ރެއާއި ދުވާލަކީ އިންސާނާ ގޮވައިގެން އޭނާގެ އަޖަލާ ދިމާލަށް ދަތުރު ކުރާ އުޅަނދު ކަމަށާއި، ހަޔާތުގެ އެއްވެސް ވަގުތެއް ބޭކާރު ވިޔަނުދީ މަސައްކަތް ކުރުމަށް ހުކުރު ޚުތުބާގައި ގޮވާލައިފިއެވެ.
"ކާމިޔާބުގެ މަގު" މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ ހަޔާތުގެ އެއްވެސް ވަގުތެއް ބޭކާރު ވިޔަނުދީ، މާތް ﷲ ގެ ރުއްސެވުމާއި، ފުއްސެވުން ލިބިގަތުމަށް ގަދައަޅައި މަސައްކަތް ކުރަން ޖެހޭ ކަމަށެވެ. ޚުތުބާގައި ބުނީ ދުވަސްތައް ހަފުތާތަކަށް ބަދަލުވެ، ހަފްތާތައް މައްސަރުތަކަށް ބަދަލުވެ، މައްސަރުތައް އަހަރުތަކަށް ބަދަލުވެ، މާޒީވަމުން ދަނީ ވަރަށް ގިނަގުނަ ފިލާވަޅުތަކާއެކު ކަމަށެވެ. އަދި ފާއިތުވެދާ ވަގުތަކީ ހަޔާތަށް އެނބުރި އަންނާނެ ވަގުތެއް ނޫންކަން ހަނދާން ބަހައްޓަންޖެހޭ ކަމަށް ޚުތުބާގައި ބުނެފައިވެއެވެ.
ރެއާއި ދުވާލަކީ އިންސާނާ ގޮވައިގެން އޭނާގެ އަޖަލާއި ދިމާލަށް ދަތުރުކުރާ އުޅަނދެއްކަން ފާހަގަކޮށް ޚުތުބާގައި ބުނީ ދުރުގައިވާ ކޮންމެ އެއްޗެއް ކައިރިވަމުންދާނެ ކަމަށެވެ. އެހެންކަމުން ލިބޭ ފުރުސަތުތަކުގެ ބޭނުން ހެޔޮ ގޮތުގައި ހިފަންޖެހޭ ކަމަށާއި، ހެޔޮ އަމަލު ގިނަކޮށް، ނުބައި ކަންތަކުން ދުރުހެލިވާން ޖެހޭ ކަމަށް ޚުތުބާގައި ބުނެފައިވެއެވެ.
ރަސޫލާ ހަދީސް ކުރައްވާފައިވާ ބަސްފުޅެއްގެ މާނައިގައި ވަނީ "ފަސްކަމެއް ތިބާއާ ކުރިމަތިވުމުގެ ކުރިން ފަސްކަމެއްގެ ފައިދާ ހެޔޮގޮތުގައި ލިބިގަންނާށެވެ. މުސްކުޅިވުމުގެ ކުރިން ޒުވާންކަމުގެ ފައިދާ ހެޔޮގޮތުގައި ލިބިގަންނާށެވެ. ބަލިވުމުގެ ކުރިން ދުޅަހެޔޮކަމުގެ ފައިދާ ހެޔޮގޮތުގައި ލިބިގަންނާށެވެ. ފަޤީރުވުމުގެ ކުރިން މުއްސަނދިކަމުގެ ފައިދާ ހެޔޮގޮތުގައި ލިބިގަންނާށެވެ. މަޝްޣޫލުވުމުގެ ކުރިން ހުސްވަގުތުގެ ފައިދާ ހެޔޮގޮތުގައި ލިބިގަންނާށެވެ. އަދި މަރުވުމުގެ ކުރިން ޙަޔާތުގެ ފައިދާ ހެޔޮގޮތުގައި ލިބިގަންނާށެވެ." މިނަބަވީ އިރުޝާދުގެ ބޭނުމަކީ، ހަޔާތުގެ އެއްވެސް ވަގުތެއް ބޭކާރު ވިޔަނުދީ، މާތް ﷲ ގެ ރުއްސެވުމާއި، ފުއްސެވުން ލިބިގަތުމަށްޓަކައި ގަދައަޅައި މަސައްކަތްކުރުމެވެ. ފާއިތުވެދާ ވަގުތަކީ އަނބުރާ ލިބޭނެ ވަގުތެއް ނޫނެވެ. މާދަމާގެ ދިރިއުޅުން ބާއްޖަވެރިކުރުމަށް ވެވުނު މިންވަރަކުން މަސައްކަތްކުރަން ޖެހެއެވެ.ހުކުރު ޚުތުބާ
ޚުތުބާގައި ބުނީ ފަރުޟު ފަސް ނަމާދު ބަރާބަރަށް އަދާކުރުމާއި، ޤުރުއާނުން މިންވަރެއް ކިޔެވުމާއި، ތިބާއާ ހުރެ މަންމަގެ ލޮލުން އޮހޭކަރުނަ ފޮހެލަދެވޭތޯ އަމިއްލަ ނަފްސާ ސުވާލު އުފައްދަން ޖެހޭ ކަމަށެވެ. އަދި މަހްޝަރު ބިމުގައި ސުވާލު ކުރެވޭއިރު، އެސުވާލުތަކުގެ ކުރިމަތީގައި އިސްޖަހަން ޖެހިއްޖެނަމަ ހިތާމައިގެ ކޮޅެއް ނެތް ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ ދިރިއުޅުމުގައި ކުރިމަތިވާ ކޮންމެ ކަމެއްގައި އަމަލު ކުރަން ޖެހޭނީ ރަސޫލާގެ ހަޔާތް ނަމޫނާއަށް ބަލައިގެން ކަމަށާއި، އެއީ ކާމިޔާބު ވުމުގެ އަސާސް ކަމަށެވެ.
