ރާއްޖޭގައި ގަވާއިދާ ޚިލާފަށް މަސައްކަތްކުރާ ބަންގްލަދޭޝްގެ ރައްޔިތުންގެ މައްސަލަ ހައްލުކުރުމަށް ގުޅިގެން މަސައްކަތް ކުރުމަށް އެއްބަސްވެއްޖެ
ރެގިއުލަރައިޒޭޝަން ޕްރޮގްރާމްގައި ބަންގްލަދޭޝްގެ ސަރުކާރުގެ އެއްބާރުލުން ލިބޭނެ
ރައީސުލްޖުމްހޫރިއްޔާ ޝެއިޚް ހަސީނާއާ ބައްދަލު ކުރެއްވުން
ރާއްޖޭގައި ގަވާއިދާ ޚީލާފަށް މަސައްކަތްކުރާ ބަންގްލަދޭޝްގެ ރައްޔިތުންގެ މައްސަލަ ހައްލުކުރުމަށް ގުޅިގެން މަސައްކަތް ކުރުމަށް އެއްބަސްވެއްޖެއެވެެ.
ބަންގްލަދޭޝްގެ ބޮޑު ވަޒީރު ޝެއިޚް ހަސީނާ، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙާ އެކު ރައީސް އޮފީހުގައި ކުރިއަށް ގެންދިޔަ ރަސްމީ މަޝްވަރާތަކަށްފަހު ދެގައުމުން ވަނީ ގުޅިފައިވާ ބަޔާނެއް އިއްވާފައެވެ. މިބަޔާނުގައި މަޝްވަރާ ކުރެވުނު ކަންތަކަށް ދެ ބޭޅުން ވެސް އަލިއަޅުއްވާލެއްވިއެވެ.
މި ބަޔާނުގައި ރައީސް ޞާލިޙް ވިދާޅުވީ، ރާއްޖޭގައި ގަވާއިދާ ޚިލާފަށް މަސައްކަތްކުރާ ބަންގްލަދޭޝްގެ ރައްޔިތުން ގަވާއިދަށް ފެއްތުމަށް ސަރުކާރުން ކުރިއަށްގެންދާ ރެގިއުލަރައިޒޭޝަން ޕްރޮގްރާމްގައި ބަންގްލަދޭޝްގެ ސަރުކާރުގެ އެއްބާރުލުން ލިބޭނެ ކަމަށެވެ. މި މައްސަލަ ހައްލުކުރުމަށް ދެ ގައުމު ގުޅިގެން މަސައްކަތް ކުރުމަށް މަޝްވަރާކުރެއްވި ކަމަށެވެ.
އަދި ދިވެހި ސަރުކާރާއި ބަންގްލަދޭޝްގެ ސަރުކާރާ ދެމެދު ބަދަލު ކުރި އެއްބަސްވުމުގެ ސަބަބުން ދެ ގައުމުގެ ގުޅުން އިތުރަށް ހަރުދަނާ ވެގެންދާނެ ކަމަށެވެ. މަސްވެރިކަމުގެ ދާއިރާއިން ތަމްރީނާއި ތަޖުރިބާ ހިއްސާކުރުމަށް އެއްބަސްވެވުނު ކަމަށެވެ. ދިވެހި ސަރުކާރާއި ބަންގްލަދޭޝް ސަރުކާރާ ދެމެދު ޓެކްސްއަށް މަކަރު ހެދުމުގެ ފުރުޞަތު ނައްތާލުމަށާއި، ޑަބަލް ޓެކްސޭޝަން ނައްތާލުމަށް އެއްބަސްވި އެއްބަސްވުމުގެ ސަބަބުން ދެ ގައުމުގެ އިޤްތިޞާދީ ގުޅުމަށް އިތުރު ކުރިއެރުން ލިބިގެންދާނެ ކަމަށް ރައީސް ވިދާޅުވިއެވެ.
ބަންގްލަދޭޝްއިން ރާއްޖެއަށް އެކި ދާއިރާތަކުން ވެދެއްވާ އެހީތެރިކަން ފާހަގަކޮށް ރައީސް ވިދާޅުވީ، ވިޔަފާރީގެ ގުޅުން ބަދަހިކުރުމަށް މަޝްވަރާ ކުރެވުނު ކަމަށެވެ. ދިވެހިންނަށް އޮންއެރައިވަލް ވިސާ އަދި ދިގު މުއްދަތަކަށް ދިވެހި ކިޔަވާ ކުދިންނަށް ވިސާ ދިނުމާ ގުޅޭ ގޮތުން މަޝްވަރާ ކުރެވުނު ކަމަށް ރައީސް ވިދާޅުވިއެެވެ.
ބައިނަލްއަގުއާމީ މަންސަތަކުގައި ދެގައުމު އެއްބަސްވާ ކަންކަމުގެ ތެރެއިން ޓެރަރިޒަމާ ދެކޮޅަށް މަސައްކަތް ކުރުމާއި، ތިމާވެށި ހިމާޔަތް ކުރުމަށް ހުރި ގޮންޖެހުންތައް ނައްތާލުމުގައި ދެ ގައުމު ގުޅިގެން އިތުރަށް މަސައްކަތް ކުރުމަށް އެއްބަސް ވެފައިވާ ކަމަށް މި ބަޔާނުގައި ފާހަގަކޮށްފައިވެއެވެ.
ޝެއިޚް ހަސީނާ ވަނީ އެކަމަނާ ރާއްޖެ ވަޑައިގަތުމަށް ދައުވަތު ދެއްވި ކަމަށްޓަކައި ރައީސް ޞާލިޙަށް ޝުކުރު އަދާ ކުރައްވާފައެވެ. މިއީ އެކަމަނާ ރާއްޖެއަށް ކުރައްވާ ފުރަތަމަ ފުރަމާނަ ދަތުރުފުޅު ކަމަށާއި، މި ދަތުރުފުޅުގައި މުހިންމު މަޝްވަރާތަކެއް ކުރެވުނު ކަމަށް ވިދާޅުވިއެވެ. ތައުލީމާއި މީހުން ބިނާ ކުރުމާއި މަސްވެރިކަމުގެ ދާއިރާއިން ގުޅުން އިތުރަށް ހަރުދަނާ ކުރެވިގެންދާނެ ކަމަށް ހަސީނާ ވިދާޅުވިއެވެ.
ރާއްޖެއާއި ބަންގްލަދޭޝާ ދެމެދު އިންވެސްޓްމެންޓް އިތުރުކުރުމަށް މަޝްވަރާ ކުރެވުނު ކަމަށާއި، ބަންގްލަދޭޝްއިން ރާއްޖެއަށް ކޮލިޓީ ތަކެތި ރަނގަޅު އަގެއްގައި ފޯރުކޮށްދީ، ވިޔަފާރީގެ ދާއިރާއިން ގުޅުން ބަދަހިކުރުމަށް މަޝްވަރާ ކުރެއްވި ކަމަށް ހަސީނާ ވިދާޅުވިއެވެ.
ރެގިއުލަރައިޒޭޝަން ޕްރޮގްރާމަށް އެހީތެރިކަން ލިބިގެންދާނެ ކަމަށާއި، ކޮވިޑްގެ ހާލަތު ރަނގަޅުވެ އާއްމު ހާލަތަށް ބަދަލުވުމުން ރާއްޖޭގެ ރައްޔިތުންނަށް އޮންއެރައިވަލް ވިސާ ދިނުމަށް ނިންމާފައިވާ ކަމަށް ވެސް ވިދާޅުވިއެވެ.
ޝެއިޚް ހަސީނާ ރާއްޖެއަށް ކުރައްވާ މިދަތުރުފުޅުގައި ބުރާސްފަތި ދުވަހު ރައްޔިތުންގެ މަޖިލީހުގައި ތަގުރީރު ކުރައްވާނެއެވެ.
