ކުރީގެ ރައީސް މުހައްމަދު ނަޝީދުގެ ވެރިކަމުގައި ހިންގެވި ވެށިފަހި މާލެ ޕްރޮގްރާމް އަލުން ފަށަން މާލޭގެ ގިނަ ދާއިރާތަކުން އެއްބަސްވެއްޖެއެވެ.
އަންގާރަ ދުވަހުގެ ހަވީރު ކުރީގެ ރައީސް މުހައްމަދު ނަޝީދު ވަނީ މާލޭގެ ދާއިރާތަކާއި ގޮފިތަކުގެ ރައީސުންނާ އަދި މެމްބަރުންނާ ބައްދަލުކުރައްވާފައެވެ. މި ބައްދަލުވުމަކީ މާލެއަށް ދިމާވެފައިއޮތް ބޯހިޔާވަހިކަމުގެ މައްސަލައާ ގުޅޭގޮތުން، މިކަމަށް ހައްލެއް ހޯދުމަށްޓަކައި ބޭއްވި ބައްދަލުވުމެކެވެ.
މި ބައްދަލުވުމަށް މެދުހެންވޭރު ދާއިރާގެ މެމްބަރު އަލީ އާޒިމް ވަނީ ގަރާރެއް ހުށަހަޅުއްވާފައެވެ. އާޒިމް ހުށަހެޅުއްވި ގަރާރުގައި ވަނީ، ފާއިތުވި 30 ވަރަކަށް އަހަރުގެ ތެރޭގައި މާލޭގެ ރައްޔިތުންނަށް ގޯތި ދެވިފައިނުވާކަމަށެވެ. މިވީ 30ހަކަށް އަހަރުގެ ތެރޭގައި މާލޭގެ އާބާދީ އެތައް ގުނައަކަށް އިތުރުވެގެން ގޮސްފައިވާކަމަށް އާޒިމް ވިދާޅުވިއެވެ. އެހެންކަމުން މާލޭގެ ގިނަ ބަޔަކު ބޯހިޔާވަހިކަމަށް ބޭނުންވެފައިވާކަން ދެނެގަނެވި އެކަމަށް ހައްލެއް ހޯދައިދިނުމަށް 2018 ވަނަ އަހަރު އެމްޑީޕީގެ މެނިފެސްޓޯގައި، އަދި 2019 ވަނަ އަހަރު އެމްޑީޕީގެ ރައްޔިތުންގެ މަޖިލީހުގެ މެނިފެސްޓޯގައި ހިމަނާފައިވާކަމަށެވެ. އެހެންނަމަވެސް މި ވާހަކަ ހަމައެކަނި ހިމެނެމުންދާތީ މިކަން ހައްލުކުރުމަށް ކުރަންޖެހިފައިއޮތް މަސައްކަތަކީ ވެށިފަހި މާލެ ޕްރޮގްރާމް އަލުން ހިންގަން ފެށުން ކަމަށް އާޒިމް ވިދާޅުވިއެވެ.
މިގޮތުން މާލެއިން ބިންކޮޅު ދޫކޮށްލާ ފަރާތްތަކަށް މާލޭގެ ސަރަހައްދުން ބިންކޮޅެއް ދިނުމަށް އާޒިމް ވަނީ ހުށަހަޅުއްވާފައެވެ. އަދި ހުޅުމާލެއާއި މާލެ ސަރަހައްދުން އެހެން ހިސާބުތަކުން ގޯތި ކަނޑާފައި ބިން ދިނުމުގެ މަސައްކަތްކުރުމަށްވެސް އާޒިމް ހުށަހެޅުއްވިއެވެ. މި މަސައްކަތް ކުރިއަށްދިިޔަނަމަވެސް އެކި ހައުސިންގ ސްކީމްތަކުގެ ތެރެއިން، ފްލެޓް އެޅުމުގެ މަސައްކަތް ކުރިއަށްގެންދަންޖެހޭކަން ގަބޫލުކުރައްވާކަމަށް އާޒިމް ވިދާޅުވިއެވެ. އަދި ފެލްޓްތަކާއި ގޯތިތައް ހައްގުވާ ފަރާތްތައް ކަނޑައަޅައި، ވަކި ކްރައިޓީރިއާއެއްގެ ދަށުން އެތަންތަނަށް ކުރިމަތިލުމަށް ހުޅުވާލުން އަވަސްކުރުމަށްވެސް އާޒިމް ވަނީ ހުށަހަޅުއްވާފައެވެ. މިކަމުގައި ސަރުކާރާއި މާލެ ސިޓީ ކައުންސިލުން ކުރަންޖެހޭ މަސައްކަތްތަކެއް ހުރުމުން، އެ ދެ ފަރާތުން ކުރަންޖެހޭ މަސައްކަތްތައް ވީހާވެސް އަވަހަކަށް ކޮށްދިނުމަށް އަލީ އާޒިމް ވަނީ އެދިވަޑައިގެންފައެވެ. މީގެ އިތުރުން އިންޑިއާ އައުޓްގެ ނަމުގައި އެކިއެކި ސްލޯގަންތައް ބޭނުންކޮށްގެން ހިންގަމުންދާ ހަރަަކާތް ހުއްޓުވުމަށްވެސް އަލީ އާޒިމްގެ ގަރާރުގައި ހިމަނާފައިވެއެވެ.
އާޒިމް ހުށަހެޅުއްވި މި ގަރާރަށް ތާއީދުކުރައްވައި، މާލޭގެ އެކި ދާއިރާތަކުގެ މެމްބަރުންނާއި ގޮފިތަކުން ވަނީ ވާހަކަދައްކާފައެވެ. އެގޮތުން މާލެއިން ގޯތި ދޫކޮށްލާ މީހުންނަށް ހުޅުމާލެއިން ނުވަތަ ގުޅީފަހުން ގޯތި ދޫކުރަންޖެހޭނެކަމަށް ގިނަ ބޭފުޅުން ވަނީ ވިދާޅުވެފައެވެ. އަލީ އާޒިމްގެ މި ގަރާރަށް މެމްބަރުންގެ ތާއީދު އޮތް މިންވަރު ހޯދުމަށް ވޯޓަށް ވަނީ އަހާފައެވެ. އަދި މި ބައްދަލުވުމުގައި ބައިވެރިވި ހުރިހާ ދާއިރާއެއްގެ ތާއީދާއެކު މި ގަރާރު ވަނީ ފާސްވެކޮށްފައެވެ.
މި ގަރާރު ފާސްވުމާއެކު އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ މިކަމަށް ސަރުކާރުގެ ފުރިހަމަ އެއްބާރުލުން ލިބޭނެ ކަމަށް ގަބޫލުފުޅުކުރައްވާކަމަށް ވިދާޅުވެފައެވެ. އަދި ބޯހިޔާވަހިކަމުގެ މި ސިޔާސަތު ތަންފީޒުކުރަން މަސައްކަތްކުރައްވާނެ ކަމުގެ ޔަގީންކަން ރައީސް ނަޝިދު ވަނީ ދެއްވާފައެވެ.
