ވިކީއާއި ކެޓްރީނާގެ ކައިވެނީގެ އެކި ހަފްލާތަކުގެ ފޮޓޯތަކުން ފޭނުންގެ ހިތްތައް ފުރާލައިފި

ބޮލީވުޑްގެ ދެ ތަރިން ކަމުގައިވާ ކެޓްރީނާ ކައިފްއާއި ވިކީ ކަޝުއަލް ޑިސެމްބަރ މަހުގެ 9 ވަނަ ދުވަހު ކައިވެނިކޮށްފައިވާއިރު, ދެ ތަރިންގެ ފޭނުން އެންމެ އިންތިޒާރުކުރަމުން އަންނަނީ ކައިވެނީގެ އެކި ހަފްލާތަކުގެ ފޮޓޯތަކާއި ވީޑިއޯތަކަށެވެ. ރާޖަސްތާނުގައި, ހަމައެކަނި އާއިލާއާއި ގާތް މީހުންނަށް އެކަނި ދައުވަތު ދީގެން ކުރިޔަށް ގެންދިޔަ މިހަފްލާތަކުގައި ފޯނު ބޭނުންކުރުންވެސް ވަނީ މަނާކޮށްފައިކަމަށް މީޑިޔާ ރިޕޯޓްތަކުން ބުނެއެވެ. އެހެންކަމުން ދެ މީހުންގެ ކައިވެނީގެ ފޮޓޯތަކަށް އެތައް ބަޔަކު ދިޔައީ އިންތިޒާރުކުރަމުންނެވެ.

އެއިންތިޒާރުތަކަށް ނިމުން ގެނެސްދެމުން އަންނަނީ ކެޓްރީނާއާއި ވިކީއެވެ. ކައިވެނިކުރުމާއެކު ކައިވެނީގެ ފޮޓޯތަކާއެކު ދެތަރިން ވަނީ ކައިވެނިކުރިކަން މުޅި ދުނިޔެއަށް އިއުލާންކޮށްފައެވެ. އޭގެފަހުންވެސް ދެތަރިން އަންނަނީ ކައިވެނިކުރުމުގެ ކުރީގެ ހަފްލާތަކުގެ ފޮޓޯތައް ސޯޝަލް މީޑިޔާއަށް ދޫކުރަމުންނެވެ. މިއާއެކު ގިނަ ބަޔެއްގެ ސަމާލުކަންވަނީ މިފޮޓޯތަކަށް ލިބިފައެވެ.

ތިން ދުވަސްވަންދެން ކުރިޔަށް ދިޔަ އެކި ހަފްލާތަކުގެ ފޮޓޯތަކުން ސޯޝަލް މީޑިޔާ ފުރެމުންދާއިރު މީޑިޔާ ރިޕޯޓްތައް ބުނާގޮތުން ދެތަރިން އަންނަނީ ވަރަށް އަވަހަށް މުމްބާއީގައި ވެޑިންގ ރިސެޕްޝަން ބޭއްވުމަށް ތައްޔާރުވަމުންނެވެ.