ކ.މާފުށްޓާއި އެރަށުގެ ފަޅުތެރެއިން ހިއްކި ބިން ގުޅާލުމަށް ބްރިޖު އެޅުމަށް އެމްޓީސީސީން ތައްޔާރުވެއްޖެއެވެ.

މާފުށްޓަށް އިތުރު ކުރުމަށް ހިއްކި ބިން އަދި ޕިކްނިކް އައިލެންޑް ހެދުމަށް ހިއްކި ބިން އެރަށު ކައުންސިލާ ހަވާލުކުރުމަށް ބޭއްވި ރަސްމިއްޔާތުގައި، މާފުށްޓާއި ހިއްކި ބިމާ ދޭތެރޭގައި އަޅާ ބްރިޖްގެ މަސައްކަތް ވެސް ވަނީ އެމްޓީސީސީއާ ހަވާލުކޮށްފައެވެ.

މި އެއްބަސްވުމުގައި ޕްލޭނިން މިނިސްޓްރީގެ ފަރާތުން ސޮއިކުރެއްވީ އެ މިނިސްޓްރީގެ ޕާމަނަންޓް ސެކްރެޓަރީ ޒީނިޔާ އަހްމަދު ހަމީދެވެ. އެމްޓީސީސީގެ ފަރާތުން މަޝްރޫއުގައި ސޮއިކުރެއްވީ އެ ކުންފުނީގެ ސީއީއޯ އާދަމް އާޒިމެވެ.

ޑިޒައިން އެންޑް ބިލްޑް އުސޫލުން މާފުށީ ފަޅުތެރޭގައި އަލަށް ހިއްކި ބިމާއި މާފުއްޓާއި ދެމެދު 20 މީޓަރު ފުޅާ، 137.64 މީޓަރު ދިގު ބްރިޖެއް ޤާއިމުކުރެވޭނެއެވެ. އެ ބްރިޖްގެ ކޮންކްރީޓް މަސައްކަތް ކުރުމާއި، ޕޭވިންގް މަސައްކަތް ކުރުމާއި، ޑްރެއިނޭޖް މަސައްކަތާއި، މެޓަލް މަސައްކަތާއި، ބައްތި ހަރުކުރުމާއި، މަގުމަތީ ނިޝާން ހަރުކުރުމުގެ މަސައްކަތް ވެސް ކުރިއަށްގެންދާނީ އެމްޓީސީސީންނެވެ.

އެމްޓީސީސީއަށް މަޝްރޫއު ހަވާލުކުރީ 35.41 މިލިއަން ރުފިޔާ އަށެވެ. މި މަސައްކަތް އެއް އަހަރު ދުވަހުގެ ތެރޭގައި ނިންމަން ޖެހެއެވެ. އެމްޓީސީސީން ވަނީ މާފުށި ފަޅުތެރެއިން 25 ހެކްޓަރުގެ ބިމެއް ހިއްކައި، 1،100 މީޓަރުގެ ސަރަހައްދެއްގައި ބޮޑުހިލައިގެ ރިވެޓްމަންޓް ޖެހުމުގެ މަސައްކަތް މިދިޔަ ސެޕްޓެމްބަރު މަހުގެ ތެރޭގައި ނިންމާފައެވެ.

އެމްޓީސީސީން ގެންދަނީ ރާއްޖޭގެ އުމްރާނީ ތަރައްގީގައި ބޮޑު ހިއްސާއެއް އަދާ ކުރަމުންނެވެ. ސަރުކާރުން ހަވާލުކުރާ މަޝްރޫއުތައް ބާރު ސްޕީޑުގައި އެ މުދަތުގެ ތެރޭގައި ނިންމުމަކީ ކުންފުނީގެ އަމާޒެކެވެ. އެމްޓީސީސީގެ އަހަރީ ދުވަހުގެ ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެފައިވަނީ ކުންފުނީގެ އަމާޒު ބޭރުގެ މަޝްރޫތަކާ ދިމާއަށް ދާން ޖެހޭކަމަށެވެ. އެކަމުގައި ކުންފުނީގެ ވިސްނުން ހުރި ކަމަށް ހަމަ އެ ޖަލްސާގައި ސީއީއޯ އާދަމް އާޒިމް ވަނީ ވިދާޅުވެފައެވެ.