ޅ. މަޑިވަރު އެއަރޕޯޓާއެކު މުޅި އަތޮޅުގެ ފަތުރުވެރިކަން ރަނގަޅުވެ، އެ އަތޮޅުގެ ރައްޔިތުންނަށްވެސް ލުއިފަސޭހަތަކެއް ލިބިގެންދާނެ ކަމަށް ރިހިވެލި މޯލްޑިވްސް އަދި ކުރެއްދޫ ރިސޯޓުގެ ޖެނެރަލް މެނޭޖަރ ބްރެޑްލީ ކޯލްޑަރ ވިދާޅުވެއްޖެއެވެ.

ޅ. މަޑިވަރު އެއަރޕޯޓަކީ ކުރެއްދޫ ހޯލްޑިންގސްއާއި ސަރުކާރާ ގުޅިގެން ތަރައްގީކޮށްފައިވާ އެއަރޕޯޓެކެވެ. ހޮނިހިރު ދުވަހުގެ ހެނދުނު މި އެއަރޕޯޓަށް ޓެސްޓު ފްލައިޓް ވަނީ ޖައްސާފައެވެ. އެ އެއާޕޯޓަށް ޖައްސާފައިވަނީ ގައުމީ އެއާލައިން، މޯލްޑިވިއަންގެ ފްލައިޓެކެވެ. އެ ފްލައިޓުން ބައެއް ވަޒީރުންނާއި، ބައެއް ކުންފުނިތަކުގެ އިސްވެރިން ވަޑައިގެންނެވިއެވެ.

މިކަމާއި ގުޅިގެން ރާއްޖެޓީވީއަށް މައުލޫމާތުދެއްވަމުން ރިހިވެލި މޯލްޑިވްސް އަދި ކުރެއްދޫ ރިސޯޓުގެ ޖެނެރަލް މެނޭޖަރ ބްރެޑްލީ ކޯލްޑަރ ވިދާޅުވީ މި އެއަރޕޯޓާއެކު އަތޮޅުތަކުގެ ރިސޯޓުތަކަށް ދަތުރުކުރާ ފަތުރުވެރިންނަށް ގިނަ ވަގުތު ސީޕްލޭން ލައުންޖްގައި މަޑުކުރަންނުޖެހި ފަސޭހަކަމާއެކު ދަތުރުކުރެވޭނެކަމަށެވެ. އަދި އެ އަތޮޅަށް ދަތުރުކުރާ ފަތުރުވެރިން ގިނަވެ، ފަތުރުވެރިކަން ފުޅާވެގެންދިއުމަށް މަގުފަހިވެގެންދާނެ ކަމަށް ބްރެޑްލީ ކޯލްޑަރ ވިދާޅުވިއެވެ. މީގެ އިތުރުން މި އެއަރޕޯޓާއެކު ޅ. އަތޮޅުގެ ރައްޔިތުންނަށްވެސް ދަތުރުފަތުރު ކުރުމުގައި ލުއިފަސޭހަވެގެންދާނެ ކަމަށް އޭނާ ވިދާޅުވިއެވެ.

މި އެއަރޕޯޓަށް ޓެސްޓް ފްލައިޓް ޖެއްސި މޯލްޑިވިއަންއިން ބުނީ އެ އެއަރލައިނުން މީގެ ކުރިން ގިނަ އެއަރޕޯޓްތަކަކަށް ޓެސްޓް ފްލައިޓް ޖައްސާފައިވާކަމަށެވެ. މި ހުރިހާ އެއަރޕޯޓެއްގެ ތެރެއިންވެސް އެންމެ ފުރިހަމައަށް ކަންކަން ނިމިގެން ޓެސްޓް ފްލައިޓް ޖެއްސުނު އެއަރޕޯޓަކީ މަޑިވަރު އެއަރޕޯޓް ކަމަށް މޯލްޑިވިއަންއިން ބުނެފައިވެއެވެ. އެއަށްފަހު ދެން އަންނާނީ ސެޓިފިކޭޝަން ޕްރޮސެސްކަމަށާއި، މި ޕްރޮސެސްގައި މާބޮޑު މައްސަލައެއް އުޅޭނެކަމަށް ނުބެލެވޭ ކަމަށް މޯލްޑިވިއަންއިން ބުނެފައިވެއެވެ. މާލެއިން މަޑިވަރު އެއަރޕޯޓަށް ކުރާ ދަތުރުގެ ދިގުމިނަކީ 25 މިނެޓެވެ.

މި އެއަރޕޯޓާއެކު ޅ. އަތޮޅުގެ ރައްޔިތުންނަށް މިކަމުން ކުރާނެ ފައިދާ ވަރަށް ބޮޑެވެ. މިކަމާއި ގުޅިގެން ޅ. އަތޮޅުން ރާއްޖެޓީވީއާ ވާހަކަދެއްކި މީހަކު ބުނިގޮތުގައި މަޑިވަރުގައި އެއަރޕޯޓް ތަރައްގީކުރެވިގެންދިއުމަކީ ފާދިއްޕޮޅު ރައްޔިތުންގެ ވަރަށް ބޮޑު އުންމީދެއް ކަމަށެވެ. އެ އަތޮޅުގެ މީހުންނަކީ ވަރަށް ގިނައިން ދަތުރުފަތުރު ކުރަންޖެހޭ ބައެއް ކަމަށާއި، އެ އަތޮޅުން ދަތުރުފަތުރުކުރާ އުޅަނދުތައް އަބަދުވެސް ވަރަށް ބާރުބޮޑު ކަމަށް އޭނާ ބުނެފައިވެއެވެ. އެހެންކަމުން ދަތުރުފަތުރުގައި ފަސޭހަ ގޮތްތަކެއް ހަމަޖެހިގެންދިއުމަކީ ރައްޔިތުން އެދޭ ވަރަށް ބޮޑު އެދުމެއް ކަމަށް އޭނާ ކިޔައިދިނެވެ.

ކުރެއްދޫ ހޯލްޑިންސްއާއެކު ސަރުކާރުން ތަރައްގީކުރި މި އެއާޕޯޓަށް ގާތްގަނޑަކަށް 11 މިލިއަން ޑޮލަރު (170 މިލިއަން ރުފިޔާ) ޚަރަދުކޮށްފައިވެއެވެ. ދެއަހަރު ތެރޭގައި ނިންމާ ގޮތަށް ކުރެއްދޫ ހޯލްޑިންސްއާއެކު ސަރުކާރުން އެއާޕޯޓު އެޅުމަށް އެއްބަސްވުމުގައި ސޮއިކުރީ 29 މޭ 2018 ގައެވެ. އަދި އެއަހަރު ތެރޭގައި އެއާޕޯޓު ހެދުމުގެ މަސައްކަތް ވަނީ ފަށާފައެވެ. މި އެއާޕޯޓުގެ އަމަލީ މަސައްކަތް ކޮށްފައިވަނީ ވެލާނާ އިންޓަނޭޝަނަލް އެއާޕޯޓު ތަރައްގީކުރުމުގެ ގިނަ މަސައްކަތްތަކެއް ކުރަމުން އަންނަ ޗައިނާގެ ބީޔޫސީޖީ ކުންފުނިންނެވެ.

މަޑިވަރު އެއާޕޯޓުގެ އެއާ ޓްރެފިކް ކޮންޓްރޯލު ޓަވަރުގެ އިތުރުން، ޓާމިނަލް އިމާރާތްތަކާއި އެކޮމޮޑޭޝަން ބްލޮކު ވެސް މިހާރު ނިންމާފައި ވާއިރު، އެއާޕޯޓަށް ބޭނުންވާ ފަޔާ ލޮރީތައް މި އަހަރުގެ މެދު ތެރޭގައި އެ އެއާޕޯޓަށް ވަނީ ގެންގޮސްފައެވެ. މަޑިވަރު އެއާޕޯޓުގައި އޮންނަނީ 1.2 ކިލޯމީޓަރުގެ ރަންވޭއެކެވެ.

ހޮނިހިރު ދުވަހު މި އެއާޕޯޓަށް ޓެސްޓު ފްލައިޓު ޖައްސާފައި ވާއިރު، އެއާޕޯޓް ޝެޑިއުލް ދަތުރުތައް ފަށާނެ ސީދާ ތާރީޚެއް އަދި ކަނޑައަޅާފައެއް ނުވެއެވެ.