ރާއްޖެޓީވީއަށް ދިމާވި ފަދަ ދަތިތަކާއި އަނިޔާ، އަލުން ދިވެހި ނޫސްވެރިކަމަށް ދިމާވާކަށް ނޭދެން - ސަލީމް
15 ޑިސެމްބަރު 2021 | ބުދަ 10:49ރާއްޖެ ޓީވީއަށް ދިމާވި ދަތިތަކާއި އަނިޔާއަށް އަދިވެސް އިންސާފު ލިބިފައެއް ނުވޭ
ރާއްޖެޓީވީއަށް 11 އަހަރު ފުރުނުއިރު، އަދިވެސް ދިމާވި ދަތިތަކާއި އަނިޔާއަށް އިންސާފު ލިބިފައިނުވޭ
ރާއްޖެ ޓީވީއަށް ނުހައްގުން ދިން އަދަބުތަކާއި، އަނިޔާ ދިވެހި ނޫސްވެރިކަމަށް އަލުން ކުރިމަތި ނުވުމަށް އެދޭކަމަށް ހޯރަފުށީ ދާއިރާގެ މެމްބަރު އަޙްމަދު ސަލީމް ވިދާޅުވެއްޖެއެވެ.
ރާއްޖެޓީވީގެ 11 ވަނަ އަހަރީ ދުވަހުގެ ތަހުނިޔާ ވިދާޅުވަމުން ސަލީމް ވިދާޅުވީ ނުހައްގު އަދަބުތަކާއި އަނިޔާގެ މާޒީ ފަހަނައަޅާ 11 އަހަރު ހޭދަކޮށްފައިވާ ކަމަށެވެ. އަދި ރާއްޖެޓީވީއަށް ދިން ނުހައްގު އަދަބުތަކަށާއި އަނިޔާއަށް އިންސާފު ލިބޭނެ ކަމަށް އުންމީދު ކުރައްވާ ކަމަށް ވެސް ސަލީމް ވިދާޅުވިއެވެ.
ރާއްޖެޓީވީއަށް 11 އަހަރު ފުރުނުއިރު 2013 ވަނަ އަހަރު ރާއްޖެ ޓީވީ ރޯކޮށްލައި އަނދާ އަޅިއަށް ހަދާލާފައިވެއެވެ. މީގެ އިތުރުން ރައްޔިތުންނަށް ތެދު ޚަބަރާއި މައުލޫމާތު ގެނެސްދިނުމުގެ މަސައްކަތް ކުރަމުންގެންދަނިކޮށް މިލިއަނުން ޖޫރިމަނާކޮށްފައިވެއެވެ. އަދި ރާއްޖެޓީވީގެ ނޫސްވެރިން ބަންދުކޮށް ކޯޓުތަކުގައި ނޫސްވެރިންގެ މައްޗަށް ދައުވާ އުފުލާފައިވެއެވެ.
އެހެންނަމަވެސް މި ވޭތުވެދިޔަ 11 އަހަރު ދުވަހުގެތެރޭގައި ރާއްޖެ ޓީވީއަށް ދިމާވި ކޮންމެ ކަމަކުން އަރައިގެންފައިވަނީ ބެލުންތެރިންނާއި ހެޔޮއެދޭ ފަރާތްތަކުގެ އެހީތެރިކަމާއެކުގައެވެ. އެގޮތުން ރާއްޖެޓީވީ ޖޫރިމަނާކުރި ކޮންމެ ފަހަރަކުވެސް ބެލުންތެރިންގެ އެހީ ރާއްޖެޓީވީއަށް ވަނީ ލިބިފައެވެ.
