ސްމާޓްފޯން އުފައްދާ ޝޯމީ އިން ހިއްސާ ވިއްކަނީ

ސްމާރޓް ފޯނު އުފައްދާ ޗައިނާގެ ކުންފުންޏެއް ކަމުގައިވާ ޝޯމީ ހޮންގް ކޮންގްގެ ސްޓޮކް މާކެޓުގައި ލިސްޓު ކުރަން ނިންމައިފިއެވެ.

ޝޯމީގެ ފޯނުތަކަކީ ޗައިނާ އާއި އިންޑިއާގައި މަގުބޫލު ފޯނުތަކެކެވެ

. މިދިޔަ އަހަރު ޝޯމީ އިން ވަނީ ސްޕެއިނަށްވެސް މާކެޓް ފުޅާކޮށްފައެވެ. އަދި އެމެރިކާއަށް ޝޯމީ ފުޅާކުރުމުގެ މަސައްކަތް ދަނީ ކުރަމުންނެވެ.

މިދިޔަ އަހަރު 114.62 ބިލިއަން ޔުއާން ނުވަތަ 18 ބިލިއަން ޑޮލަރުގެ ވިޔަފާރިވެފައިވާ ކަމަށް ޝޯމީ އިން ބުނެއެވެ. އަދި އެއީ 2016 ވަނަ އަހަރަށްވުރެ 68 އިންސައްތަ އިތުރުވުމެކެވެ.

ހިއްސާ ވިއްކައިގެން ޝޯމީ އިން ހޯދަން ބޭނުންވަނީ ކިހާވަރެއް ކަމެއް ހާމަކޮށްފައިނުވާއިރު ދިރާސާ ކުރާ ފަރާތްތަކުން ބުނާ ގޮތުގައި ހިއްސާ ވިއްކައިގެން ގާތްގަނޑަކަށް 10 ބިލިއަން ޑޮލަރު ޝޯމީ އިން ހޯދާނެ ކަމުގައެވެ.