ކައުންސިލުން ކަނޑައަޅާ ގޮތެއްގެ މަތިން، ރަށްރަށުގައި އުސްކޮށް އިމާރާތް ކުރެވޭގޮތަށް ގަވާއިދަށް އިސްލާހު ގެނެސްފި
14 ޑިސެމްބަރު 2021 | އަންގާރަ 11:42ގަވާއިދު އިސްލާހު ކުރުމުގެ ކުރިން، ސިޓީތަކުގައި 100 ފޫޓަށްވުރެ އުސްކޮށް އިމާރާތް ކުރެވޭ
ތިނަދޫ އައިސް ޕްލާންޓް ޖެޓީ
ރަށްރަށުގައި އިމާރާތްކުރެވޭނެ އެންމެ އުސްމިނަކީ 100 ފޫޓްކަމުގައި ކައުންސިލްތަކަށް ކަނޑައެޅޭ ގޮތަށް ޕްލޭނިންގ ގަވާއިދެއް ނެތް ރަށްރަށް ނުވަތަ ފަޅުފަޅުގައި އިމާރާތް ކުރަންވީ ގޮތުގެ ގަވާއިދަށް އިސްލާހު ގެނެސްފިއެވެ.
މި ގަވާއިދުގެ ދަށުން މީހުން ދިރިއުޅޭ ރަށްރަށުގައި އިމާރާތްކުރެވޭނެ އެންމެ އުސްމިން ކައުންސިލުން ކަނޑައެޅިދާނެއެވެ. އެގޮތުން މީހުން ދިރިއުޅޭ ރަށްރަށުގެ ކައުންސިލުން، އެ ރަށެއްގައި އިމާރާތް ކުރެވޭނެ އެންމެ އުސްމިން، 30.48 މީޓަރު ނުވަތަ 100 ފޫޓަށް ވުރެ އުސްނުވާނެ ގޮތަށް ކަނޑައެޅިދާނެއެވެ. މިގޮތުން އެއްވެސް ރަށެއްގެ ރަށު ކައުންސިލުން ނިންމުމެއް ނިންމައިފިނަމަ، އެ ނިންމުމަކަށް ޢަމަލުކުރަން ފެށޭނެ ތާރީޚު އެނގޭގޮތަށް ދިވެހި ސަރުކާރުގެ ގެޒެޓުގައި ޝާއިޢު ކުރަންވާނެއެވެ. އަދި އެ ނިންމުމެއް މިނިސްޓްރީއަށް ލިޔުމުން ހިއްސާކުރަންވާނެއެވެ.
ސިޓީ ފިޔަވައި އެހެން ރަށްތަކުގައި ދިރިއުޅުމަށް ދޫކޮށްފައިވާ ގޯތީގައި އިމާރާތް ކުރެވޭނެ އުސްމިނަށް ވެސް ވަނީ ބަދަލު ގެނެސްފައެވެ. އެގޮތުން މީހުން ދިރިއުޅޭ ރަށްތަކުގެ ތެރެއިން ސިޓީގެ ގޮތުގައި ކަނޑައަޅައިފައިވާ ރަށްތައް ފިޔަވައި އެހެން ރަށްތަކުގައި ދިރިއުޅުމަށް ދޫކޮށްފައިވާ ގޯއްޗެއްގައި ހަދާ އިމާރާތެއް އިމާރާތް ކުރާއިރު، ދުވާރުން ފެށިގެން ރޫފްބީމުގެ ނުވަތަ ޓެރަސް ސްލެބުގެ ނުވަތަ ޑެކުގެ މަތީކައިރިޔާ ހަމައަށް އިމާރާތް ކުރެވޭނެ އުސްމިން ކަނޑައަޅާނީ 100 ފޫޓަށްވުރެ އުސްނުވާނެ ގޮތަށެވެ.
މީގެ އިތުރުން މީހުން ދިރިއުޅޭ ރަށްތަކުގެ ތެރެއިން ސިޓީގެ ގޮތުގައި ކަނޑައަޅައިފައިވާ ރަށްތަކުގައި ދިރިއުޅުމަށް ދޫކޮށްފައިވާ ގޯއްޗެއްގައި ހަދާ އިމާރާތެއް އިމާރާތް ކުރާއިރު، ދުވާރުން ފެށިގެން ރޫފްބީމުގެ ނުވަތަ ޓެރަސް ސްލެބުގެ ނުވަތަ ޑެކުގެ މަތީކައިރިޔާ ހަމައަށް އިމާރާތް ކުރެވޭނެ އުސްމިނަކީވެސް 100 ފޫޓުގެ ގޮތުގައި ވަނީ ކަނޑައަޅާފައެވެ.
މި ގަވާއިދު އިސްލާހު ކުރުމުގެ ކުރިން މީހުން ދިރިއުޅޭ ރަށްތަކުގެ ތެރެއިން ސިޓީގެ ގޮތުގައި ކަނޑައަޅައިފައިވާ ރަށްތައް ފިޔަވައި އެހެން ރަށްތަކުގައި ދިރިއުޅުމަށް ދޫކޮށްފައިވާ ގޯތީގައި 18.5 މީޓަރަށްވުރެ އުސްކޮށް ޢިމާރާތްކުރެވޭނެއެވެ. އަދި މީހުން ދިރިއުޅޭ ރަށްތަކުގެ ތެރެއިން ސިޓީގެ ގޮތުގައި ކަނޑައަޅައިފައިވާ ރަށްތަކުގައި ދިރިއުޅުމަށް ދޫކޮށްފައިވާ ގޯތީގައި 30.48 މީޓަރަށްވުރެ އުސްކޮށް ޢިމާރާތްކުރެވޭނެއެވެ. އެހެނަނަމަވެސް މި ގަވާއިދަށް ގެނައި އިސްލާހާއެކު 30.48 މީޓަރަށްވުރެ އުސްކޮށް ސިޓީތަކުގައި އަދި ސިޓީ ނޫން މީހުން ދިރިއުޅޭ ރަށްތަކުގައި ކައުންސިލުން ނިންމައިފިނަމަ، އުސްކޮށް އިމާރާތް ނުކުރެވޭނެއެވެ.
މި ގަވާއިދަށް އަމަލުކުރަން ފަށާނީ ގެޒެޓުގައި ޝާއިއު ކުރާ ތާރީހުން ފެށިގެން 30 ދުވަސް ފަހުންނެވެ. އެހެންކަމުން މި ގަވާއިދަށް އަމަލުކުރާނީ އަންނަ މަހުގެ 14 ވަނަ ދުވަހުގެ ފަހުންނެވެ.
