އިމަރޖެންސީ ހާލަތުގައި އުމުރުން 12-18 އަހަރާ ދެމެދުގެ ކުދިންނަށް އިންޑިއާގެ ކޮވެކްސިން ދިނުމުގެ ހުއްދަ ދީފިއެވެ.

ކޮވެކްސިނަަށް ހުއްދަ ދީފައި މިވަނީ އުމުރުން 15-18 އަހަރާ ދެމެދުގެ ކުދިންނަށް ވެކްސިން ދޭން ފެށުމަށް އިންޑިއާގެ ބޮޑު ވަޒީރު ނަރެންދްރަ މޯދީ އިއުލާން ކުރެއްވިތާ މާ ގިނަ އިރުތަކެއް ނުވެއެވެ.

ސިއްޙީ ދާއިރާގައި މަސައްކަތް ކުރާ މީހުންނާއި، ސިއްޙީ ޚިދުމަތްތެރިންނަށް ބޫސްޓަރ ޑޯޒް ދިނުމަށް ޖެނުއަރީ މަހުގެ 10 ވަނަ ދުވަހު ފެށުމަށް އިންޑިއާގެ ސަރުކާރުންވަނީ ނިންމާފައެވެ. އަދި އުމުރުން 15-18 އަހަރާ ދެމެދުގެ ކުދިންނަށް ޖެނުއަރީ 3 ވަނަ ދުވަހުން ފެށިގެން ވެކްސިން ދޭން ފަށާނެއެވެ. އަދި ޑޮކްޓަރުންގެ އިރުޝާދާއެކު އުރުން 60 އަހަރުން މަތީގެ މީހުންނަށް ބޫސްޓަރ ޑޯޒް ދޭން ފަށާނެއެވެ.

އިންޑިއާގައި ވެކްސިން ޕްރޮގްރާމް ހަލުވި ކަމާއެކު ކުރިއަށް ގެންދާއިރު، ފުރަތަމަ ޑޯޒް ޖަހާފައިވަނީ ވެކްސިން ޖެހޭ އާބާދީގެ 88 އިންސައްތައެވެ. އަދި 61 އިންސައްތަ މީހުންވަނީ ދެ ޑޯޒް ފުރިހަމަ ކޮށްފައެވެ.

އައު ވޭރިއަންޓްގެ ކަންބޮޑުވުމާއެކު މާސްކް އެޅުމަށް އިންޑިއާގައި ވެސް ދަނީ ބާރު އަޅަމުންނެވެ.