މާލޭގެ ރައްޔިތުންނަށް ކަޑަޖަހާފައި ގޯތި ލިބެންޖެހޭނެކަމަށް ނަޝީދު ވިދާޅުވި
އެމްޑީޕީން މާލެ ސިޓީގެ ރައްޔިތުންނާއެކު ބޭއްވި ބައްދަލުވުމުގައި ރައީސް ނަޝީދު ވާހަކަދައްކަވަނީ
މާލޭގެ ރައްޔިތުންނަށް ބޯހިޔާވަހިކަން ފޯރުކޮށްދޭނެކަމުގެ ވައުދުވަމުން އަންނަތާ 30ހަކަށް އަހަރުވެފައިވާކަމަށާއި އަދިވެސް އެވައުދު ވަމުން އަންނާނެކަމަށާއި އަދި ވައުދު ފުއްދުމުގެ މަސައްކަތްވެސް ކުރަމުން ގެންދާނެކަމަށް އެމްޑީޕީގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
މާލެ ސިޓީގެ ރައްޔިތުންނާ ބައްދަލުކުރުމަށް އެމްޑީޕީން ކުރިޔަށްގެންދިޔަ މާލެ ސިޓީ ކޯކަސް ބައްދަލުވުމުގައި ވާހަކަދައްކަވަމުން ރައީސް ނަޝީދު ވިދާޅުވީ، ބޯހިޔާވަހިކަމުގެ ވާހަކަ އެމްޑީޕީން ދައްކަމުން އަންނާތީ އެޕާޓީގެ ވާދަވެރިންވެސް އަދި ރަހުމަތްތެރިންނާއި ޕާޓީއަށް ތާއީދުކުރާ މާލޭގެ ރައްޔިތުންވެސް އެމްޑީޕީއަށް އެވައުދު ނުފެއްދޭކަމަށް ބުނާކަމަށެވެ. ނަޝީދު ވިދާޅުވީ އެކަމަށް ދެބަސްވެވެން ނެތްކަމަށެވެ.
ނަމަވެސް ތަކުރާރުކޮށް ދަންނަވަން ބޭނުންފުޅުވަނީ އެވާހަކަ ދައްކަވަން ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ މިދިޔަ 15 ވަރަކަށް އަހަރު ތެރޭގައި އެންމެ ބޮޑަށް ސާފުވިކަމަކީ ފްލެޓް އަޅާފައި ފްލެޓަށް މީހުން ވެއްދުމަކީ އިންތިޚާބީ ސައިކަލެއް ނޫންކަން ކަމަށެވެ. ކުރީގެ ރައީސް މައުމޫން ބޯހިޔާވަހިކަމުގެ ގޮތުން ފެއްޓެވި މަސައްކަތް ހަވާލުކުރީ އެމަނިކުފާނުގެ ސަރުކާރުގައި ކަމަށާއި، އެމަނިކުފާނުގެ ސަރުކާރުގައި އެޅި ފްލެޓްތައް ހަވާލުކުރީ ރައީސް ޔާމީންގެ ސަރުކާރުގައި ކަމަށެވެ. އަދި ރައީސް ޔާމީންގެ ސަރުކާރުން އެޅި ފްލެޓްތައް ހަވާލުކުރަނީ މިސަރުކާރުގައި ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ހުޅުމާލޭގައި ފްލެޓް އަޅައި، ފްލެޓަށް މީހުން ވެއްދުމަށް 7 އަހަރާއި 10 އަހަރާ ދެމެދުގެ މުއްދަތެއް ނަގާއިރު އެކަމަށް އިންތިހާއަށް ޚަރަދުވެސް ހިނގާކަމަށެވެ. މިއަދު ހުޅުމާލޭގެ ދަރަނި 1.2 ބިލިއަން ޑޮލަރަށް އަރާކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ހުޅުމާލޭގެ ދަރަނި ދެއްކުމަށްޓަކައި އެެތަނުގެ ބިން، ހޮޓާ އެޅުމަށް ނުވަތަ ރިއަލް ސްޓޭޓްގެ ބޭނުމަށް ނުވަތަ އެހެން ކަމަކަށް ވިއްކަން ބާއްވައި، ނުވިކުމުން ދަރަނިވެސް އޮވެފައި ބޯހިޔާވަހިކަމެއްވެސް ނުލިބޭކަމަށެވެ. އަދި އަޅާ އިމާރާތް ދެކޮޅު ނުޖެހުމުން އެއަޅާ އިމާރާތުގެ ދަރަނި އިމާރާތުން ނުދެއްކުމުން އަނެއްކާވެސް ދަރަނި އޮވެފައި ހަމަ ހުޅުމާލޭގެ ބިންވެސް އޮންނަނީ ކަމަށް ނަޝީދު ވިދާޅުވިއެވެ.
ނަމަވެސް ހުޅުމާލޭގެ ބިން ކަނޑާފައި މާލޭގެ ރައްޔިތުންނަށް ދީފިނަމަ އެމީހުން އެތަން އާރާސްތުކުރާނެކަމަށާއި އެމީހުން އާމްދަނީ ހޯދައިގެން އެއާމްދަނީން ޓެކްސްގެ ގޮތުގައި ދައުލަތަށް އާމްދަނީ ފޯރުކޮށްދޭނެކަަމަށެވެ. އަދި އެއިން ލޯނު ދެއްކޭނެކަމަށް ނަޝީދު ވިދާޅުވިއެވެ.
