ޔޫވީ އަތުން ވެލެންސިއާއަށް ފަސޭހަ މޮޅެއް

ޕްރެޒިޑެންޓްސް ކަޕުގައި އާދީއްތަ ދުވަހުގެރޭ ކުޅުނު މެޗުން ޔުނައިޓެޑް ވިކްޓަރީ (ޔޫވީ) އަތުން ފަސޭހަކަމާއެކު ކުލަބު ވެލެންސިއާ މޮޅުވެއްޖެއެވެ.

ގައުމީ ފުޓުބޯޅަ ދަނޑުގައި ކުޅުނު މި މެޗު ވެލެންސިއާއިން ކާމިޔާބުކުރީ 5-0 ގެ ތަފާތު ބޮޑު ނަތީޖާއަކުންނެވެ.

ވެލެންސިއާއިން މިރޭގެ މެޗަށް ނިކުތްއިރު، ޗެރިޓީ ޝީލްޑް މެޗުގެ ފުރަތަމަ 11 ގައި ކުޅުނު އިތުބާރު ފޯވާޑް އަލީ އަޝްފާގް (ދަގަނޑޭ) މިރޭގެ މެޗުގައި ނުކުޅެއެވެ. އޭނާ މި މެޗުގައި ކުޅެފައި ނުވަނީ އަނިޔާއެއްގެ ސަބަބުންނެވެ.

ޒުވާން ޓީމަކާއެކު ނުކުތް ޔޫވީން މި މެޗުގެ ކުރީކޮޅު ރަނގަޅަށް ކުޅެ ވެލެންސިއާގެ ގޯލަށް ނުރައްކާކުރިއިރު، މެޗުގެ 27 ވަނަ މިނިޓުގައި އެ ޓީމުގެ އަޙްމަދު ބައްސާމް މުޙައްމަދު ނައީމް (ބައްކު) އަށް ވަނީ އޭރިއާ ތެރެއިން ހުސް ފުރުސަތެއް ލިބިފައެވެ. އެކަމަކު އޭނާ ފޮނުވާލި ހަމަލާގެ ހުރަހަކަށްވީ ވެލެންސިއާގެ ގޯލްކީޕަރު މުޙައްމަދު ފައިސަލެވެ. އަދި ދެވަނަ ފަހަރަށް ލިބުނު ބޯޅަ އޭރިއާ ތެރެއިން ބައްކު ހުހަށް ހުރި އަލީ ހައިޝަމް (ޗުމްޕު) އަށް ދިން ނަމަވެސް، އޭނާ ފޮނުވާލި ހަމަލާ ދިޔައީ ގޯލުގެ ދަނޑި މަތިން ބޭރަށެވެ.

މި މެޗުގެ ފުރަތަމަ ހާފު ނިމުމުގެ ކުރިން ވެލެންސިއާއިން ވަނީ ލީޑު ނަގާފައެވެ. މި ހާފު ނިމެން ތިން މިނެޓަށް ވެފައި ވަނިކޮށް މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން އަލީ ފާސިރު (ސެންޓޭ) އެވެ. އަދި ދެވަނަ ހާފު ފަށައިގެން ހަތްވަނަ މިނެޓުގައި ސެންޓޭ ވަނީ އިތުރު ލަނޑެއް ޖަހައި، ވެލެންސިއާގެ ލީޑު ފުޅާކޮށްދީފައެވެ.

މި މެޗުގައި ވެލެންސިއާއިން ކާމިޔާބުކުރި ތިންވަނަ ލަނޑު މެޗުގެ 73 ވަނަ މިނެޓުގައި ޖަހައިދިނީ ސްޕެއިންގެ ފޯވާޑް ބޯހާސް މާޓިން ގޮންޒޭލާޒެވެ. އަދި މެޗުގެ އިތުރު ވަގުތުގައި ވެލެންސިއާއިން ކާމިޔާބުކުރި ހަތަރުވަނަ ލަނޑު ބިދޭސީ މިޑްފީލްޑަރު ޚަލީލް ޖަމާލް ޖަހައިދިންއިރު، އެ ޓީމުގެ ފަހު ލަނޑު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ހުސެއިން ހަންނާނެވެ.

މެދުކެނޑުމަކަށްފަހު މި އަހަރު ޕްރެޒިޑެންޓްސް ކަޕް ބާއްވާއިރު، މި ފަހަރުގެ މުބާރާތް ރާވާފައިވާ ގޮތުން އަށް ޓީމުގެ މެދުގައި ލީގު ބުރެއް ކުޅޭއިރު، މުބާރާތުގެ ފައިނަލުުގައި ކުޅޭނީ ލީގު ބުރުގެ އެންމެ މޮޅު ދެ ޓީމެވެ. އެންމެ ފަހުން ޕްރެޒިޑެންޓްސް ކަޕުގައި އަށް ޓީމު ހިމެނޭ ގޮތަށް ކުޅުނީ 2015 ވަނަ އަހަރެވެ. މި އަހަރު ޕްރެޒިޑެންޓްސް ކަޕް ބާއްވާއިރު، މި މުބާރާތް އެންމެ ފަހުން ބާއްވާފައިވަނީ 2017 ވަނަ އަހަރެވެ. އޭގެ ފަހުން ފާއިތުވި ތިން ސީޒަނުގައިވެސް އެކި ސަބަބުތަކާ ހުރެ ޕްރެޒިޑެންޓްސް ކަޕް ބާއްވާފައެއް ނުވެއެވެ.