އައު އަހަރާ ގުޅުވައިގެން ބުރާސްފަތި ދުވަހު ބީއެމްއެލް ބަންދުކުރަނީ

އައު އަހަރާ ގުޅުވައިގެން މިއަންނަ ބުރާސްފަތި ދުވަހު ބޭންކް އޮފް މޯލްޑިވްސް (ބީއެމްއެލް) ބަންދުކުރުމަށް ނިންމައިފިއެވެ.

ބީއެމްއެލްއިން އާންމުކުރި ދެންނެވުމެއްގައި ބުނެފައިވަނީ 30 ޑިސެމްބަރ 2021 ވާ ބުރާސްފަތި ދުވަހު ބޭންކުގެ ބްރާންޗުތަކާއި ސަރވިސް ސެންޓަރުތައް ބަންދުވާނެ ކަމަށެވެ. އެއަށްފަހު ދެން ބޭންކު ހުޅުވޭނީ 2022 ވަނަ އަހަރުގެ ޖެނުއަރީ މަހުގެ ދެވަނަ ދުވަހު ކަމަށެވެ.

ބީއެމްއެލްއިން ބުނީ މި މުއްދަތުގައި މޮބައިލް އަދި އިންޓަރނެޓް ބޭންކިންގ އާއި ސެލްފް ސަރވިސް އޭޓީއެމް މެދުވެރިކޮށް ބޭންކިންގ ޚިދުމަތްތައް ހޯދޭނެކަމަށެވެ.

އިންޓަރނެޓް ބޭންކިންގ މެދުވެރިކޮށް މި މުއްދަތުގައި ޚިދުމަތްތައް ލިބޭނެކަމަށް ބީއެމްއެލްއިން ބުނެފައި ވާއިރު، ހޯމަ ދުވަހުގެ ރޭ ވެސް އިންޓަރނެޓް ބޭންކިންގެ ޚިދުމަތަށް ވަނީ ބުރޫއަރާފައެވެ. މިފަހަކަށް އައިސް ބީއެމްއެލްގެ އިންޓަރނެޓް ބޭންކިންގ ޚިދުމަތް ލިބިގަތުމުގައި ކަސްޓަމަރުންނަށް ވަނީ ގިނަ ދަތިތަކަކާ ކުރިމަތިލާން ޖެހިފައެވެ.

ކޮންމެ އަހަރެއްގެ ވެސް ފަހު ދުވަހާ ގުޅުވައިގެން ބީއެމްއެލް އަންނަނީ ބަންދު ކުރަމުންނެވެ. މިއަހަރުގެ ބުރާސްފަތި ދުވަސް ބަންދުކޮށްފައިވަނީ 31 ޑިސެމްބަރަކީ ހުކުރު ދުވަހަށް ވާތީއެވެ. އަހަރުގެ ފަހު ދުވަހާ ދިމާކޮށް ބޭންކުތައް ބަންދުކުރަނީ އޮޑިޓް ކުރުމަށެވެ.