މާލޭގެ ފެންހިންދާ ނިޒާމަކީ ފެން ބޮޑުވުމުގެ ނިޒާމަށް ވަގުތީ ހައްލެއް ހޯދުމަށް ގާއިމްކޮށްފައިވާ ނިޒާމެއް ކަމަށް އެމްޑަބްލިއުއެސްސީގެ މެނޭޖިން ޑިރެކްޓަރ ހަސަން ޝާހު ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން ޝާހު ވިދާޅުވީ މާލޭގެ ފެންހިންދާ ނިޒާމު ގާއިމްކުރުމުގެ މަސައްކަތުގެ ތެރެއިން ޚަރަދުކުރުމަށް އިސްކަންދީފައިވާ ކަންކަން މި ނިޒާމުގެ ރިޕޯޓުގައި ފެންނަން އެބައޮތް ކަމަށެވެ. އަދި މި މަސައްކަތަކީ ވަގުތު ތަންނުދޭތީ ވަގުތީ ހައްލެއް ހޯދުމަށް ގާއިމްކޮށްފައިވާ ނިޒާމެއް ކަމަށެވެ.

ޝާހު ވިދާޅުވީ މާލޭގައި ފެން ބޮޑުވާ މައްސަލަ ހައްލުކުރުމަށް ނިޒާމު ގާއިމްކޮށްފައިވަނީ ފޭސްތަކަކަށް ބަހާލައިގެން ކަމަށެވެ. އެއީ 4 ފޭސްއަކަށް ބަހާލައިގެން ކަމަށެވެ. މިގޮތުން ސިނަމާލެ ހިމެނޭ ސަރަހައްދުގައި އެއް ޕަމްޕު ބަހައްޓާފައި ވާކަމަށާއި، މޯލްޑިވްސް ނޭޝަނަލް ޔުނިވަރސިޓީ ހިމެނޭ ސަރަހައްދުގައި ޕަމްޕެއް ބަހައްޓައި، އިސްކަންދަރު ކޮށި ކައިރީގައި އަދި ކަނބާ އައިސަ ރަނި ހިނގުމުގައި ޕަމްޕެއް ބަހައްޓާފައިވާކަމަށް ޝާހު ވިދާޅުވިއެވެ. އަދި ހަވީރީހިނގުމުގައިވެސް ފެން ހިންދާ ޕަމްޕެއް ބަހައްޓާފައިވާކަމަށް ޝާހު ވިދާޅުވިއެވެ.

ޝާހު ވިދާޅުވީ މި ސަރަހައްދުތަކުގެ އިތުރުން މާލޭގައި ފެން ބޮޑުވާ އެހެން ސަރަހައްދުތަކުގައިވެސް ޕަމްޕުތައް ބަހައްޓަންޖެހޭނެ ކަމަށް ގަބޫލުކުރައްވާ ކަމަށެވެ. މިފަދަ މަސައްކަތްތަކަކީ ސިޓީ ކައުންސިލްގެ ވަރަށް ބޮޑު އެއްބާރުލުމަކާއެކު ކުރެވޭނެ މަސައްކަތެއް ކަމަށެވެ. ރަށްރަށުގައި ފެނާއި ނަރުދަމާގެ މަސައްކަތްތައް ކުރާއިރު، ކައުންސިލްގެ އެއްބާރުލުން ނުލިބޭނަމަ އެކަން ނުކުރެވޭނެ ކަމަށް ޝާހު ވިދާޅުވިއެވެ. އެހެންކަމަށްވާއިރު، ސިޓީ ކައުންސިލަކީ ވަރަށް ގާތް ގުޅުމެއް ބާއްވަން ޖެހޭ ތަނެއް ކަމަށް ގަބޫލުކުރައްވާކަމަށް ޝާހު ވިދާޅުވިއެވެ.

މާލޭގެ ފެން ހިންދާ ނިޒާމު ގާއިމްކުރިއިރު، މާލެ ސިޓީ ކައުންސިލުން މަގު ކޮނުމުގެ ހުއްދަ ދިނުމުގައި ލަސްތަކެއް ހުރުމުން ޕްރޮޖެކްޓު ލަސްވެފައިވާކަން އެނގެން އެބައޮތް ކަމަށް ޝާހު ވިދާޅުވިއެވެ. އަދި މާލެގެ ބިމުގެ ޖާގައިގެ ދަތިކަމުގެ ސަބަބުން ޕަމްޕު ބަހައްޓާނެ ވަކި ތަނެއް ނެތުމާއި، ޕަމްޕު ބަހައްޓަން ހުއްދަ ދިނުމުގައި ދިމާވި ލަސްތައްވެސް ހުރި ކަމަށް ވިދާޅުވިއެވެ.

ޝާހު ވިދާޅުވީ މާޅޭގެ ފެން ހިންދާ ނިޒާމު ގާއިމްކުރުމަށް ހެދި ކަލްކިއުލޭޝަންތަކުގައި ފުރާޅުތައް ހިމަނާފައި ނުވާކަމަށެވެ. ފުރާޅުތަކުން ފައިބާ ފެން ވެސް އެޅެނީ މަގުމައްޗަށް ކަމަށްވާއިރު، އެ ފެން ބޭރުކުރަން ގާއިމްކޮށްފައިވާ ޕަމްޕުތަކަކީ އެކަށީގެންވާ ޕަމްޕުތަކަކަށް ވާންޖެހޭ ކަމަށް ޝާހު ވިދާޅުވިއެވެ.

މިހާރު ހުރި ޕަމްޕުތަކަކީ 9 ކިލޯވޮޓް ޕްމަޕުތަކެއް ކަމަށް ޝާހު ވިދާޅުވިއެވެ. މި އަދަދު 13 ކިލޯވޮޓަށް އިތުރުކޮށްފިނަމަ އެއަށްވުރެ އަވަހަށް ފެން ބޭރުކުރެވޭނެ ކަމަށް ޝާހު ވިދާޅުވިއެވެ.

ވިއްސާރަވެ މާލޭގެ މަގުތަކުގައި ފެން ބޮޑުވުމާ ގުޅިގެން މާލެ ސިޓީގެ މޭޔަރު ޑރ. މުހައްމަދު މުއިއްޒު ވަނީ އެމްޑަބްލިއުއެސްސީއަށް އެ ޕަމްޕުތައް ނުބެލެހެއްޓޭކަމަށް ވިދާޅުވެ ޓްވީޓުކުރައްވާފައެވެ. އަދި އެކަންވެސް ސިޓީ ކައުންސިލަށް ހަވާލު ކުރެއްވުމަށްވެސް މުއިއްޒު ވިދާޅުވިއެވެ. މި ޓްވީޓުގައި އެމްޑަބްލިއުއެސްސީ ބަދުނާމުވާގޮތަށް އޮތުމުން ޝާހު ވަނީ އެކަން ކުށްވެރިކުރައްވާފައެވެ.