ނުނިންމައި އޮތް، ނައިފަރުގެ ނަރުދަމާ ނިންމިކަމަށް ކުރީ ސަރުކާރުން ދެއްކި: ޝާހު
މަސައްކަތް ނިންމިކަމަށް ވަނީ ސޮއިކޮށްފައި
އެމްޑަބްލިއުއެސްސީގެ މެނޭޖިން ޑިރެކްޓަރ ހަސަން ޝާހު، ފަލަސުރުޚީ ޕްރޮގްރާމުގައި ޥާހަކަދައްކަވަނީ
ކުރީ ސަރުކާރުން ޅ. ނައިފަރުގެ ފެނާއި ނަރުދަމާ ނިޒާމު ގާއިމްކޮށްފައިވާކަމަށް ބުނާ މަގުތަކުގައި, މި ނިޒާމު ގާއިމްކޮށްފައިނުވާކަން ފާހަގަކުރެވިފައިވާކަމަށް އެމްޑަބްލިއުއެސްސީގެ މެނޭޖިން ޑިރެކްޓަރ ހަސަން ޝާހު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ޝާހު ވިދާޅުވީ, އަތޮޅުތެރޭގައި އެމްޑަބްލިއުއެސްސީން ކުރިއަށްގެންދާ މަޝްރޫއުތަކުގެ ތެރެއިން އެންމެ ގޮންޖެހުންބޮޑު އެއް މަސައްކަތަކީ ޅ. ނައިފަރުގައި ގާއިމުކުރާ ނަރުދަމާ ނިޒާމުގެ މަސައްކަތް ކަމަށެވެ.
ޝާހު ވިދާޅުވީ، ނައިފަރުގެ މަގުތައް ހަނިވެފައި، ބައިވަރު ހޮޅިތަކާއި ކޭބަލްތައް މަގުތަކުގައި އޮންނަ ކަމަށެވެ. އެހެންވުމުން، މަގު ކޮނުމުގައި ބައެއް ފަހަރު ދަތިވާކަމަށެވެ. މިހެން ދިމާވުމުން، މަގު ކޮނުމުގެ ފަކީރާ ނުވަތަ އުދަލި ބޭނުން ނުކުރެވޭ ފަހަރުވެސް އަންނަ ކަމަށާއި، އަތުން މަގު ކޮންނަން ޖެހޭ ފަހަރުވެސް އަންނަ ކަމަށެވެ. މި މަސައްކަތަށް 19 މީހުން އެސައިންކޮށް، ދެ ޓީމަކަށް ބަހައިގެން މަސައްކަތްކުރާއިރުވެސް، ދުވާލަކު ދެ މީޓަރުވެސް ނޭޅޭ ކަމަށް ޝާހު ވިދާޅުވިއެވެ.
ޝާހު ވިދާޅުވީ، ނައިފަރު ފެނާއި ނަރުދަމާގެ މަސައްކަތް މީގެ ކުރިން އިންޑިއާ ކުންފުންޏަކުން ކޮށްފައިވާކަމަށެވެ. އެކުންފުނިން މި މަސައްކަތްކޮށްފައިވަނީ ބޮޑެތި މަގުތަކުގައި އެކަނިކަމަށް ލިޔެކިޔުންތަކުން ފެންނަން އެބައޮތް ކަމަށާއި، އަދި އުނދަގޫ މަގުތައް ދޫކޮށްލާފައިވާކަމަށެވެ.
އެހެންނަމަވެސް، އެކުންފުނިން މި ނެޓްވޯކް އަޅައި، މަސައްކަތް ނިންމިކަމަށް ސޮއިކޮށްފައިވާ މަގުތަކަށް ބަލާއިރު، އެ މަސައްކަތް އެގޮތަށް މަސައްކަތް ނުކުރެވި ހުރިކަން ފާހަގަކުރެވިފައިވާކަމަށް ޝާހު ވިދާޅުވިއެވެ.
މީގެ އިތުރުން މި ސަރުކާރުން އެމްޑަބްލިއުއެސްސީއާ ހަވާލުކޮށްގެން ކުރިއަަށްގެންދާ ފެނާއި ނަރުދަމާގެ 20 ޕްރޮޖެކްޓަކީ، ޑިޒައިން އެންޑް ބިލްޑް އުސޫލުން ކުރިއަށްގެންދާ ޕްރޮޖެކްޓުތަކެއް ކަމަށެވެ. މި 20 ރަށުގެ ނިޒާމު މިހާރު ވަނީ ޑިޒައިން ކޮށްފައި ކަމަށާއި، އެ ކުންފުންޏަށް ކުރަންޖެހޭ ހަމައެކަނި މަސައްކަތަކީ އަމަލީ މަސައްކަތް ފެށުން ކަމަށް ޝާހު ވިދާޅުވިއެވެ. އެ މަސައްކަތްތައް އެއްވެސް ގޮންޖެހުމެއްނެތި ކުރިއަށްދާކަމަށް ޝާހު ވިދާޅުވިއެވެ.
