މާފުށި ޕިކްނިކް އައިލެންޑާއި ހިއްކި ބިން ކައުންސިލާ ހަވާލުކޮށްފި
28 ޑިސެމްބަރު 2021 | އަންގާރަ 16:59ޕިކްނިކް އައިލެންޑުގެ ގޮތުގައި 2 ހެކްޓަރުގެ ބިން ހިއްކާފައިވޭ
ކ. މާފުށީގައި އަލަށް އިތުރުކުރެވުނު ބިމާއި ޕިކްނިކް އައިލެންޑް ކައުންސިލާ ހަވާލުކުރުމުގެ ރަސްމިއްޔާތު
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އިން ކ. މާފުށީގައި ތަރައްގީކުރި ޕިކްނިކް އައިލެންޑާއި ހިއްކި ބިން އެ ރަށު ކައުންސިލާ ހަވާލުކޮށްފިއެވެ.
މިކަމަށްޓަކައި ބޭއްވި ޚާއްސަ ރަސްމިއްޔާތުގައި ޕިކްނިކް އައިލެންޑާއި ހިއްކި ބިން ކައުންސިލާ ހަވާލުކޮށްދެއްވީ މިނިސްޓަރ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރކްޗަރ މުހައްމަދު އަސްލަމްއާއި، އެމްޓީސީސީގެ ސީއީއޯ އާދަމް އާޒިމްއެވެ. މާފުށީ ކައުންސިލްގެ ފަރާތުން، މި ހިއްކި ބިމާއި ޕިކްނިކް އައިލެންޑާ ހަވާލުވެވަޑައިގެންނެވީ މާފުށި ކައުންސިލްގެ ރައީސް ހަސަން ސަލާހެވެ.
ބިން ހިއްކުމުގެ މަސައްކަތުގެ އެއްބަސްވުމުގައި ސަރުކާރާއި އެމްޓީސީސީއާ ދެމެދު ސޮއިކޮށްފައިވަނީ 2019 ވަނަ އަހަރުގެ އޮގަސްޓު 27 ވަނަ ދުވަހުއެވެ. މި މަޝްރޫއުގެ ދަށުން، 25 ހެކްޓަރުގެ ބިން ހިއްކުމާއި 1،100 މީޓަރުގެ ބޮޑުހިލައިގެ ރިވެޓްމެންޓް ޖެހުމުގެ މަސައްކަތް ކޮށްފައިވެއެވެ. މިއީ 118.07 މިލިއަން ރުފިޔާގެ މަޝްރޫއެކެވެ.
މާފުށި ޕިކްނިކް އައިލެންޑްގެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއުގެ އެއްބަސްވުމުގައި ސޮއިކޮށްފައިވަނީ މިއަހަރުގެ މާޗް މަހުގެ 29 ވަނަ ދުވަހުއެވެ. މި މަޝްރޫއުގެ ދަށުން، 2 ހެކްޓަރުގެ ބިން ހިއްކުމާއި 250 މީޓަރުގެ ސަރަހައްދެއްގައި ރިވެޓްމެންޓް ޖެހުމުގެ މަސައްކަތް ކޮށްފައިވެއެވެ. މިއީ 10.98 މިލިއަން ރުފިޔާގެ މަޝްރޫއެކެވެ.
މި ބޮޑު މަޝްރޫއާ ގުޅޭގޮތުން ވާހަކަދައްކަވަމުން މާފުށީ ކައުންސިލްގެ ރައީސް ހަސަން ސަލާހު ވިދާޅުވީ، މާފުށީ ރައްޔިތުންނަށް ދިމާވެފައިވާ އެންމެ ބޮޑު އެއް މައްސަލައަކީ ބޯހިޔާވަހިކަމުގެ މައްސަލަކަމަށެވެ. މާފުށީ ރައްޔިތުން ތިބީ ގޯތި ބޭނުންވެފައިކަމަށާއި، އެހެންނަމަވެސް ގޯތި ދޫކުރާނެ ޖާގައެއް މާފުށީގައި ނެތް ކަމަށެވެ. އަދި ލޭންޑް ޔޫސް ޕްލޭންއެއްވެސް ނެތް ކަމަށާއި، ޚިދުމަތްތައްވެސް މަދުކަމަށް ސަލާހު ވިދާޅުވިއެވެ.
ސަލާހު ވިދާޅުވީ މި ސަރުކާރުން މާފުށީ ރައްޔިތުންގެ ކަންބޮޑުވުންތައް އަޑުއަހާފައިވާކަމަށެވެ. އެގޮތުން ބޯހިޔާވަހިކަމުގެ މައްސަލަ ހައްލުކޮށްދިނުމަށް ބިން ހިއްކައިދީފައިވާކަމަށާއި، އަދިވެސް ބޭނުންވާ އެތައް ޚިދުމަތެއް ގާއިމްކޮށްދީފައިވާކަމަށް ސަލާހު ވިދާޅުވިއެވެ.
ސަލާހު ވިދާޅުވީ ޕިކްނިކް އައިލެންޑް ތަރައްގީކޮށްފައިވާ ސަރަހައްދަކީ މީގެ ކުރިން "ވަށް މާފުށި" އޮތް ތަން ކަމަށެވެ. 2004 ވަނަ އަހަރު ރާއްޖެއަށް އެރި ސުނާމީގައި ވަށް މާފުށި އެއްކޮށް ނެތިދިޔައީކަމަށެވެ. ވަށް މާފުށި އަލުން ވުޖޫދަށް ގެނައުމަށް މާފުށީ ރައްޔިތުން ބޭނުންވާ ކަމަށާއި، މިކަން މި ސަރުކާރުން ކޮށްދިނުމީ ލިބުނު ވަރަށް ބޮޑު އުފަލެއް ކަމަށް ސަލާހު ވިދާޅުވިއެވެ.
