އެސްޓީއޯގެ އެޖެންޓަކަށްވުމުގެ ފުރުސަތު ހުޅުވާލައިފި

އެސްޓީއޯ ޕީޕަލްސް ޗޮއިސްއިން ރާއްޖެ އެތެރެކޮށްގެން ވިއްކާ ބްރޭންޑުތަކުގެ މުދާ ޕްރޮމޯޓްކޮށް، އެސްޓީއޯގެ ބްރޭންޑް އެޖެންޓެއްގެ ގޮތުގައި ރާއްޖޭގެ ހުރިހާ އަތޮޅުތަކެއްގައި އެ މުދާ ވިއްކާ ޑިސްޓްރިބިއުޓް ކޮށްދޭނެ އެޖެންޓުން ހޯދުމަށް އެސްޓީއޯއިން ހުޅުވާލައިފިއެވެ.

ރާއްޖޭގެ ހުރިހާ އަތޮޅެއްގައި މަސައްކަތް ކުރާނެ އެޖެންޓުން ހޯދުމަށް ހުޅުވާލާފައި ވާއިރު، އެޖެންޓުގެ ގޮތުގައި ބަލައިގަނެވޭނީ މިނިސްޓްރީ އޮފް އިކޮނޮމިކްސް ޑިވެލޮޕްމެންޓްގައި ރަޖިސްޓްރީކޮށްފައިވާ ވިޔަފާރިތަކެވެ. އެޖެންޓުކަމުގެ ގޮތުގައި ކަނޑައެޅޭ ފަރާތުން، އެސްޓީއޯގެ ޕީޕަލްސް ޗޮއިސްގެ ބުރޭންޑްތައް ވިއްކުމުގެ މަސައްކަތްކުރަންވާނީ އެފަރާތްތަކަށް ކަނޑައެޅިފައިވާ އަތޮޅުގައެވެ. އެހެންނަމަވެސް އެޖެންޓުން ނެތް އަތޮޅުތަކަށް މުދާވިއްކިދާނެއެވެ.

އަދި އެޖެންޓާ ހަވާލު ކުރެވިފައިވާ އަތޮޅުގެ މާކެޓް ދިރާސާކޮށް، ޑިމާންޑްއަށާއި އަގަށް އަންނަ އެންމެހާ ބަދަލުތައް އެސްޓީއޯއާ ހިއްސާކުރުމާއެކު މާކެޓް ހޯދުމުގައި އެސްޓީއޯއަށް މިފަރާތްތަކުން އެހީތެރިކަން ފޯރުކޮށްދޭން ޖެހޭނެއެވެ. އެސްޓީއޯގެ އެޖެންޓުންގެ ގޮތުގައި ހަމަޖެހޭ ފަރާތްތަކަށް، އެޖެންޓުންނަށް ހާއްސަ އަގުތަކެއް ހަމަޖައްސައި ދެވޭނެއެވެ.

އެޖެންޓުން ނަގާނީ ދެ ކެޓަގަރީއަކަށެވެ. އެއީ އޮންލައިން ވިޔާފަރި ކުރާ ފަރާތްތައް އަދި ފިހާރަ ހިންގާ ފަރާތްތަކެވެ. އެޖެންޓުން ނަގާއިރު އެސްޓީއޯއާ އެކު މިހާރު ވެސް ވިޔަފާރި ކުރާ ފަރާތްތަކަށް އިސްކަންދެވޭނެއެވެ.

އެސްޓީއޯގެ ބްރޭންޑް އެޖެންޓްކަމަށް ކުރިމަތިލުމުގެ ފުރުސަތު ހުޅުވާލާފައިވަނީ 2022 ވަނަ އަހަރުގެ ޖެނުއަރީ މަހުގެ 31 ވަނަ ދުވަހުގެ ނިޔަލަށެވެ.

އެސްޓީއޯއިން ބުނީ އެޖެންޓުން އައްޔަންކުރުމުގެ މައިގަނޑު މަޤްޞަދަކީ އެސްޓީއޯ ޕީޕަލްސް ޗޮއިސް އިން ވިއްކާ މުދާ ރާއްޖޭގެ ހުރިހާ ރަށެއްގައި ފަސޭހަ ކަމާއެކު ފޯރުކޮށްދީ، ދިވެހިރާއްޖޭގައި ހިންގާ ކުދި އަދި މެދު ފަންތީގެ ވިޔަފާރިތައް ފުޅާކުރުމުގެ ފުރުސަތު ހޯދައިދިނުން ކަމަށެވެ.