ހިޔާ ފްލެޓްތަކުގެ ކުލި ފަސްކުރުމާމެދު ފެށޭ ހަފުތާ ތެރޭގައި ގޮތެއް ނިންމާނެ!
25 ޑިސެމްބަރު 2021 | ހޮނިހިރު 09:45ހުކުރު ދުވަހު ހިޔާ ފްލެޓް ސަރަހައްދުގައި މުޒާހަރާކޮށްފައިވޭ
ހިޔާ ފްލެޓްތައް،
ހުޅުމާލެ ދެވަނަ ފިޔަވަހީގައި އަޅާފައިވާ ހިޔާ ފްލެޓްތަކުގެ ފިނިޝިންގ މަސައްކަތްތަކަށް ދީފައިވާ މުއްދަތު އިތުރުކޮށްދިނުމަށް ހުށަހަޅާފައިވާ ހުށަހެޅުމަށް ޖަވާބެއް ލިބިފައިނުވާތީ ރައްޔިތުން ކަންބޮޑުވުންފާޅު ކުރަން ފަށައިފިއެވެ.
ހިޔާ ފްލެޓްތަކުގައި ދިރިއުޅެމުންދާ ބައެއް އާއިލާތަކުން ބުނެފައިވަނީ ފިނިޝިންގ މަސައްކަތްތަކަށް ދީފައިވާ މުއްދަތު އިތުރުކޮށްދިނުމަށް އެދިފައިވާ ކަމަށާއި، ނަމަވެސް މިއަދާ ހަމައަށް ވެސް ޖަވާބެއް ސަރުކާރުގެ ފަރާތުން ލިބިފައިނުވާ ކަމަށެވެ. އެކަމާއި ގުޅިގެން ހުކުރު ދުވަހުގެ ހަވީރުގެ ވަގުތުގައި ހިޔާ ޔޫނިއަންގެ ފަރާތުން ބައްދަލުވުމެއް ބާއްވައި ހިޔާ ފްލެޓްތަކުގެ ސަރަހައްދުގައި މުޒާހަރާކޮށްފައިވެއެވެ.
ހިޔާ ޔޫނިއަނުން ބުނީ ސަރުކާރު އުފެދެނީ ރައްޔިތުންގެ ކިބައިން ކަމަށާއި، ރައްޔިތުންގެ އަޑު އަހަން ޖެހޭ ކަމަށެވެ. އަދި މިމައްސަލާގައި ރައްޔިތުން އެދޭ ގޮތަށް ނިންމައި ދިނުމަށް އެދިފައިވެއެވެ.
މިމައްސަލައާ ގުޅިގެން އެންމެ ފަހުން ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ން ބުނީ، ފްލެޓްތަކުގެ ފިނިޝިންގ މަސައްކަތްތައް އިތުރުކޮށްދިނުމަށް ވަރަށް ގިނަ ބަޔަކު އެދެމުންދާތީ ސަރުކާރާ މަޝްވަރާ ކުރަމުންދާ ކަމަށާއި، އަދި ވަކި ގޮތެއް ނުނިންމާ ކަމަށެވެ. އަބަދުވެސް މަސައްކަތް ކުރަނީ ރައްޔިތުންނަށް ލުއި ފަސޭހަވާނެ ގޮތަށް އިންތިޒާމްތައް ހަމަޖެއްސުމަށް ކަމަށެވެ.
މައުލޫމާތު ލިބޭ ގޮތުގައި މިމައްސަލާގައި ގޮތެއް ނިންމުމަށް ހަމަޖެހިފައިވަނީ މިފެށޭ ހަފުތާ ތެރޭގައެވެ.
ފްލެޓްތަކުގެ ފިނިޝިންގެ މަސައްކަތްތަކަށް ދިން މުއްދަތު މިމަހުގެ ނިޔަލަށް ހަމަވާނެ އެވެ. މުއްދަތު އިތުރުކޮށްދިނުމަށް ގިނަ ބަޔަކު އެދެމުންދަނީ ބައެއް ސާމާނު ލިބުމުގައި ދަތިތައް ހުރުމާއި، މާލީ ގޮތުން ތަނަވަސްކަން ނެތުމުގެ ސަބަބުންނެވެ.
ހިޔާ މަޝްރޫއުގެ ފްލެޓްތަކުގެ މަސައްކަތް ހަވާލު ކުރެވުނު ކޮންޓްރެކްޓަރާ އެކު އެތަނުގެ ފިނިޝިންގ މަސައްކަތް ކުރުމަށް އެއްބަސްވެވިފައެއް ނުވެއެވެ. އެހެންކަމުން، މި ތަންތަން އާންމުންނާ ހަވާލު ކުރެވިފައިވަނީ ފިނިޝިންގ މަސައްކަތް ނުނިންމައެވެ. އެހެންކަމުން ފްލެޓްތަކުގައި މުށިޖެހުމާއި، ކުލަލުމާއި، ބަދިގެ ކަބަޑުސެޓު ޖެހުމާއި، ފަންކާއާއި ބޮކިވެސް ހަރުކުރަންޖެހޭނީ ފްލެޓްތަކުގެ ވެރިންގެ ޚަރަދުގައި އަމިއްލައަށެވެ. އެގްރިމެންޓްގައި ސޮއިކުރުމަށްފަހު ފުރަތަމަ ތިން މަސް ދިނީ ފިނިޝިންގ މަސައްކަތްތައް ކުރުމަށެވެ. މި މުއްދަތުގައި އެއްވެސް ކުއްޔެއް ނުނަގާގޮތަށް ސަރުކާރުންވަނީ ލުއި ދީފައެވެ.
މިހާތަނަށް އައިރު ގާތްގަނޑަކަށް 1500 މީހުން ވަނީ ދިރިއުޅެން ފަށާފައެވެ. ނަމަވެސް އާބާދުވަމުންދާ ސަރަހައްދަކަށްވާތީ، ގިނަ ދަތިތައް ކުރިމަތިވަމުންދާ ކަމަށް އެސަރަހައްދުގައި ދިރިއުޅެމުންދާ މީހުން ބުނެއެވެ.
ހިޔާ ފްލެޓްތަކުގެ ކުއްޔަކީ މަހަކު 7,500 ރުފިޔާއެވެ. އަދި ފްލެޓްގެ މެނޭޖްމެންޓް ފީގެ ގޮތުގައި ކޮންމެ މަހަކު 1,000 ރުފިޔާ ނަގާނެއެވެ. ފްލެޓްތަކަށް ފައިސާ ދައްކާ ޚަލާސް ކުރަން ޖެހޭނީ 25 އަހަރުގެ މުއްދަތަށް ބަހާލައިގެންނެވެ.
