އިރާގުގެ ވެރިރަށް ބަގްދާދުގެ މެދުތެރޭ ސަރަަހައްދެއްގައި ހުންނަ މަޝްހޫރު އައިސް ކްރީމް ވިއްކާ ފިހާރައެއްގެ ބޭރުގައި ދިން ކާރު ބޮމުގެ ހަމަލާއެއްގައި 10 މީހުން މަރުވެ، 22 މީހުންނަށް އަނިޔާވެއްޖެއެވެ.

އިރާގުގެ އޮފިޝަލުން ބުނާ ގޮތުން ގޮވާތަކެތި ބަހައްޓާފައި ކަމަށާއި އަހުރީ ކާރުތެރޭގަ އެވެ. އެތަކެތި ގޮއްވާލާފައި ވަނީ ރިމޯޓެއް ބޭނުންކޮށްގެންނެވެ.

ބޮމުގެ ހަމަލާގެ ޒިންމާ އިސްލާމިކް ސްޓޭޓް (އައިއެސް) އިން ވަނީ ނަގާފައެވެ.

އިރާގުގައި ރަމްޟާން މަހު އެހެން މަސްތަކާ ހިލާފަށް ބޮޑަށް ހަމަނުޖެހުން ހިނގައެވެ.

މިދިޔަ ރަމްޟާން މަހު ވެސް އިރާގުގައި ވަނީ ޓްރަކް ބޮމުގެ ބޮޑު ހަަމަލާއެއް ދީފައެވެ. ބަގްދާދުގެ މެދުތެރޭ ހިސާބެއްގައި ހުންނަ ރީޓެއިލް ފިހާރަތަކެއް ހުންނަ ސަރަހައްދެއްގައި ދިން ހަމަލާގައި 300އާ ގާތް ކުރާ އަދަަދަކަށް މީހުން ވަނީ މަރުވެފައެވެ. މި ހަމަލާއަކީ 2003 ގައި ސައްދާމް ހުސައިން ވެރިކަމުން ދުރުކުރެވުނު ފަހުން ދިން އެންމެ ނުރައްކާތެރި ހަމަލާއެެވެ. މި ބޮމުގެ ހަމަލާގެ ޒިންމާ އައިއެސް އިން ނެގިއިރު، މިހާދިސާއާ ގުޅިގެން އިރާގުގެ އިންޓީރިއާ މިނިސްޓަރު ވަނީ އިސްތިއުފާ ދެއްވާފައެވެ.