ފެނާއި ނަރުދަމާގެ މަސައްކަތް ހަވާލުނުވެ ހުރި ރަށްރަށުގެ މަސައްކަތް ހަވާލުކޮށްފި
29 ޑިސެމްބަރު 2021 | ބުދަ 08:28މި ސަރުކާރުން ވެރިކަމާ ހަވާލުވިއިރު، ރާއްޖޭގެ 188 ރަށުގެ ތެރެއިން ފެނުގެ ނިޒާމު ޤާއިމުކޮށްފައިވަނީ 37 ރަށުގައި
23 ރަށެއްގެ ފެނާއި ނަރުދަމާގެ މަސައްކަތް ހަވާލުކުރުން
ރާއްޖޭގައި ފެނާއި ނަރުދަމާގެ މަސައްކަތް ނުފެށިވާ 23 ރަށުގެ މަސައްކަތް ކުރުމަށް ކޮންޓްރެކްޓަރުންނާ ހަވާލުކޮށްފިއެވެ.
އަލަށް ސޮއިކުރި ރަށްރަށާއެކު ފެނާއި ނަރުދަމާގެ ނިޒާމުގެ މަސައްކަތް ހަވާލުނުކުރެވޭ އެއްވެސް ރަށެއް މިހާރު ރާއްޖެއަކު ނޯންނާނެއެވެ. އަލަށް ސޮއިކޮށްފައިވަނީ 23 ރަށުގެ ފެނުގެ ނިޒާމު ޤާއިމުކުރުމާއި، 16 ރަށުގެ ނަރުދަމާގެ މަސައްކަތެވެ. މި 23 ރަށުގެ މަޝްރޫއަށް ސަރުކާރުން 920 މިލިއަން ރުފިޔާ ހޭދަކުރެއެވެ.
މި މަސައްކަތްތައް ހަވާލުކޮށްފައިވަނީ ފެނަކަ ކޯޕަރޭޝަން، ސްޓެލްކޯ، މާރކިޓެކް މޯލްޑިވްސް ޕްރައިވެޓް ލިމިޓެޑް، ޑްޕްލެކްސް ޕްރައިވެޓް ލިމިޓެޑް، ސާސް އީ ކޮންސްޓްރަކްޝަން ޕްރައިވެޓް ލިމިޓެޑަށެވެ.
މީގެ ތިން އަހަރުކުރިން މި ސަރުކާރުން ވެރިކަމާ ހަވާލުވިއިރު، ރާއްޖޭގެ 188 ރަށުގެ ތެރެއިން ފެނުގެ ނިޒާމު ޤާއިމުކޮށްފައިވަނީ 37 ރަށުގައެވެ. އަދި ނަރުދަމާ ނިޒާމު ގާއިމުކޮށްފައިވަނީ 69 ރަށުގައެވެ. އިންސައްތައިން ބަލާނަމަ ފެނުގެ ނިޒާމު ގާއިމުކޮށްފައިވަނީ 20 އިންސައްތަ ރަށުގައެވެ. އަދި ނަރުދަމާ އޮތީ 37 އިންސައްތަ ރަށުގައެވެ.
ފެން ނުވަތަ ނަރުދަމާ ނުވަތަ ފެނާއި ނަރުދަމާގެ އެއްވެސް މަސައްކަތްތެއް ނުފަށާ 141 ރަށް އޮތެވެ. މިދިޔަ 3 އަހަރުގެ ތެރޭގައި 48 ރަށުގެ ނަރުދަމާއާއި 60 ރަށުގެ ފެނުގެ ނިޒާމުގެ މަސައްކަތް ހަވާލުކޮށް ދަނީ ކުރަމުންނެވެ. މިހާތަނަށް 9 ރަށުގެ ނަރުދަމާއާއި 8 ރަށުގެ ފެނުގެ ނިޒާމުގެ މަސައްކަތް ނިމި، ރައްޔިތުންނަށްވަނީ ޚިދުމަތް ދޭން ފަށާފައެވެ.
ސަރުކާރުގެ ބަޖެޓާއި އިންޑިއަން އެގްޒިމް ބޭންކާ އޯޕެކް ފަންޑުގެ އެހީގައި 33 ރަށުގެ ނަރުދަމާ ނިޒާމުގެ މަސައްކަތާއި، 53 ރަށުގެ ފެނުގެ ނިޒާމުގެ މަސައްކަތްތައް ވެސް އެކި މަރުހަލާތަކުގައި މިހާރު ކުރިއަށްދެއެވެ.
ސަރުކާރުގެ 3 އަހަރުގައި ރަށްރަށުގައި ފެނާއި ނަރުދަމާ ނިޒާމު ގާއިމުކުރުމަށް 5.8 ބިލިއަން ރުފިޔާގެ މަޝްރޫއު މިހާތަނަށްވަނީ ހަވާލުކޮށްފައެވެ.
ސަރުކާރުގެ އަމާޒަކީ މި ދައުރު ނިމޭއިރު ފެނާ ނަރުދަމާގެ ހުރިހާ މަޝްރޫއެއް ނިންމުމެވެ.
