މޯލްޑިވިއަން އޭވިއޭޝަން އެކެޑަމީ ހުޅުވައިފި
ފުރަތަމަ އިސްކަން ދެނީ އެކި ސަބަބުތަކާ ހުރެ ކޯސް މެދުކެނޑިފައިވާ ދަރިވަރުންނަށް
މޯލްޑިވިއަން އޭވިއޭޝަން އެކެޑަމީ ހުޅުވުމުގެ ރަސްމިއްޔާތުގެ ތެރެއިން ނާއިބުރައީސް ވާހަކަފުޅުދައްކަވަނީ
ވައިގެ ދަތުރުފަތުރުގެ ސިނާއަތުގެ ދާއިރާއިން މީހުން ބިނާކުރުމަށް މޯލްޑިވިއަން އޭވިއޭޝަން އެކެޑަމީ (އެމްއޭއޭ) ހުޅުވައިފިއެވެ.
އެމްއޭއޭ ރަސްމީކޮށް ހުޅުވާފައިވަނީ ދިވެހިރާއްޖޭގެ ގައުމީ ޔުނިވަރސިޓީގައި އަންގާރަ ދުވަހުގެ މެންދުރުފަހު ބޭއްވި ރަސްމިއްޔާތުގައެވެ. މި ރަސްމިއްޔާތުގައި ރައީސުލްޖުމްހޫރިއްޔާގެ ނާއިބު ފައިސަލް ނަސީމު ވަނީ ބައިވެރިވެވަޑައިގެންފައެވެ.
މޯލްޑިވިއަން އޭވިއޭޝަން އެކެޑަމީއަކީ، އައިލެންޑް އޭވިއޭޝަން ސަރވިސަސް ލިމިޓެޑާއި މޯލްޑިވްސް ނެޝަނަލް ޔުނިވަރސިޓީން، 30 އަހަރަށް ވުރެ ގިނަ ދުވަހުގެ ތަޖުރިބާ ހުރި ޗެކް ރިޕަބްލިކްގެ ޕްލައިން ސްކޫލެއް ކަމަށްވާ ފްލައިންގ އެކެޑަމީއާ ގުޅިގެން ހިންގާ ފްލައިންގ ސްކޫލެކެވެ. މި ސްކޫލްގައި ކިޔެވުމަށް ބޭނުންވާ ދަރިވަރުންނަށް މިއަދުން ފެށިގެން ކޯހަށް އެދި ހުށަހެޅުމުގެ ފުރުސަތު ހުޅުވާލާފައިވީ ނަމަވެސް ފުރަތަމަ އިސްކަން ދެނީ އެކި ސަބަބުތަކާ ހުރެ ކޯސް މެދުކެނޑިފައިވާ ދަރިވަރުންނަށެވެ.
ފްލައިން އެކެޑަމީ ގާއިމްކުރުމަށް ހަމަޖެހިފައިވަނީ އައްޑޫ ސިޓީ ގަމުގައެވެ. މި އެކެޑެމީ ހިންގުމުގެ މަސައްކަތް ކުރާނެ ބަޔަކު ހޯދުމަށް އޯޕަން ޓެންޑަރއަށް ހުޅުވާލުމުން މި މަސައްކަތަށް ޝައުގުވެރިކަން ފާޅުކުރި އެންމެ ރަނގަޅު އެކެޑެމީ ކަމަށް ފާހަގަކުރެވުނީ ޗެކް ރިޕަބްލިކްގެ އެކެޑެމީއެވެ. މި އެކެޑެމީގައި މިވަގުތު ވެސް ގިނަ އަދަދެއްގެ ދިވެހި ދަރިވަރުން އަންނަނީ ތަމްރީނުކުރަމުންނެވެ.
