްކަތްކުރީ ރިހިބިލިޓޭޝަން ޕްރޮގްރާމުންނެވެ. އެކަމަކު ޗިލްވެލް ކޮވިޑަށް ޕޮޒިޓިވްވި އެ ޕްރޮގްރާމް ފެށުން ލަސްވިއެވެ. އަދި ރިހިބިލިޓޭޝަނުން މާބޮޑު ކުރިއެރުމެއް ނުފެނުމާއެކު އެންމެ ފަހުން ޗެލްސީން ނިންމީ އޭނާގެ އޮޕަރޭޝަން ކުރުމަށެވެ.

ރިޕޯޓްތަކުން ބުނާގޮތުގައި، މި ސީޒަންގައި ޗިލްވެލް އަށް ދެން ކުޅެވޭނެކަމުގެ އުންމީދު ފަނޑުވުމުން، ޗެލްސީގެ ކޯޗު ތޯމަސް ޓުޗެލް ދަނީ ޖެނުއަރީގެ ޓްރާންސްފާގައި ޑިފެންޑަރެއް ހޯދަން މަސައްކަތް ކުރަމުންނެވެ.

ލެސްޓާ ސިޓީން 50 މިލިއަން ޑޮލަރުގެ ޓްރާންސްފަރ ފީއެއްގައި ޗެލްސީއަށް ޗިލްވެލް ބަދަލުވީ މިދިޔަ ސީޒަނުގައެވެ. އެއީ ޗެލްސީގެ ކުރީގެ ކޯޗު ފްރޭންކް ލަމްޕާޑްގެ ކޯޗުކަމުގެ ދަށުގައެވެ.