އަފްޣާނިސްތާނުގައި ކުރިން ގާއިމުކޮށްފައިވާ ސަރުކާރުތަކުން އެކުލަވާލާފައިވާ އިލެކްޝަން ކޮމިޝަން އަފްޣާނިސްތާނުގައި މިހާރު ވެރިކަން ކުރަމުން އަންނަ ތާލިބާނުން އުވާލައިފިއެވެ.
އަފްޣާނިސްތާނު ސަރުކާރުގެ ސްޕޯކްސްމަން ބިލާލް ކަރީމީ ވިދާޅުވީ އެކޮމިޝަންތައް އުފައްދައިގެން މަސައްކަތްތައް ކުރުމުގެ ބޭނުމެއް މިހާރު ނެތްކަމަށެވެ. ބިލާލް އިޝާރާތްކުރެއްވި ކޮމިޝަންތަކަކީ އިންޑިޕެންޑެންޓް އިލެކްޝަން ކޮމިޝަން (އައިއީސީ) އާއި އިންޑިޕެންޑެންޓް އިލެކްޓޯރަލް ކޮމްޕްލެއިންޓްސް ކޮމިޝަނެވެ.
އެކޮމިޝަންތަކުގެ ބޭނުން ޖެހިއްޖެނަމަ އެކޮމިޝަންތައް އުފައްދާނެކަމަށްވެސް ސްޕޯކްސްމަން ވިދާޅުވިއެވެ.
ތާލިބާނުން އަފްޣާނިސްތާނުގެ ވެރިކަމަށް އައީ އޮގަސްޓްމަހުއެވެ. އެއީ އަފްޣާނިސްތާނުގައި 20 އަހަރު ވަންދެން ތިބި އެމެރިކާ ސިފައިން އެގައުމުން ފޭބުމުގެ އެންމެ ފަހު މަރުހަލާގެ ކަންކަން ކުރިޔަށްދަނިކޮށެވެ.
2006 ވަނަ އަހަރު އުފައްދާފައިވާ އިންޑިޕެންޑެންޓް އިލެކްޝަން ކޮމިޝަނުން އަފްޣާނިސްތާނުގައި ބާއްވާ ހުރިހާ އިންތިޚާބުތަކެއް ކުރިޔަށް ގެންގޮސް ސުޕަރވައިޒް ކުރަމުން ގެންގޮސްފައިވެއެވެ. އޭގެތެރޭގައި ރިޔާސީ އިންތިޚާބުވެސް ހިމެނެއެވެ.
އިންޑިޕެންޑެންޓް އިލެކްޝަން ކޮމިޝަންގެ ވެރިޔަކަށް ކުރިން ހުންނެވި އައުރަންގްޒަބް ވިދާޅުވީ ތާލިބާނުން ނިންމި މިނިންމުމަކީ އަވަސް އަރުވާލައިގެން ނިންމި ނިންމުމެއްކަމަށެވެ. އަދި އެކަމުގެ ސަބަބުން ދެން ކުރިމަތިވާނެ މައްސަލަތަކެއް ހުންނާނެކަމަށް އައުރަންގްޒަބް ވިދާޅުވިއެވެ.
އައުރަންގްޒަބް އިތުރަށް ވިދާޅުވީ އިންތިޚާބުތައް ބޭއްވުމުގެ ނިޒާމު ނޯންނަ ނަމަ އަފްޣާނިސްތާނުގައި ހުރި މައްސަލަތަކަށް ދުވަހަކުވެސް ހައްލެއް އަންނާނެކަމަށް ގަބޫލުނުކުރައްވާކަމަށެވެ.
އަފްޣާނިސްތާނުގެ ކުރީ ސަރުކާރުގައި އިސްވެރިއެއްގެ ގޮތުގައި މަސައްކަތްކުރެއްވި ހާލިމް ފިދާއީ ވިދާޅުވީ އިލެކްޝަން ކޮމިޝަން އުވާލުމުން އޭގެން ދޭހަކޮށްދޭ އެއްޗަކީ ތާލިބާނުން ޑިމޮކްރަސީ ގަބޫލުނުކުރާކަން ކަމަށެވެ. ތާލިބާނުންނަކީ ޑިމޮކްރަޓިކް ނިޒާމުގެ ދަށުން އުފައްދާފައިވާ ހުރިހާ މުއައްސަސާތަކާއި ދެކޮޅު ބައެއް ކަމަށާއި ތާލިބާނުން ވެރިކަމަށް އައީ ބަޑީގެ އުންޑައިގެ ބާރުގައި ކަމަށާއި ވޯޓު ކަރުދާހުން ނޫންކަމަށް ފިދާއީ ވިދާޅުވިއެވެ.
އަފްޣާނިސްތާން ސަރުކާރުގެ ސްޕޯކްސްމަން އިތުރަށް ވިދާޅުވީ އިތުރު ދެ މިނިސްޓްރީއެއް ސަރުކާރުން އުވާލާފައިވާކަމަށެވެ. އެ ދެ މިނިސްޓްރީ އަކީ މިނިސްޓްރީ އޮފް ޕީސް އާއި މިނިސްޓްރީ އޮފް ޕާލަމަންޓްރީ އެފެއަރޒްއެވެ.
ތާލިބާނުން ވެރިކަމަށް އައުމާއެކުހެން ވަނީ މިނިސްޓްރީ އޮފް ވިމެންސް އެފެއަރޒްވެސް އުވާލާފައެވެ.
