މިފަހަރުގެ ނިއު އިޔަރ ޝޯވ އަންކިތުއާއެކު

ބޮލީވޫޑްގެ މަޝްހޫރު ލަވަކިޔުންތެރިޔާ އަންކިތު ތިވާރީއާއެކު އައު އަހަރަށް މަރުހަބާ ކިޔާ ޝޯވ ބޭއްވުމަށް ތައްޔާރުވެއްޖެއެވެ.

"މަރުހަބާވީސް"ގެ ނަމުގައި މި އަހަރު ބާއްވަން ނިންމާފައިވާ ޝޯވ އޮންނާނީ މި މަހުގެ 31 ވަނަ ދުވަހުގެ ރޭ 8:30ގައި ހުޅުމާލޭ ދުވާ ޓްރެކްގައެވެ. މިކަން އިއުލާންކުރައްވަމުން ޔޫތު މިނިސްޓަރ އަހުމަދު މަޚުލޫފް ކުރެއްވި ޓްވީޓެއްގައި ވަނީ، އަންކިތުއާއެކު ދިވެހި ފަންނާނުންވެސް މިޝޯވގައި ލަވަތައް ހުށަހަޅައިދޭނެކަމަށެވެ.

މި ޝޯއަކީ ޔޫތު މިނިސްޓްރީއާއި ޓޫރިޒަމް މިނިސްޓްރީ ގުޅިގެން އުރީދޫ، ދިރާގު، މޯލްޑިވިއަން، ފެނަކަ ކޯޕަރޭޝަން، އެމްޓީސީސީ، މޯލްޑިވްސް ޕޯޓްސް ލިމިޓެޑް، އެމްޑަބްލިއުއެސްސީ، ސްޓެލްކޯ އަދި އެސްޓީއޯ ބައިވެރިވުމާއެކު ބާއްވާ ޝޯއެކެވެ.

އަންކިތު ލަވަކިޔަން ފަށާފައިވަނީ 2010 ވަނަ އަހަރުއެވެ. އެއީ އެއަހަރު ނެރުނު ހިންދީ ފިލްމު ދޯ ދުނީ ޗާރުއަށް ކިޔައިދީފައިވާ ލަވައިންނެވެ.

އަންކިތުގެ އަޑު ބޮލީވުޑުގައި ގަދަވެގެން ދިޔައީ އޭނާ 2014 ވަނަ އަހަރު ބެލުންތެރިންގެ މަގުބޫލުކަން ހޯދި "އޭކް ވިލަން"އަށް ކިޔައިދިން "ގަލިޔާން" ލަވައިންނެވެ. މި ލަވަ ފިލްމު ފެއާ އެވޯޑްސްގެ ދެ ނޮމިނޭޝަނަކަށްވެސް ވަނީ ހޮވިފައެވެ.