އަރަބިއްޔާ ސްކޫލަށް ދިމާވި މައްސަލަ ރައީސް ހައްލު ކޮށްދެއްވައިފި
ސްކޫލް ހިންގޭނެ ވަރަށް އެ އިމާރާތުގެ ކަންކަން ސަރުކާރުން އިންތިޒާމް ކޮށްދޭނެ
ރައީސުލްޖުމްހޫރިއްޔާ، އަލް މަދަރުސަތުލް އަރަބިއްޔަތުލް އިސްލާމިއްޔާގެ ޕީ.ޓީ.އޭ.ގެ ބޭފުޅުންނާއެކު ބޭއްވެވި ބައްދަލުކުރެއްވުމުގެ ތެރެއިން
އަރަބިއްޔާ ސްކޫލް ވަގުތީ ގޮތުން، ފޮރިން މިނިސްޓްރީގެ ކުރީގެ ވަގުތީ އިމާރާތަށް ބަދަލު ކުރަން ނިންމައި މައްސަލަ ހައްލުކޮށްފިއެވެ
އަރަބިއްޔާ ސްކޫލްގެ ދަރިވަރުން އިއްޒުއްދީން ސްކޫލަށް ބަދަލުކުރަން ނިންމާފައިވާކަން އެޑިއުކޭޝަން މިނިސްޓްރީން އިއުލާނުކޮށްފައިވަނީ ޑިސެންބަރު މަހުގެ 16 ވަނަ ދުވަހުއެވެ. މި ނިންމުމާއެކު ގިނަ އަދަދެއްގެ ބެލެނިވެރިން ދަނީ ހިތްހަމަނުޖެހުން ފާޅުކުރަމުންނެވެ. އަދި ޑިސެންބަރުމަހު 17 ވީ ހުކުރު ދުވަހުގެ ހަވީރު ބެލެނިވެރިންގެ މެދުގައި ބޭއްވި ބައްދަލުވުމަށްފަހު، އަރަބިއްޔާ ސްކޫލްދޮށަށް އެއްވެ މުޒާހަރާކޮށްފައިވެއެވެ.
މިމައްސަލަ ހޫނުވެފައިވާ ދަނޑިވަޅެއްގައި އެ ސްކޫލްގެ ޕޭރެންޓް ޓީޗަރސް އެސޯސިއޭޝަން (ޕީޓީއޭ)އިން ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާ ބައްދަލު ކުރައްވައި، މަޝްވަރާ ކުރައްވާފައިވެއެވެ. މި ބައްދަލުކުރެއްވުމުގައި އެބޭފުޅުންގެ ހުރި ކަންބޮޑުންތައް ހިއްސާ ކުރައްވާފައިވާއިރު، މި ބައްދަލުކުރެއްވުމުގައި ރައީސް ވަނީ އެކަން ބޮޑުވުންތަކަށް ހައްލެއް ހޯއްދަވައިދެއްވާނެ ކަމަށް ވިދާޅުވެފައެވެ.
ރައީސް ނިންމަވާފައިވަނީ އަރަބިއްޔާ ސްކޫލު ވަގުތީ ގޮތުން ފޮރިން މިނިސްޓްރީގެ ކުރީގެ ވަގުތީ އިމާރާތަށް ބަދަލު ކުރެއްވުމަށެވެ. އަދި މި އިމާރާތް ހަވާލުކުރެވޭއިރު، ކްލާސްރޫމާއި އަދި ސްކޫލު ހިންގޭނެވަރަށް އެ އިމާރާތުގެ ކަންކަން އިންތިޒާމް ކޮށްދެއްވުމަށް ރައީސް ވަނީ ނިންމަވާފައެވެ.
މީގެ އިތުރުން އެޑިޔުކޭޝަން މިނިސްޓަރު ޑރ. އައިޝަތު އަލީ ވެސް ވަނީ ޕީޓީއޭއާ ބައްދަލު ކުރައްވައި މަޝްވަރާ ކުރައްވާފައެވެ. އަރަބިއްޔާ ސްކޫލްގެ ދަރިވަރުންނަށް ދެރަ ގޮތެއް ނުވާނެ ކަމަށާއި، އެ ސްކޫލް އުވާނުލައްވާނެ ކަމަށް މިނިސްޓަރު ވިދާޅުވިއެވެ.
އަރަބިއްޔާ ސްކޫލް އެންމެ ފުރަަތަމަ ހިންގީ މަޖީދީމަގުގައި ޓާޓާ ފްލެޓްތައް އިމާރާތްކޮށްފައިވާ ބިމުގައެވެ. އެ ތަނުން ދެން ބަދަލުކުރީ، އިއްޒުއްދީން ސްކޫލު ހިންގާ، ކުރީގެެ އެމްއީއެސް އިމާރާތަށެވެ. އެ އިމާރާތުން ދެން ބަދަލުވީ މިހާރު ބޭނުންކުރާ އިމާރާތަށެވެ. ނަމަވެސް އެއިމާރާތު ބައެއް ތަންތަނުން ވަނީ ވަރަށް ބޮޑަށް ކަނޑައިގެން ގޮސް ގެއްލުންތައް ލިބިފައެވެ.
އަރަބިއްޔާ ސްކޫލް ހުންނަ އިމާރާތަށް ލިބިފައިވާ ގެއްލުންތަކާ ގުޅިގެން އެޑިއުކޭޝަން މިނިސްޓްރީން ނެރުނު ބަޔާނުގައި ބުނެފައިވަނީ، އެ ސްކޫލްގެ އިމާރާތަށް މިވަގުތު ދިމާވެގެން އުޅޭ މައްސަލަ ބަލައި ހައްލުކުރުމަށް އިތުރު ވަގުތު ބޭނުންވާ ކަމަށެވެ. އެ ސްކޫލްގެ އިމާރާތުގެ ހާލަތު މިވަގުތު ހުރިގޮތުން އެތަނުގައި ދަރިވަރުންނަށް ތައުލީމު ފޯރުކޮށްދިނުމަކީ އެންމެ ރައްކާތެރިކަމެއްނޫން ކަމަށާއި، ޢިމާރާތަށް ލިބިފައިވާ ގެއްލުންތަކަށް އަވަސް ހައްލެއް ހޯދުމަށްޓަކައި މިނިސްޓްރީން މަސައްކަތް ކުރަމުންދާ ކަމަށެވެ. މިކަމަށް ހައްލެއް ހޯދެންދެން ވެސް ދަރިވަރުންގެ ކިޔެވުން މެދުނުކެނޑި ކުރިއަށް ގެންދަންޖެހޭ ކަމަށާއި، 700ށްވުރެ ގިނަ ދަރިވަރުންގެ ކިޔެވުން މެދުނުކެނޑި ކުރިއަށް ގެންދެވޭނީ ސްކޫލެއް ހިންގުމަށް އިމާރާތްކޮށްފައި ހުރިތަނެއްގައި ކަމަށް މިނިސްޓްރީން ބުނެފައިވެއެވެ. އަދި ވަސީލަތްތައްވެސް ހުންނަންޖެހޭ ކަމަށެވެ.
