"އިންޑިޔާ އައުޓް" ކެމްޕެއިނާ ދެކޮޅުކަން އެމްއެންޕީން ހާމަކުރުމާއެކު ޕީޕީއެމް/ޕީއެންސީގެ ބަހުގެ ހަމަލާތައް އެމްއެންޕީއަށް
19 ޑިސެމްބަރު 2021 | އާދީއްތަ 18:07މިއީ ރާއްޖޭގެ މުޅި އިޤްތިޞާދު ފުނޑާލުމަށްޓަކައި ބަޔަކު ސިޔާސީ ބޭނުމެއްގައި ކުރާ މަސައްކަތެއްކަމަށް ނާޒިމް ސިފަކުރެއްވި
އެމްއެންޕީއިން ބޭއްވި ނޫސްވެރިންގެ ބައްދަލުވުން
އިދިކޮޅު ޕީޕީއެމް/ޕީއެންސީން ކުރިޔަށްގެންދާ އިންޑިޔާ އައުޓް ކެމްޕެއިނާ އިދިކޮޅުކަން, މޯލްޑިވްސް ނޭޝަނަލް ޕާޓީ (އެމްއެންޕީ)ން ހާމަކުރުމާއެކު ޕީޕީއެމް/ޕީއެންސީގެ ބަހުގެ ހަމަލާތައް އެމްއެންޕީގެ އިސްވެރިންނަށް އަމާޒުވާން ފަށައިފިއެވެ.
އާދިއްތަ ދުވަހު އެމްއެންޕީއިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެޕާޓީގެ ރައީސް ކާނަލް ރިޓަޔަރޑް މުޙައްމަދު ނާޒިމް ވިދާޅުވީ، މިއީ ރާއްޖޭގެ މުޅި އިޤްތިޞާދު ފުނޑާލުމަށްޓަކައި ބަޔަކު ސިޔާސީ ބޭނުމެއްގައި ކުރާ މަސައްކަތެއް ކަމަށެވެ. ލީޑަރެއްގެ އަމިއްލަ ބޭނުމަކަށްޓަކައި ގައުމު ފުނޑާނުލުމަށް ނާޒިމް ވަނީ އިލްތިމާސްކުރައްވާފައެވެ. އަދި އިންޑިއާ އައުޓް ކެމްޕެއިނަކީ ގައުމީ ކެމްޕެއިނެއް ނޫން ކަމަށް ނާޒިމް ވިދާޅުވިއެވެ. އެއީ ރައީސް ޔާމީންގެ ސަރުކާރުގައި ހިންގާފައި ހުރި ކޮރަޕްޝަންގެ ކަންކަމުގައި މަތި ޖެހުމުގެ ނިޔަތުގައި ހިންގާ ޖަރީމާއެއް ކަމަށް ނާޒިމް ވިދާޅުވިއެވެ.
މިއާއެކު ކުރީގެ ރައީސް ޢަބްދުﷲ ޔާމީންގެ ފުރަތަމަ ޑިފެންސް މިނިސްޓަރުކަން ކުރެއްވި ކާނަލް މުޙައްމަދު ނާޒިމަށާއި އެމްއެންޕީގެ ވެރިންނަށް އަމާޒުކޮށް ސޯޝަލް މީޑިޔާގައި ޕީޕީއެމް/ޕީއެންސީގެ މެމްބަރުންނާއި ތާއީދުކުރާ ފަރާތްތަކުން އަންނަނީ ބަހުގެ ހަމަލާތަކެއް ދެމުންނެވެ. އެގޮތުން އިންޑިޔާ ސިފައިންނާއި އިންޑިޔާ ރާއްޖޭގައި ބޭތިއްބުމަށް ނާޒިމް މަސައްކަތްކުރައްވާފައިވާ މޭރުމަކުން އަންނަނީ އިދިކޮޅު ކޯލިޝަންގެ މެމްބަރުން ވާހަކަދައްކަމުންނެވެ. އެގޮތުން އެމްއެންޕީގެ ރައީސް ކާނަލް ނާޒިމްއަކީ ރާއްޖެއަށް އިންޑިއާ ސިފައިންގެ ދެވަނަ ހެލިކޮޕްޓަރު ގެނައުމުގައި އިސްކޮށް ހުރި ފަރާތްކަމަށާއި، ލެޓަރ އޮފް އެކްސްޗޭންޖްގައި ސޮއިކުރީ އޭރުގެ ރައީސުލްޖުމްހޫރިއްޔާއަށް ނާންގާކަމަށް ބުނެ މީހަކު ވަނީ ޓްވީޓެއްކޮށްފައެވެ.
އެ ޓްވީޓަށް ރައްދުދެއްވަމުން ވިލިމާލެ ދާއިރާގެ އެމްއެންޕީ މެމްބަރ އަޙުމަދު އުޝާމް ވިދާޅުވެފައިވަނީ، އެއީ ހަމަޖެހޭ ވާހަކައެއް ނޫންކަމަށެވެ. ރައީސުލްޖުމްހޫރިއްޔާއަކަށް ހުންނަ ފަރާތަކަށް ނޭނގި ބޭރުގެ އެއްވެސް ފަރާތަކާއެކު އެއްވެސް ކަހަލަ އެއްބަސްވުމެއްގައި ސޮއި ނުކުރެވޭނެ ކަމަށެވެ. އަދި ރައީސުލްޖުމްހޫރިއްޔާގެ "ގާނޫނީ ހުއްދަ" ނެތި ސޮއިކުރާ އެއްބަސްވުން ގާނޫނީގޮތުން ސައްހައެއްވެސް ނުވާނެ ކަމަށް އުޝާމް ވަނީ ވިދާޅުވެފައެވެ.
އެމްއެންޕީން ޕީޕީއެމް/ޕީއެންސީން ކޯލިޝަނުން ހިންގާ އިންޑިޔާ އައުޓް ކެމްޕެއިނާ ދެކޮޅުކަން ހާމަކުރުމުން އެކަމާގުޅިގެން މާވަށު ދާއިރާގެ ޕީއެންސީ މެމްބަރ މުހައްމަދު ސައީދު ކުރެއްވި ޓްވީޓެއްގައި ވިދާޅުވީ، ސިޔާސީ މަގުބޫލުކަން ހޯދާނީ ފިނޑިކޮށް ނޫންކަމަށެވެ. ފަހުގެ ތާރީޚުގައި ރާއްޖޭގައި ހިނގި އެންމެ ބޮޑު ޖަރީމާއަކީ، ޔޫޓީއެފްއާއި އިންޑިޔާ ސިފައިން ރާއްޖޭގައި ބޭތިއްބުންކަމަށް ސައީދު ވިދާޅުވިއެވެ. "އެއީ އަމިއްލަ ނަފުސު ހިމެނޭ ކޯލިޝަނުން ހެދި އެންމެ މުޑުދާރު ގޯސް" ސައީދުގެ ޓްވީޓްގައި ވިދާޅުވެފައިވެއެވެ.
އެޓްވީޓަށް ރައްދުދެއްވަމުން އެމްއެންޕީގެ ނައިބު ރައީސް އަދި ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރ ޢަބްދުﷲ ރިޔާޒު ވިދާޅުވީ، ޔޫޓީއެފް އެގްރިމެންޓްގައި ޕީޕީއެމް/ޕީއެންސީ ސަރުކާރުގެ ދައުރެއް އޮތްކަން ވަރަށް ސާފުކަމަށެވެ. "ކޮންމެ ކަމެއްގައި އޮޅުވާލަން ނޫޅުއްވާ!" ރިޔާޒުގެ ޓްވީޓްގައި ވިދާޅުވެފައިވެއެވެ. އަދި ވިދާޅުވީ ޔޫޓީއެފް އެގްރިމެންޓްގެ ފެށުމަކީ 2016 ވަނަ އަހަރު އިންޑިޔާއާއެކު ސޮއިކުރެވުނު "ޑިފެންސް އެކްޝަން ޕްލޭން އޮން ޑިފެންސް ކޯޕަރޭޝަން" ކަމަށެވެ.
ރައީސް ޔާމީން އިސްވެ ހުންނަވައިގެން އި"ންޑިޔާ އައުޓް" ކެމްޕެއިން ކުރިޔަށްވުރެ ފުޅާކޮށް އަންނަނީ ހިންގަމުންނެވެ. އެމަނިކުފާނު އިސްވެ ހުންނަވައި، އަތޮޅުތެރެއަށް ވެސް ދަތުރުކުރައްވާފައިވާއިރު، އަތޮޅުތެރޭގައި މި ކެމްޕެއިން ފުޅާކުރުމުގެ މަސައްކަތްތައް މިހާރުވެސް ކުރިއަށްދެއެވެ. އަދި މާލޭގައި ވެސް މި ކެމްޕެއިންތައް ކުރިއަށްދެއެވެ.
މިހަރަކާތާ ގުޅިގެން ދިވެހި ސަރުކާރުން ބުނެފައިވަނީ، ރާއްޖެއާ ދޭދޭ ގައުމުތަކުގެ މެދުގައި އޮންނަ ގުޅުންތަކާ ގުޅޭގޮތުން ފިތުނަ އުފައްދައި ގޯސް ތުހުމަތުތަކެއް ފެތުރުމަކީ، ރާއްޖެއަށް އަބަދުވެސް އެހީތެރިވެދޭ އަވައްޓެރި ގާތް އެކުވެރި ގައުމުތަކާމެދު އޮންނަ ބަދަހި ގުޅުންތަކަށް ނޭދެވޭ އަސަރުކުރުވާ ކަމެއްކަމަށެވެ. ދިވެހި ސަރުކާރުން ވަނީ ރާއްޖޭގެ ހުރިހާ ފަރާތްތަކާއި ސިޔާސީ ޕާޓީތަކަށާއި، ސިޔާސީ ލީޑަރުންނަށް ވެސް ޒިންމާދާރުކަމާއެކު ހަަރަކާތްތެރިވުމަށް ގޮވާލައި، ރާއްޖެއާ ދޭދޭ ގައުމުތަކާއި ބައިނަލްއަގުވާމީ މަސްރަހުގައި އޮންނަ ގާތް ގުޅުންތަކަށް ބުރޫއަރާހެން ދޮގު މައުލޫމާތު ނުފެތުރުމަށް ގޮވާލައި އެކަމަށް އިލްތިމާސްކޮށްފައެވެ.
