އަރަބިއްޔާގެ ދަރިވަރުންގެ ކިޔެވުން ވަގުތީގޮތުން އިއްޒުއްދީން ސްކޫލަށް ބަދަލުކުރަން ނިންމައިފި
އަރަބިއްޔާ ސްކޫލް ހުންނަ އިމާރާތަށް އެކި ވަރުގެ ގެއްލުންތައް ލިބިފައިވާކަން ވަނީ ފާހަގަވެފައި
އަރަބިއްޔާ ސްކޫލް
އަރަބިއްޔާ ސްކޫލްގެ ދަރިވަރުންގެ ކިޔެވުން ވަގުތީގޮތުން އިއްޒުއްދީން ސުކޫލަށް ބަދަލުކުރަން ނިންމާފައިވާކަމަށް އެޑިއުކޭޝަން މިނިސްޓްރީން ބުނެފިއެވެ.
އަރަބިއްޔާ ސްކޫލް ހުންނަ އިމާރާތަށް ލިބިފައިވާ ގެއްލުންތަކާ ގުޅިގެން އެޑިއުކޭޝަން މިނިސްޓްރީން ނެރުނު ބަޔާނެއްގައި ވަނީ، އަރަބިއްޔާ ސްކޫލްގެ އިމާރާތަށް މިވަގުތު ދިމާވެގެން އުޅޭ މައްސަލަ ބަލައި ހައްލުކުރުމަށް އިތުރު ވަގުތު ބޭނުންވާ ކަމަށެވެ.
އެ ސްކޫލްގެ އިމާރާތުގެ ހާލަތު މިވަގުތު ހުރިގޮތުން އެތަނުގައި ދަރިވަރުންނަށް ތައުލީމު ފޯރުކޮށްދިނުމަކީ އެންމެ ރައްކާތެރިކަމެއްނޫން ކަމަށާއި، ޢިމާރާތަށް ލިބިފައިވާ ގެއްލުންތަކަށް އަވަސް ހައްލެއް ހޯދުމަށްޓަކައި މިނިސްޓްރީން މަސައްކަތް ކުރަމުންދާ ކަމަށެވެ. މިކަމަށް ހައްލެއް ހޯދެންދެންވެސް ދަރިވަރުންގެ ކިޔެވުން މެދުނުކެނޑި ކުރިއަށް ގެންދަންޖެހޭ ކަމަށާއި، 700އަށްވުރެ ގިނަ ދަރިވަރުންގެ ކިޔެވުން މެދުނުކެނޑި ކުރިއަށް ގެންދެވޭނީ ސްކޫލެއް ހިންގުމަށް އިމާރާތްކޮށްފައިހުރިތަނެއްގައި ކަމަށް މިނިސްޓްރީން ބުނެފައިވެއެވެ. އަދި ވަސީލަތްތައްވެސް ހުންނަންޖެހޭ ކަމަށެވެ.
މިކަންތައްތަކަށް ރިއާޔަތްކޮށް ތިން ކަމެއް ކުރުމަށް މިނިސްޓްރީން ވަނީ ނިންމާފައެވެ. އެގޮތުން އަރަބިއްޔާ ސްކޫލްގެ ދަރިވަރުންގެ ކިޔެވުން ވަގުތީގޮތުން އިއްޒުއްދީން ސްކޫލަށް ބަދަލުކުރަން އެޑިއުކޭޝަން މިނިސްޓްރީން ވަނީ ނިންމާފައެވެ. އަދި މިހާރު ހުޅުމާލޭގައި އިމާރާތް ކުރަމުންދާ ސްކޫލްތަކުގެ ތެރެއިން، އެއް ސުކޫލް އަރަބިއްޔާއަށް ޚާއްސަ ކުރުމަށްވެސް ނިންމާފައިވެއެވެ. މީގެ އިތުރުން މިހާރު އަރަބިއްޔާ ސްކޫލް ހިންގާ އިމާރާތުގެ ސްޓްރަކްޗަރަލް އެސެސްމެންޓް ނިމުމުން، އެ އެސެސްމެންޓުގެ ރިކޮމެންޑޭޝަންއާ އެއްގޮތަށް، ދިމާވެފައިވާ މައްސަލަތައް ހައްލުކުރާނެ ކަމަށްވެސް އެޑިއުކޭޝަން މިނިސްޓްރީން ބުނެފައިވެއެވެ. އެ އިމާރާތަކީ އަބަދުވެސް އަރަބިއްޔާ ސްކޫލަށް ޚާއްސަކޮށްފައިހުންނާނެ އިމާރާތެއް ކަމަށް މިނިސްޓްރީން ބުނެފައިވެއެވެ.
އަރަބިއްޔާ ސްކޫލް އިމާރާތަށް ލިބިފައިވާ ގެއްލުންތައް ބެލުމަށް ސްޓްރަކްޗަރަލް އެސެސްމެންޓެއް ހަދަމުން އަންނަކަމަށާއި އެސެސްމެންޓް ނިންމުމަށް ދެ މަހެއްހާ ދުވަސް ނަގާނެކަމަށް، އެކަން ކުރަމުން އަންނަ ކުންފުނިން ބުނެފައިވާކަމަށް އެޑިޔުކޭޝަން މިނިސްޓަރ ޑރ އައިޝަތު އަލީ މީގެ ކުރިން ވަނީ ވިދާޅުވެފައެވެ.
އެސްކޫލް ހުޅުވާފައިވަނީ 2013 ވަނަ އަހަރު ކަމަށާއި އެސްކޫލްގައި ބޮޑެތި ރެނދުތަކެއް ހުރިކަން ފާހަގަވެފައިވަނީ 2020 ވަނަ އަހަރުގެ ޑިސެމްބަރ މަހުގައި ކަމަށް މިނިސްޓަރ ވިދާޅުވިއެވެ. އަދި އެކަން ފާހަގަވުމާއި ގުޅިގެން ވިޝުއަލް އިންސްޕެކްޝަނެއް ހެދުމަށް ބަޔަކާ ހަވާލުކުރި ކަމަށް މިނިސްޓަރ ވިދާޅުވިއެވެ. އެއިންސްޕެކްޝަންގެ ރިޕޯޓް ލިބިވަޑައިގަނެފައިވާ ކަމަށާއި އެރިޕޯޓްގައި މައިގަނޑު ކަމަކަށް ފާހަގަކޮށްފައިވަނީ ވިޝުއަލް އިންސްޕެކްޝަނަކުން އަދި ސްކޫލަށް ލިބިފައި ހުރި ގެއްލުންތަކެއް ނޭނގޭނެކަމަށް ކަމަށެވެ. އެހެންކަމުން ސްޓްރަކްޗަރަލް އެސެސްމެންޓެއް ހެދުމަކީ މުހިންމު ކަމެއްކަމަށް އެރިޕޯޓްގައި ފާހަގަކޮށްފައިވާކަމަށް މިނިސްޓަރ ވިދާޅުވިއެވެ.
ވިޝުއަލް އިންސްޕެކްޝަން ރިޕޯޓްގައި ދަރިވަރުންނަށް ގެއްލުންވާކަމެއް އަދިނެތް ކަމަށް ބުނެފައިވާކަމަށް މިނިސްޓަރ ވިދާޅުވިއެވެ. އެހެންނަމަވެސް އެތަނުގެ ހާލަތު ގާތުން ބަލަމުންދާކަމަށާއި، ކިރިޔާވެސް ދަރިވަރުންނަށް ނުރައްކަލެއް އޮތްކަން އެނގޭއިރަށް އެތަނުން ކުދިން ނެރޭނެކަމަށް މިނިސްޓަރ ވިދާޅުވިއެވެ.
ސްޓްރަކްޗަރަލް އެސެސްމެންޓް ހެދުމުން ތަނަށް ބޭނުންވާ މަރާމާތު އެނގިގެންދާނެކަމަށާއި، އެހެންކަމުން މިހާރު ރާވާފައި އޮތީ ސްކޫލް ބަންދުގައި އެތަން މަރާމާތުކުރެވޭ ވަރަށް މަސައްކަތްތައް ކުރިޔަށް ގެންދިޔުމަށް ކަމަށް މިނިސްޓަރ ވިދާޅުވިއެވެ. ސްޓްރަކްޗަރަލް އެސެސްމެންޓްގެ ބައެއް ކަންތައްތައް ރާއްޖެއިން ބޭރަށް ފޮނުވައިގެން ބަލަންޖެހޭކަމަށް މިނިސްޓަރ ވިދާޅުވިއެވެ.
