ރާއްޖޭން އިންޑިއާގެ ހައިދަރުއާބާދު ސްޕައިކާސް ބަލިކޮށްފި

މި މަހު ބަންގްލަދޭޝްގައި ފަށާ ސެންޓްރަލް ޒޯން ވޮލީބޯޅަ މުބާރާތަށް ތައްޔާރުވުމުގެ ގޮތުން އިންޑިއާގެ ހައިދަރުއާބާދު ސްޕައިކާސްއާ ދެކޮޅަށް ކުޅުނު އެކުވެރިކަމުގެ ފުރަތަމަ މެޗުން ރާއްޖޭގެ ގައުމީ ފިރިހެން ވޮލީބޯޅަ މޮޅުވެއްޖެއެވެ.

ޒުވާނުންގެ މަރުކަޒު އެތެރޭ ކޯޓުގައި ބުރާސްފަތި ދުވަހުގެރޭ ކުޅުނު މެޗުން ރާއްޖެ މޮޅުވީ ފަހަތުން އަރައި 3-1 ސެޓުންނެވެ.

މި މެޗުގެ ފުރަތަމަ ސެޓު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، ސެޓުގެ މެދާ ހިސާބުން އިންޑިއާގެ ހައިދަރުއާބާދު ސްޕައިކާސްއިން ވަނީ ތަފާތު މޮޅުކުޅުމެއް ދައްކައި 19-25 އިން މި ސެޓު ކާމިޔާބުކޮށްފައެވެ. އަދި މެޗުގެ ދެވަނަ ސެޓުގައިވެސް ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، ސެޓުގެ ފަހުކޮޅު ރާއްޖޭން ވަނީ ތަފާތު މޮޅު ކުޅުމެއް ދައްކައިފައެވެ. އެއާއެކު މި ސެޓު ރާއްޖޭން ކާމިޔާބުކުރީ 25-18 އިންނެވެ.

މި މެޗުގެ ތިންވަނަ ސެޓުގައި ރާއްޖޭން ލީޑުކޮށްގެން ކުޅުނުއިރު، މި ސެޓުގައި ރާއްޖެއިން ވަނީ ހަތް ޕޮއިންޓުގެ ލީޑެއް ނަގާފައެވެ. އެގޮތުން މި ސެޓު ރާއްޖެއިން ކާމިޔާބުކޮށްފައިވަނީ 25-18 އިންނެވެ. އަދި މި މެޗުގެ ފަހު ސެޓުގައި އިންޑިއާ ކުޅުންތެރިންނަށް ގިނަ ގޯސްތަކެއް ހެދުނުއިރު، މި ސެޓު ރާއްޖޭން ވަނީ ފަސޭހަކަމާއެކު 25-17 އިން ކާމިޔާބުކޮށްފައެވެ.

ބުރާސްފަތި ދުވަހުގެރޭ ކުޅުނު މެޗުގެ ތިންވަނަ ސެޓުގައި ޒުވާން ކުޅުންތެރިޔާ މާއިޝް މުޙައްމަދަށް ވަނީ ކުޅުމުގެ ފުރުސަތު ދީފައެވެ. މިއީ އުމުރުން 17 އަހަރު މާއިޝް ގައުމީ ޓީމަށް ކުޅުނު ފުރަތަމަ މެޗެވެ. ސެންޓްރަލް ޒޯން ވޮލީބޯޅަ މުބާރާތަށް އެކުލަވާލި 12 ކުޅުންތެރިންގެ ފައިނަލް ސްކޮޑުގައި މާއިޝާއެކު ޒުވާން އިތުރު ދެ ކުޅުންތެރިންވެސް ވަނީ ހިމަނާފައެވެ. އެއީ އުމުރުން 19 އަހަރުގެ އަޙްމަދު ނާފިއު އާއި އުމުރުން 20 އަހަރުގެ ޝާމިލް މުޙައްމަދެވެ.

ސެންޓްރަލް ޒޯން ވޮލީބޯޅަ މުބާރާތަށް ތައްޔާރުވުމުގެ ގޮތުން އިންޑިއާގެ ހައިދަރުއާބާދު ސްޕައިކާސްއާ ދެކޮޅަށް ރާއްޖޭން ޖުމްލަ ތިން މެޗެއް ކުޅޭއިރު، ދެވަނަ މެޗު ކުޅޭނީ ހުކުރު ދުވަހުގެރެއެވެ. އަދި ތިންވަނަ މެޗު ކުޅޭނީ ހޮނިހިރު ދުވަހުގެރއެވެ. އެއަށްފަހު ސެންޓްރަލް ޒޯން ވޮލީބޯޅަ މުބާރާތުގައި ވާދަކުރުމަށް ގައުމީ ވޮލީ ޓީމުތައް ބަންގްލަދޭޝަށް ފުރާނީ އާދީއްތަ ދުވަހުއެވެ.

ސެންޓްރަލް ޒޯނުގެ ކުރިން އިންޑިއާގެ ހައިދަރުއާބާދު ސްޕައިކާސްއާ ދެކޮޅަށް ރާއްޖޭން މެޗުތަކެއް ކުޅޭއިރު، މީގެ ކުރިން މި މަހު ރާއްޖެއިން ވަނީ ސްރީ ލަންކާއާ ދެކޮޅަށްވެސް އެކުވެރިކަމުގެ ތިން މެޗެއް ކުޅެފައެވެ. އެ ތިން މެޗުންވެސް ގައުމީ ފިރިހެން ވޮލީބޯޅަ ޓީމު ވަނީ ބަލިވެފައެވެ.

މިމަހު ސެންޓްރަލް ޒޯން ވޮލީބޯޅަ މުބާރާތް ބަންގާޅުގައި ބާއްވާއިރު، ފިރިހެން މުބާރާތުގައި ވާދަކުރާ ގައުމުތަކަކީ ރާއްޖެ އާއި، ނޭޕާލާއި، ސްރީ ލަންކާ އާއި، އުޒްބެކިސްތާން އަދި ބަންގްލަދޭޝެވެ. އަދި އަންހެން މުބާރާތުގައި ރާއްޖެއާއެކު ވާދަކުރާނީ ކިރްގިސްތާނާއި، ނޭޕާލާއި، އުޒްބެކިސްތާން އަދި ބަންގްލަދޭޝެވެ.