ސިޔާސީ ދަހިވެތިކަމުގައި އަވައްޓެރި ގައުމުތަކާމެދު ނަފްރަތު އުފައްދައި، އެގައުމުތަކާއެކު އޮތް ގުޅުން ހީނަރުވާފަދަ ނޭއްގާނީ އަމަލުތައް ނުކުރުމަށް ސަރުކާރު ކޯލިޝަންގައި ހިމެނޭ މޯލްޑިވްސް ރިފޯމް މޫވްމެންޓް (އެމްއާރްއެމް) އިން ގޮވާލައިފިއެވެ.

އެއްބައިވަންތަކަމުގެ ދުވަހާ ގުޅިގެން އެމްއާރްއެމްއިން ނެރުނު ބަޔާނުގައި ވަނީ 2004 ވަނަ އަހަރުގެ ޑިސެމްބަރު 26 ވަނަ ދުވަހު ދިވެހިންނާ ކުރިމަތިލާންޖެހުނު ސުނާމީ ކާރިސާއަކީ އަވައްޓެރި ގައުމުތަކާއެކު އޮތް ގުޅުމާއި، އެ ގުޅުން ހީނަރު ވިޔަނުދީ ދެމެހެއްޓުމުގެ މުހިންމުކަން ހާމަވެގެންދިޔަ ކަމެއް ކަމަށެވެ. އެހެންކަމުން އަވައްޓެރި ގައުމުތަކާމެދު ނަފްރަތު އުފައްދައި، އެ ގައުމުތަކާއެކު އޮތް ގުޅުން ހީނަރުވާފަދަ ނޭއްގާނީ އަމަލުތައް ނުކުރުމަށް ދިވެހި ރައްޔިތުންނަށް އެމްއާރްއެމްއިން ވަނީ ގޮވާލާފައެވެ.

އަދި އަވައްޓެރި ގައުމުތަކުގެ ރައްޔިތުންނަށް، ޚާއްސަކޮށް ރާއްޖޭގެ ތަރައްގީގެ މުހިންމު ހިއްސާދާރުންތަކެއް ކަމަށްވާ ބިދޭސީ މަސައްކަތްތެރިންނަށް އިހުތިރާމްކޮށް، އޯގާތެރިކަމާއެކު އެމީހުންނާމެދު އަމަލުތައް ބެހެއްޓުމަށް އެޕާޓީން އިލްތިމާސްކޮށްފައިވެއެވެ. އަދި ސުނާމީ ކާރިސާފަދަ ކޮންމެ ކާރިސާއެއްގައި އަވައްޓެރި ގައުމުތަކުން ރާއްޖެއަށް ފޯރުކޮށްދޭ އެހީތެރިކަމަށް އެމްއާރްއެމްއިން ވަނީ ޝުކުރުއަދާކޮށްފައެވެ.

ދޭދޭ ގައުމުތަކުގެ ގުޅުން ހީނަރު ވެދާނެފަދަ ކަމެއް ނުކުރުމަށް އެމްއާރްއެމްއިން ގޮވާލާފައިވާއިރު، އިދިކޮޅު ޕީޕީއެމް/ޕީއެންސީ ކޯލިޝަނުން ގެންދަނީ "އިންޑިއާ އައުޓް"ގެ ނަމުގައި ހަރަކާތެއް ކުރިއަށްގެންދަމުންނެވެ. މާލެ ސަރަހައްދުން ފެށި މި ހަރަކާތް މިހާރު ގެންދަނީ އަތޮޅުތެރޭގެ އެކި ސަރަހައްދުތަކުގައި ކުރިއަށްގެންދަމުންނެވެ. އަދި މި ހަރަކާތް ކުރިއަށްގެންދަނީ ކުރީގެ ރައީސް ޔާމީން އިސްވެ ހުންނަވައިގެންނެވެ.

މި ހަރަކާތް ސަރުކާރު ހިންގާ ކޯލިޝަންގެ ޕާޓީތަކުން ގެންދަނީ ކުށްވެރިކުރަމުންނެވެ. މިގޮތުން ސަރުކާރު ހިންގާ ޕާޓީ އެމްޑީޕީއިން ވެސް މިކަން ކުށްވެރިކޮށްފައިވާއިރު، އެމްޑީޕީގެ ރައީސް މުހައްމަދު ނަޝީދު ވަނީ ކުރީގެ ރައީސް އަބްދުﷲ ޔާމީނަށް ޓީޝާޓްގައި "އިންޑިޔާ އައުޓް" ޖައްސަވައިގެން ބޭރަށް ނިކުމެވަޑައިގެން އެގޮތަށް ނުހިންގެވޭނެކަމަށް ވިދާޅުވެފައެވެ. އެއީ ކަނޑައެޅިގެން ރާއްޖޭގެ މަސްލަހަތާ ޚިލާފު ކަމެއްކަމަށާއި، ރާއްޖޭގެ އެކި ތަންތަނުގައި އެކި ސަރަހައްދުތަކުގައި އެހެން ގޮވަމުން ނުދެވޭނެކަމަށް ރައީސް ނަޝީދު ވިދާޅުވިއެވެ. ތަހުޒީބު ޑިމޮކްރަސީއެއްގައި އެކަން އެގޮތަށް ނުހިނގާނެކަމަށާއި، ރާއްޖޭގެ ފުލުހުން އެކަން ހުއްޓުވަން ޖެހޭކަމަށް ރައީސް ނަޝީދު ވިދާޅުވިއެވެ.

މީގެ އިތުރުން ކޯލިޝަންގައި ހިމެނޭ އަދާލަތު ޕާޓީ އަދި ޖުމްހޫރީ ޕާޓީއިން ވެސް ވަނީ މިކަން ކުށްވެރިކޮށްފައެވެ. މިއީ ސިޔާސީ މަޤްޞަދެއް ހާސިލްކުރުމަށް ރައީސް ޔާމީން އިސްވެ ހުންނަވައި ހިންގަވާ ވަރަށް ނޭއްގާނީ އަމަލެއް ކަމަށް ޕާޓީތަކުން ގެންދަނީ ބުނަމުންނެވެ.