ފާދިއްޕޮޅު މަޑިވަރު އެއާޕޯޓަށް ޓެސްޓް ފްލައިޓު ޖައްސައިފި

ޅ.މަޑިވަރުގައި ތަރައްގީކޮށްފައިވާ އެއާޕޯޓަށް ޓެސްޓު ފްލައިޓު ޖައްސައިފިއެވެ.

ހޮނިހިރު ދުވަހުގެ ހެނދުނު އެ އެއާޕޯޓަށް ޖައްސާފައިވަނީ ގައުމީ އެއާލައިން، މޯލްޑިވިއަންގެ ފްލައިޓެކެވެ. އެ ފްލައިޓުން ބައެއް ވަޒީރުންނާއި، ބައެއް ކުންފުނިތަކުގެ އިސްވެރިން ވަޑައިގެންނެވިއެވެ.

މޯލްޑިވިއަން ހިންގާ އައިލެންޑް އޭވިއޭޝަނާ މަޑިވަރު އެއާޕޯޓު ހިންގަން ހަވާލު ކުރުމުގެ މަޝްވަރާތައް މީގެ ކުރިން ކުރި ނަމަވެސް އެއާޕޯޓު ހިންގަން ސީދާ ހަވާލުކުރާނެ ބަޔަކު އަދި ނިންމާފައެއް ނުވެއެވެ.

ކުރެއްދޫ ހޯލްޑިންސްއާއެކު ސަރުކާރުން ތަރައްގީކުރި މި އެއާޕޯޓަށް ގާތްގަނޑަކަށް 11 މިލިއަން ޑޮލަރު (170 މިލިއަން ރުފިޔާ) ޚަރަދުކޮށްފައިވެއެވެ. ދެއަހަރު ތެރޭގައި ނިންމާ ގޮތަށް ކުރެއްދޫ ހޯލްޑިންސްއާއެކު ސަރުކާރުން އެއާޕޯޓު އެޅުމަށް އެއްބަސްވުމުގައި ސޮއިކުރީ 29 މޭ 2018 ގައެވެ. އަދި އެހަރު ތެރޭގައި އެއާޕޯޓު ހެދުމުގެ މަސައްކަތް ވަނީ ފަށާފައެވެ. މި އެއާޕޯޓުގެ އަމަލީ މަސައްކަތް ކޮށްފައިވަނީ ވެލާނާ އިންޓަނޭޝަނަލް އެއާޕޯޓު ތަރައްގީކުރުމުގެ ގިނަ މަސައްކަތްތަކެއް ކުރަމުން އަންނަ ޗައިނާގެ ބީޔޫސީޖީ ކުންފުނިންނެވެ.

ހޮނިހިރު ދުވަހު މި އެއާޕޯޓަށް ޓެސްޓު ފްލައިޓު ޖައްސާފައި ވާއިރު، އެއާޕޯޓް ޝެޑިއުލް ދަތުރުތައް ފަށާނެ ސީދާ ތާރީޚެއް އަދި ކަނޑައަޅާފައެއް ނުވެއެވެ.

މަޑިވަރު އެއާޕޯޓުގެ އެއާ ޓްރެފިކް ކޮންޓްރޯލު ޓަވަރުގެ އިތުރުން، ޓާމިނަލް އިމާރާތްތަކާއި އެކޮމޮޑޭޝަން ބްލޮކު ވެސް މިހާރު ނިންމާފައި ވާއިރު، އެއާޕޯޓަށް ބޭނުންވާ ފަޔާ ލޮރީތައް މި އަހަރުގެ މެދު ތެރޭގައި އެ އެއާޕޯޓަށް ވަނީ ގެންގޮސްފައެވެ. މަޑިވަރު އެއާޕޯޓުގައި އޮންނަނީ 1.2 ކިލޯމީޓަރުގެ ރަންވޭއެކެވެ.