މި މަހު ބަންގްލަދޭޝްގައި ފަށާ ސެންޓްރަލް ޒޯން ވޮލީބޯޅަ މުބާރާތަށް ތައްޔާރުވުމުގެ ގޮތުން އިންޑިއާގެ ހައިދަރުއާބާދު ސްޕައިކާސްއާ ދެކޮޅަށް ކުޅުނު އެކުވެރިކަމުގެ ދެވަނަ މެޗުން ރާއްޖޭގެ ގައުމީ ފިރިހެން ވޮލީބޯޅަ މޮޅުވެއްޖެއެވެ.

ޒުވާނުންގެ މަރުކަޒު އެތެރޭ ކޯޓުގައި ހުކުރު ދުވަހުގެރޭ ކުޅުނު މެޗުން ރާއްޖެ މޮޅުވީ 3-1 ސެޓުންނެވެ. މި މެޗު ރާއްޖޭން ކާމިޔާބުކުރިއިރު، އެ ޓީމަށް ދެކޮޅަށް ކުޅުނު ފުރަތަމަ މެޗުން ރާއްޖެ މޮޅުވީ ފަހަތުން އަރައި 3-1 ސެޓުންނެވެ.

ހުކުރު ދުވަހުގެރޭ ކުޅުނު މެޗުގެ ފުރަތަމަ ސެޓުގައި ރާއްޖޭގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، މި ސެޓު ރާއްޖެއިން ވަނީ 25-13 އިން ފަސޭހަކަމާއެކު ކާމިޔާބުކޮށްފައެވެ. އެކަމަކު މެޗުގެ ދެވަނަ ސެޓު ފަށައިގެން ރާއްޖޭން ހަތް ޕޮއިންޓުގެ ލީޑެއް ނެގި ނަމަވެސް، ސެޓުގެ ފަހުކޮޅު ހައިދަރުއާބާދު ސްޕައިކާސްއިން ވަނީ ކުޅުން ރަނގަޅުކޮށް 25-23 އިން މި ސެޓު ކާމިޔާބުކޮށްފައެވެ.

މި މެޗުގެ ތިންވަނަ ސެޓު ފަށައިގެންވެސް ރާއްޖޭން ލީޑުކޮށްގެން ކުޅުނު ނަމަވެސް، ހައިދަރުއާބާދު ސްޕައިކާސްއިން ވަނީ ސެޓުގެ މެދުތެރެއިން ރާއްޖެއާ 14-14 އިން އެއްވަރުކޮށްފައެވެ. އެކަމަކު ސެޓުގެ ފަހުކޮޅު ރާއްޖޭން ވަނީ ތަފާތު މޮޅު ކުޅުމެއް ދައްކައި 25-20 އިން މި ސެޓު ކާމިޔާބު ކޮށްފައެވެ. އަދި މެޗުގެ ހަތަރުވަނަ ސެޓުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، މި ސެޓު 25-19 އިން ކާމިޔާބުކޮށް ރާއްޖެ ވަނީ މި މެޗުން މޮޅުވެފައެވެ.

ސެންޓްރަލް ޒޯން ވޮލީބޯޅަ މުބާރާތަށް ތައްޔާރުވުމުގެ ގޮތުން އިންޑިއާގެ ހައިދަރުއާބާދު ސްޕައިކާސްއާ ދެކޮޅަށް ރާއްޖޭން ޖުމްލަ ތިން މެޗެއް ކުޅޭއިރު، ފަހު މެޗު ކުޅޭނީ ހޮނިހިރު ދުވަހުގެ ހަވީރެވެ. އެއަށްފަހު ސެންޓްރަލް ޒޯން ވޮލީބޯޅަ މުބާރާތުގައި ވާދަކުރުމަށް ގައުމީ ވޮލީ ޓީމުތައް ބަންގްލަދޭޝަށް ފުރާނީ އާދީއްތަ ދުވަހުއެވެ.

ސެންޓްރަލް ޒޯނުގެ ކުރިން އިންޑިއާގެ ހައިދަރުއާބާދު ސްޕައިކާސްއާ ދެކޮޅަށް ރާއްޖޭން މެޗުތަކެއް ކުޅޭއިރު، މީގެ ކުރިން މި މަހު ރާއްޖެއިން ވަނީ ސްރީ ލަންކާއާ ދެކޮޅަށްވެސް އެކުވެރިކަމުގެ ތިން މެޗެއް ކުޅެފައެވެ. އެ ތިން މެޗުންވެސް ގައުމީ ފިރިހެން ވޮލީބޯޅަ ޓީމު ވަނީ ބަލިވެފައެވެ.

މި މަހުގެ 21 ވަނަ ދުވަހުން ފެށިގެން 29 ވަނަ ދުވަހުގެ ނިޔަލަށް ސެންޓްރަލް ޒޯން ވޮލީބޯޅަ މުބާރާތް ބަންގާޅުގައި ބާއްވާއިރު، ފިރިހެން މުބާރާތުގައި ވާދަކުރާ ގައުމުތަކަކީ ރާއްޖެ އާއި، ނޭޕާލާއި، ސްރީ ލަންކާ އާއި، އުޒްބެކިސްތާން އަދި ބަންގްލަދޭޝެވެ. އަދި އަންހެން މުބާރާތުގައި ރާއްޖެއާއެކު ވާދަކުރާނީ ކިރްގިސްތާނާއި، ނޭޕާލާއި، އުޒްބެކިސްތާން އަދި ބަންގްލަދޭޝެވެ.