ލީބިޔާގައި އިންތިޚާބު ބާއްވާނެ ތާރީޚު ވީއެންމެ އަވަހަކަށް ކަނޑައެޅުމަށް ހުޅަނގުން ގޮވާލައިފި
25 ޑިސެމްބަރު 2021 | ހޮނިހިރު 03:32ހުޅަނގުގެ ގައުމުތަކުން ނެރެފައިވާ ބަޔާނުގައި ބުނެފައިވަނީ މިހާރު ލީބިޔާގައި އުފެދިފައިވާ ވަގުތީ ސަރުކާރު ގަބޫލުކުރާކަމަށް
ލީބިޔާގެ ރިޔާސީ އިންތިޚާބު ފަސްކުރުމާއި ދެކޮޅަށް މުޒާހަރާކުރަނީ
ފްރާންސް، ޖަރމަނީ، އިޓަލީ، އިނގިރޭސިވިލާތް އަދި އެމެރިކާއިން ގުޅިގެން ނެރެފައިވާ ބަޔާނެއްގައި ލީބިޔާގެ ރިޔާސީ އިންތިޚާބު ބާއްވާނެ ތާރީޚު ވީއެންމެ އަވަހަކަށް ކަނޑައެޅުމަށް ގޮވާލައިފިއެވެ.
ފަސް ގައުމުން މިގޮތަށް ގޮވާލާފައި މިވަނީ މިމަހުގެ 24 ވަނަ ދުވަހު ބޭއްވުމަށް ހަމަޖެހިފައިވާ ލީބިޔާގެ ރިޔާސީ އިންތިޚާބު ފަސްކޮށްފައިވާ ކަމަށް އެގައުމުގެ އިލެކްޝަންސް ކޮމިޝަނުން ބުނުމާއެކުއެވެ. ހުޅަނގު ގައުމުތަކުން ނެރެފައިވާ ބަޔާނުގައި ބުނެފައިވަނީ މިހާރު ލީބިޔާގައި އުފެދިފައިވާ އިންޓަރިމް ސަރުކާރު ގަބޫލުކުރާކަމަށެވެ. ނަމަވެސް ހުރިހާ އެންމެންނަށް އެއްބަސްވެވޭ ތާރީޚެއްގައި އިންތިޚާބު ބޭއްވުމަށް ވަނީ ގޮވާލާފައެވެ.
މިހާރު ލީބިޔާގައި އޮތް ގޮވަރމެންޓް އޮފް ނޭޝަނަލް ޔުނިޓީ (ޖީއެންޔޫ) އަކީ މަރޗް މަހު އެކުލަވާލާފައިވާ ސަރުކާރެކެވެ. ލީބިޔާގެ ކުރީގެ ރައީސް މުއާމަރަލް ގައްޒާފީގެ ވެރިކަން ނިމުމަމަށް ގެނައިފަހުން ލީބިޔާގައި އަންނަނީ ހަމަނުޖެހުންތައް ހިނގަމުންނެވެ. އެހެންކަމުން ލީބިޔާއަށް ސުލްހަ ގެނައުމަށްޓަކައި ދެފުށް ފެންނަ ރިޔާސީ އިންތިޚާބެއް ބޭއްވުމަކީ މުހިންމު ކަމެކެވެ.
ލީބިޔާގެ ގާނޫނު ހަދާ މަޖިލީހުން އިންތިޚާބު ބާއްވަން ކަނޑައަޅާފައިވާ ދުވަހު އިންތިޚާބު ނުބޭއްވޭނެކަން އިއުލާންކުރުމުން މިހާރު އުފެދިފައިވާ ސަރުކާރުގެ ގާނޫނީ ހައިސިއްޔަތާއި މެދުވެސް ވަނީ ސުވާލުއުފެދިފައެވެ.
ލީބިޔާގެ އިލެކްޝަން ކޮމިޝަނުން ވަނީ އިންތިޚާބު އެއްމަސް ދުވަހަށް ފަސްކުރުމަށް ހުށަހަޅާފައެވެ. އެހެންނަމަވެސް އިންތިޚާބު ޖެނުއަރީ މަހުގެ 24 ވަނަ ދުވަހު ބޭއްވުމަށް އަދި ގިނަ ބަޔަކު ތާއީދެއްނުކުރެއެވެ.
ލީބިޔާގެ ގާނޫނުހަދާ މަޖިލީހުން ސެޕްޓެމްބަރ މަހު ބުނެފައިވަނީ ލީބިޔާގައި މިހާރު އުފެދިފައިވާ ސަރުކާރު ޑިސެމްބަރ މަހުގެ 24 ވަނަ ދުވަހުގެ ފަހުން ގަބޫލުނުކުރާނެ ކަމަށެވެ. ނަމަވެސް ބައިނަލްއަގްވާމީ ފަރާތްތަކާއެކު ލީބިޔާގެ އެކި ފަރާތްތަކުން ކުރިޔަށްގެންދިޔަ އެއްބަސްވުމުގައި އެއްބަސްވެފައިވަނީ އިންތިޚާބެއް ބާއްވާ އިންތިޚާބުގެ ނަތީޖާ ހާމަކުރުމާއި ހަމައަށް ވެރިކަމުގެ ބާރުތައް އެހެން ފަރާތަކަށް ބަދަލު ނުކުރުމަށެވެ.
ރިޔާސީ އިންތިޚާބު ބޭއްވުން ފަސްވުމާއި ގުޅިގެން ލީބިޔާގެ އެތެރޭގައި ވަނީ ރުޅިވެރިކަން ފާޅުކުރަން ފަށާފައެވެ. އެގޮތުން އެކި ފެކްޝަންތަކާއި ސިޔާސީ ލީޑަރުން ގެންދަނީ އެކަމާއި ދެކޮޅަށް ވާހަކަދައްކަވަމުންނެވެ.
އދން އަންނަނީ ލީބިޔާގެ އެކި ފަރާތްތަކާއި މަޝްވަރާކޮށްގެން އިންތިޚާބު ބޭޭއްވޭނެ ގޮތްތަކެއް ހޯދުމުގެ މަސައްކަތްކުރަމުންނެވެ. އދ ގެ ސްޕެޝިއަލް އެޑްވައިޒަރ ސްޓެފަނީ ވިލިއަމްސް ވިދާޅުވީ ލީބިޔާގެ އެކި ހިސާބުތަކުން އިވެމުންދާ އަޑުތަކަކީ ރައްޔިތުން އިންތިޚާބެއް ބޭއްވުމަށް ބޭނުންވެފައިވާކަމުގެ އަޑުތައް ކަމަށެވެ.
