ޑަބްލިއުޑީސީ މެމްބަރުން ރައީސްގެ އަރިހަށް، މޭޔަރު ވިދާޅުވީ "ކޮންމެ ކަމެއްގައި ރައީސްގެ އަރިހަށް ދާންވީނޫންތޯ"އޭ

ޑަބްލިއުޑީސީ މެމްބަރުންގެ ކަންބޮޑުވުން ރައީސްއާ ހިއްސާކުރުމުން މާލެ ސިޓީގެ މޭޔަރ ޑރ. މުހައްމަދު މުއިއްޒު ވިދާޅުވީ "ކޮންމެ ކަމެއްގައި ރައީސްގެ އަރިހަށް ދާންވީނޫންތޯ"އޭ ކަމަށް މާލޭ ޑަބްލިއުޑީސީގެ ރައީސް ފާތިމަތު ޝިފާ ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން ޝިފާ ވިދާޅުވީ, އެ ކޮމިޓީގެ މަސައްކަތްތަކަށް ކައުންސިލުން އެކަށީގެންވާ ވަސީލަތްތައް ފޯރުކޮށްދީފައިނުވާކަމަށެވެ. އެބޭފުޅުންނަށް ދީފައިވަނީ އޮފީސް ސްޓޭޝަނެއް ކަމަށާއި، އެހެންނަމަވެސް އެ ކޮމިޓީގައި ހަރަކާތްތެރިވަނީ ޕާޓް ޓައިމް މުވައްޒަފުން ކަމުން، ރަސްމީ ގަޑިން ބޭރުގައި އެ އޮފީހަށް ވަންނަން ދަތިވާކަމަށް ޝިފާ ވިދާޅުވިއެވެ. އަދި ބޭނުންވާ ވަސީލަތްތައްވެސް ހަމަނުވާކަމަށް ވިދާޅުވިއެވެ.

Advertisement

ޝިފާ ވިދާޅުވީ ގާނޫނު ބުނާގޮތުން ނަމަ، ކައުންސިލްގެ ދަށުން އޮންނަ ޑަބްލިއުޑީސީގެ މެމްބަރުންނަށް މަސައްކަތްކުރާނެ ޖާގަ ފޯރުކޮށްދޭންޖެހޭނީ ކައުންސިލުން ކަމަށެވެ. އެހެންނަމަވެސް އެތައް ފަހަރެއްގެ މަތިން ސިޓީ ކައުންސިލްގައި އެދިގެންވެސް މިކަން ހައްލުވެފައިނުވާކަމަށެވެ. މޭޔަރުގެ ޖަވާބަކަށްވަނީ އެކޮމިޓީގެ ޚަރަދުގައި އަމިއްލައަށް ތަނެއް ކުއްޔަށް ނަގާށޭ ކަމަށް ޝިފާ ވިދާޅުވިއެވެ.

މިހާރު ޑަބްލިއުޑީސީ މެމްބަރުން މަސައްކަތްކުރުމަށް ހަމަޖައްސައިދީފައިވަނީ މައްޗަންގޮޅީ އޮފީހުގައި ހުންނަ މީޓިން ރޫމެއް ކަމަށް ޝިފާ ވިދާޅުވިއެވެ. އެ މީޓިން ރޫމްގައި ޑަބްލިޔުޑީސީގެ ބައްދަލުވުމެއް ކުރިއަށްދަނިކޮށް، އޮފީސް ލައްޕާ ގަޑި ޖެހިގެން އެތަނުން ނިކުންނަން ޖެހުނު ކަމަށް ޝިފާ ވިދާޅުވިއެވެ.

މިކަންކަމަށް އެދެވޭ ހައްލެއް ހޯދުމަށް ދާދި ފަހުން ރައީސުލްޖުމްހޫރިއްޔާއާ ބައްދަލުކުރައްވައިވެސް މިކަންކަން ފާހަގަކުރައްވާފައިވާކަމަށް އޭނާ ވިދާޅުވިއެވެ. އަދި ކައުންސިލްގެ މައްޗަންގޮޅީގައި ހުންނަ އޮފީހުގައި 18 މެމްބަރުންނަށް މަސައްކަތްކުރެވޭނެ ގޮތެއް ހަމަޖައްސައިދިނުމަށް އެދިފައިވާނެ ކަމަށް ވިދާޅުވިއެވެ.

އެންމެ ފަހުން މޭޔަރާ ބައްދަލުކުރެއްވިއިރު ރައީސްގެ އަރިހަށް ގޮސް، އެކަންކަން ހިއްސާކުރެއްވިކަަމަށް މޭޔަރު ކައިރީ ދަންނަވާފައިވާނެ ކަމަސް ޝިފާ ވިދާޅުވިއެވެ. އެކަން ހިއްސާކުރެއްވުމުން، "ކޮންމެ ކަންބޮޑުވުމެއް ހައްލުކުރުމަށް ރައީސް އަރިހަށް ދާންވީނޫން"ހޭ ވިދާޅުވި ކަމަށް ޝިފާ ވިދާޅުވިއެވެ.

މީގެ އިތުރުން ޝިފާ ވަނީ އެހެން ސިޓީތަކުގެ ޑަބްލިއުޑީސީ އޮފީސްތަކާ މާލޭގެ ޑަބްލިއުޑީސީ އޮފީހާ ހުރި ތަފާތު ހިއްސާކުރައްވާފައެވެ. އަތޮޅުތެރޭގައި ކޮންމެ ޑަބްލިއުޑިސީ މެމްބަރަކަށް ސްޓޭޝަނެއް ހުންނަކަމަށް ވިދާޅުވިއެވެ. އަތޮޅުތެރޭގެ ޑަބްލިއުޑީސީތަކުން މާޅޭގެ ޑަބްލިއުޑީސީއަށް ޒިޔާރަތްކުރިކަމަށާއި، ވެރިރަށް މާލޭގެ ހާލަތު މާ ދަށްކަމަށް ޝިފާ ވިދާޅުވިއެވެ.