ކުނިން ހަކަތަ އުފައްދާ ޕްލާންޓް ގާއިމުކުރުމަށް ލޯނެއް ނަގައިފި

ރާއްޖޭގައި ގާއިމްކުރަން ނިންމާފައިވާ ކުނިން ހަކަތަ އުފައްދާ ޕްލާންޓުގެ މަސައްކަތަށް އަބޫދާބީ ފަންޑުން ލޯނެއް ދޫކުރަން ނިންމައިފިއެވެ.

މި ނިޒާމު ގާއިމްކުރުމަށް އަބޫދާބީ ފަންޑުން ލޯނުގެ ގޮތުގައި ދޫކުރަން ނިންމާފައިވަނީ 51.4 މިލިއަން ދިރްހަމެވެ. އެއީ ގާތްގަނޑަކަށް 13.9 މިލިއަން ޑޮލަރެވެ.

ލޯނު ދޫކުރުމުގެ އެއްބަސްވުމުގައި އާބޫދާބީ ފަންޑާއި، ދިވެހި ސަރުކާރާ ދެމެދު ވަނީ އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ފިނޭންސް މިނިސްޓަރ އިބްރާހިމް އަމީރެވެ.

މިކަމާއި ގުޅިގެން އަބޫދާބީ ފަންޑުން ކުރި ޓްވީޓެއްގައި ބުނީ ކުނިން ހަކަތަ އުފައްދާ ޕްލާޓު ގާއިމްކުރެވުމުން ކުނިން 10 އިންސައްތަ ކުޑަކުރެވި، 6،000 ގޭބީސީއަށް ކަރަންޓު ފޯރުކޮށްދެވޭނެ ކަމަށެވެ. އަދި ރާއްޖޭގެ އިގްތިސާދު ކުރިއަރުވަން މަގުފަހިވާނެ ކަމަށް ބުނެފައިވެއެވެ.

އަބޫދާބީ ފަންޑުން މި މަޝްރޫއަށް އެހީވުމަށް ލޯނެއް ދޫކުރަން ނިންމުމާއެކު ފިނޭންސް މިނިސްޓަރ އިބްރާހިމް އަމީރު ވަނީ އަބޫދާބީ ފަންޑުން މިފަދަ މަޝްރޫއުތަކަށް އެހީވުމުގައި ދެމިއޮންނަކަމަށްޓަކައި ޝުކުރު އަދާކުރައްވާފައެވެ. އަބޫދާބީ ފަންޑުން އެހީތެރިކަން ފޯރުކޮށްދީފައިވާ ގިނަ ޕްރޮޖެކްޓުތަކެއްގެ މަސައްކަތް މިހާރުވެސް ކުރިއަށްދާކަމަށް މިނިސްޓަރ އަމީރު ވިދާޅުވިއެވެ.

ކުނިން ހަކަތަ އުފައްދާ ޕްލާންޓުގެ މަސައްކަތް ނިމުމުން 100 އަށްވުރެ ގިނަ ވަޒީފާ އުފެދޭނެ ކަމަށް މިނިސްޓަރ އަމީރު ވިދާޅުވިއެވެ. އަދި ރާއްޖެއަކީ ކާބަން ނިއުޓްރަލް ގައުމަކަށް ހެދުމަށް ކުރާ މަސައްކަތަށްވެސް މި ޕްރޮޖެކްޓުން އެހީތެރިކަން ލިބޭނެ ކަމަށް ވިދާޅުވިއެވެ.