ވިލާ ހަކަތައިން މުޅިން އާ ގޭސް ސިލިންޑަރެއް ތަޢާރަފްކޮށްފި
ދިހަ ކިލޯގެ ފުޅިއެއް ގޭހާ އެކު ވިއްކާނީ 1127ރ.
ވިލާ ހަކަތައިން އަލަށް ތަޢާރަފްކުރި ފައިބަރ ގޭސް ސިލިންޑަރ
ރާއްޖެއެމްވީއާ ވާހަކަދައްކަވަމުން ވިލާ ހަކަތައިގެ، ޑިރެކްޓަރ، އަބްދުﷲ ޖަލީލު ވިދާޅުވީ އާ ސިލިންޑަރެއް ތަޢާރަފްކުރުމުގެ ބޭނުމަކީ ދަނގަޑު ފުޅީގައި ދަބަރު ޖެހުމުގެ މައްސަލަތައް ދިމާވުމުގެ ސަބަބުން އެކަމަށް ހައްލެއް ހޯދުމުގެ ބޭނުމުގައި ކަމަށެވެ.
އެކުންފުނީގެ ވިސްނުމަކީ ދަނގަޅު ހޮޅިތައް ބޭނުން ނުކުރަން ނިންމުން ކަމަށާއި އެހެންކަމުން އަލަށް މިތަޢާރަފްކުރީ ފައިބަރ ފުޅިއެއް ކަމަށެވެ. އަދި މިފުޅި ވަރަށް ލުއި ވާނެ ކަމަށާއި އެއްތަނުން އަނެއް ތަނެއް ގެންދަން ފަސޭހަވާނެ ކަމަށް ވެސް ޖަލީލް ވިދާޅުވިއެވެ.
އޭނާ ވިދާޅުވީ މިހާރު ބޭނުންކުރަމުންދާ ދަނގަޑު ފުޅި ބަދަލުކޮށްދޭނެ، އަލަށް ގެންނަ ފުޅިތައް އަންނަ ވަރަކުން ކަސްޓަމަރ ޑިމާންޑާ އެއްވަރަށް ލިބިގެންދާނެ ކަމަށެވެ. އަދި މިހާރު ބޭނުންކުރަމުންދާ ދަނގަޑު ފުޅީގެ ލައިފްޓައިމް ދެ އަހަރު ކަމަށްވާއިރު އަލަށް ތަޢާރަފްކުރި މި ފުޅިއަކީ ދިގު މުއްދަތަކަށް ބޭނުންކުރެވޭ، ފެންވަރު ރަނގަޅަށް ތަޢާރަފްކޮށްފައިވާ ފުޅިއެއް ކަމަށެވެ. އެގޮތުން މިފުޅި ތަޢާރަފްކުރުމުގެ ކުރިން ވެސް ވަރަށް ބޮޑަށް ޓެސްޓްކޮށްފައިވާ ކަމަށް ޖަލީލް ވިދާޅުވިއެވެ.
ކުރިއަށްއޮތް އަހަރެއް ދެ އަހަރެއްގެ ތެރޭގައި މުޅިން އައު ފުޅިތައް ބޭނުން ކުރަން ފެށޭނެ ކަމަށް އުއްމީދުކުރާ ކަމަށް އޭނާ ވިދާޅުވިއެވެ.
އަލަށް ތަޢާރަފްކުރީ 10 ކިލޯ އާއި 20 ކިލޯގެ ފައިބަރ ސިލިންޑަރ ގޭސް ފުޅިތަކެވެ.
އެގޮތުން 10 ކިލޯގެ ހުސް ފުޅި ޖީއެސްޓީއާ އެކު 927.5 ރ.އަށް ލިބޭއިރު ދިހަ ކިލޯގެ ފުޅިއެއް ގޭހާ އެކު ވިއްކާނީ 1127ރ. އަށެވެ. އަދި އަލުން ރީފިލް ކުރާއިރު 200 ރ. އަށް ލިބޭނެ ކަމަށް ޖަލީލް ވިދާޅުވިއެވެ. އަދި 20 ކިލޯގެ ހުސް ފުޅިއެއް 1425ރ. އަށް ވިއްކާއިރު، ގޭހާއި އެކު 1960ރ. ވިއްކުމަށް ވަނީ ނިންމާފައެވެ. އަދި މިފުޅި އަލުން ރީފިލް ކުރުމަށް 450ރ. ނަގާނެ ކަމަށް އެކުންފުނިން ބުންޏެވެ.
އަލަށް ތަޢާރަފް ކުރި ގޭސް ފުޅިއަކީ ޑިޒައިންގެ ގޮތުން ބަލާއިރު ވެސް ވަރަށް ހިތްގައިމު ޑިޒައިންއެކެވެ.
